PUC, વિમો અને RCની મર્યાદા પૂર્ણ થઇ હશે તો ટોલબૂથ પર વસૂલાશે દંડ
ગુજરાત સરકારનો નિર્ણય : કેમેરામાં ઓટોમેટીક થશે દસ્તાવેજોની ચકાસણી
અગ્ર ગુજરાત, ગાંધીનગર
ગુજરાતમાં હવે ખાનગી વાહનચાલકોએ પણ પોતાના વાહનના દસ્તાવેજો સમયસર અપડેટ રાખવા પડશે. રાજ્યમાં માર્ગ સલામતી અને મોટર વાહન નિયમોના અમલીકરણને વધુ અસરકારક બનાવવા માટે ટોલ પ્લાઝા પર કાર્યરત ઈ-ડિટેક્શન (E-Detection) સિસ્ટમનો વ્યાપ વધારી ખાનગી વાહનોને પણ તેમાં આવરી લેવાનો નિર્ણય જાહેર કરવામાં આવ્યો છે. અત્યાર સુધી આ વ્યવસ્થા મુખ્યત્વે કોમર્શિયલ વાહનોની દસ્તાવેજી ચકાસણી માટે ઉપયોગમાં લેવાતી હતી.
વાહન વ્યવહાર કમિશનરની કચેરી દ્વારા વાહનચાલકોને ખાસ કરીને PUC, વાહન વીમો અને રજિસ્ટ્રેશનની માન્યતા તપાસી લેવાની અપીલ કરવામાં આવી છે. ટોલ પ્લાઝા પરથી પસાર થતા વાહનોની નંબર પ્લેટ કેમેરા દ્વારા સ્કેન થશે અને સિસ્ટમ સંબંધિત વાહનના દસ્તાવેજોની વિગતો ડિજિટલ રેકોર્ડ સાથે સરખાવશે. કોઈ જરૂરી દસ્તાવેજની સમયમર્યાદા પૂરી થઈ ગઈ હોય અથવા તે અમાન્ય જણાય તો નિયમો મુજબ ઈ-ચલણ મોકલવાની કાર્યવાહી થઈ શકે છે.
ઈ-ડિટેક્શન સિસ્ટમમાં ટોલ પ્લાઝા પર લગાવવામાં આવેલા કેમેરા વાહનની નંબર પ્લેટ સ્કેન કરશે. ત્યારબાદ વાહન નંબરના આધારે સંબંધિત ડેટાબેઝમાંથી વાહનની વિગતો મેળવી જરૂરી દસ્તાવેજોની માન્યતા તપાસવામાં આવશે. આ પ્રક્રિયામાં દરેક વાહનને રોકીને કાગળો તપાસવાની જરૂર રહેતી નથી.
નેશનલ ઇન્ફોર્મેટિક્સ સેન્ટર (NIC) દ્વારા વિકસાવવામાં આવેલી આ ટેક્નોલોજી ટોલ પ્લાઝા પરથી મળતા વાહન વ્યવહારના ડેટાને વાહન સંબંધિત કેન્દ્રીય રેકોર્ડ સાથે જોડે છે. NICના પ્રકાશન મુજબ, આ સિસ્ટમ PUC, વીમો, ફિટનેસ, ટેક્સ અને પરમિટ જેવા દસ્તાવેજોની સ્થિતિ ચકાસી શકે છે. જોકે, ગુજરાત સરકારની 20 નવેમ્બરની જાહેરાતમાં ખાનગી વાહનો માટે ખાસ કરીને PUC, વીમો અને રજિસ્ટ્રેશન અપડેટ રાખવા પર ભાર મૂકાયો છે.


