રાજકોટ જિલ્લામાં ચાર અલગ-અલગ કરુણ બનાવોમાં માસૂમ બાળક સહિત ચારનાં મોત
આજીડેમ ચોકડીએ પાણીના ટાંકામાં પડી જતા દોઢ વર્ષના બાળકનો ભોગ લેવાયો, રાણપુરમાં કલરકામ કરતી વખતે છજેથી પટકાતાં પ્રૌઢનું મોત
મોટી પાનેલીમાં થ્રેસરમાં ચૂંદડી ફસાતાં 18 વર્ષની યુવતીનું મોત, આટકોટમાંથી યુવાનનો શંકાસ્પદ હાલતમાં મૃતદેહ મળ્યો
અગ્ર ગુજરાત, રાજકોટ
રાજકોટ શહેર અને ગ્રામ્ય પંથકમાં અલગ-અલગ ચાર કરુણ બનાવોમાં એક માસૂમ બાળક સહિત ચાર વ્યક્તિઓનાં મોત નિપજતાં પરિવારોમાં શોકનું મોજું ફરી વળ્યું છે. આજીડેમ ચોકડી નજીક બાંધકામની સાઇટ પર રમતાં રમતાં પાણીના ટાંકામાં પડી જતાં દોઢ વર્ષના બાળકનું મોત થયું હતું. જ્યારે કુવાડવા નજીક રાણપુર ગામે ગોડાઉનમાં કલરકામ કરતી વખતે છજેથી નીચે પટકાતાં 50 વર્ષના પ્રૌઢે જીવ ગુમાવ્યો હતો. બીજી તરફ ઉપલેટાના મોટી પાનેલી ગામે મગફળીના થ્રેસરમાં ચૂંદડી ફસાઈ જતાં 18 વર્ષની યુવતીનું મોત થયું હતું. આ ઉપરાંત આટકોટમાંથી જસદણના ગોડલાધારના 32 વર્ષના યુવાનનો શંકાસ્પદ હાલતમાં મૃતદેહ મળી આવતાં પોલીસે ફોરેન્સિક પોસ્ટમોર્ટમ સહિતની કાર્યવાહી હાથ ધરી છે.
રાજકોટના આજીડેમ ચોકડી નજીક ગોકુલ પાર્કમાં રહેતા અને મૂળ બિહારના કુંદનભાઈ શર્માનો દોઢ વર્ષનો પુત્ર આદર્શ સાંજે ઘર નજીક આવેલી બાંધકામની સાઇટ પર રમતો હતો. આ દરમિયાન રમતાં રમતાં તે ભૂગર્ભ પાણીના ટાંકામાં પડી જતાં બેભાન થઈ ગયો હતો. બનાવને પગલે પરિવારજનો અને આસપાસના લોકો દ્વારા તેને તાત્કાલિક સારવાર માટે ઝનાના હોસ્પિટલમાં ખસેડવામાં આવ્યો હતો, પરંતુ ફરજ પરના તબીબોએ તેને મૃત જાહેર કર્યો હતો. બનાવની જાણ થતાં આજીડેમ પોલીસ સ્ટેશનના હેડ કોન્સ્ટેબલ એ.એચ. ગોહિલે જરૂરી કાર્યવાહી હાથ ધરી હતી. આદર્શ બે ભાઈમાં નાનો હતો અને તેના પિતા સીએનસી ઓપરેટર તરીકે કામ કરે છે. પરિવારના લાડકવાયા પુત્રના અકાળે મોતથી પરિવારમાં કલ્પાંત છવાઈ ગયો હતો.
બીજા બનાવમાં જામનગર રોડ પર આવેલી બજરંગવાડીમાં રહેતા રાજેશભાઈ ઉર્ફે રાજુભાઈ શશીકાંતભાઈ રાવલ (ઉ.વ.50)નું કુવાડવા નજીકના રાણપુર ગામે ગોડાઉનમાં કલરકામ કરતી વખતે છજેથી નીચે પટકાતાં મોત થયું હતું. રાજેશભાઈ ગઈકાલે બપોરે સંજયભાઈના ગોડાઉનમાં અન્ય કારીગરો સાથે કલરકામ કરવા ગયા હતા. ગોડાઉનની બહારની બાજુએ દિવાલ પર કલર કરતી વખતે તેઓ છજા પર ઊભા હતા. આ દરમિયાન અચાનક સંતુલન ગુમાવતાં નીચે પટકાયા હતા અને ગંભીર ઇજાઓ પહોંચી હતી. અન્ય કારીગરો દ્વારા તેમને તાત્કાલિક રાજકોટ સિવિલ હોસ્પિટલમાં ખસેડવામાં આવ્યા હતા, પરંતુ ટૂંકી સારવાર બાદ તેમનું મોત થયું હતું. રાજેશભાઈ પરિવારનો આધારસ્તંભ હોવાથી તેમના મોતથી પરિવારજનોમાં ગમગીની છવાઈ ગઈ હતી. કુવાડવા પોલીસને હોસ્પિટલ ચોકી મારફતે જાણ થતાં આગળની કાર્યવાહી હાથ ધરી હતી.
ઉપલેટા તાલુકાના મોટી પાનેલી ગામે રહેતી 18 વર્ષની જાગુબેન દાનાભાઈ સાગઠીયા તા.30ના રોજ બપોરે ત્રણેક વાગ્યે વાડીએ કામ કરી રહી હતી. આ દરમિયાન મગફળીના થ્રેસરમાં મગફળી કાઢતી વખતે તેના માથે બાંધેલી ચૂંદડી મશીનમાં ફસાઈ જતાં તેનું માથું થ્રેસરમાં આવી ગયું હતું અને ગંભીર ઇજાઓ પહોંચી હતી. બનાવ બાદ તેને 108 મારફતે પ્રથમ ઉપલેટા અને ત્યારબાદ રાજકોટ સિવિલ હોસ્પિટલમાં ખસેડવામાં આવી હતી. જોકે, ગઈ રાત્રે સારવાર દરમિયાન તેનું મોત થયું હતું. ભાયાવદર પોલીસે મૃતદેહને પોસ્ટમોર્ટમ માટે ખસેડી તપાસ હાથ ધરતાં આ દુર્ઘટનાનું કારણ ચૂંદડી થ્રેસરમાં ફસાવાનું હોવાનું સામે આવ્યું હતું. જાગુબેન ત્રણ બહેન અને એક ભાઈમાં વચેટ હતી. યુવાન વયે દીકરીનું મોત થતાં પરિવારમાં શોકની લાગણી પ્રસરી હતી.
ચોથા બનાવમાં જસદણ તાલુકાના ગોડલાધાર ગામના અશ્વિન લાભુભાઈ માનકોલીયા (ઉ.વ.32)નો મૃતદેહ આટકોટના પ્રાથમિક આરોગ્ય કેન્દ્ર નજીકથી મળી આવતાં ચકચાર મચી ગઈ હતી. અશ્વિન સોમવારે પોતાની પત્નીએ કરેલા કેસની મુદ્દતે હાજરી આપવા આટકોટ કોર્ટમાં જવા ઘરેથી નીકળ્યો હતો, પરંતુ ત્યારબાદ પરત ફર્યો નહોતો. ગઈકાલે તેનો મૃતદેહ મળી આવતાં પોલીસ અને પરિવારજનો દોડી ગયા હતા. પરિવારજનોના જણાવ્યા મુજબ, અશ્વિન ત્રણ ભાઈમાં નાનો હતો અને જસદણમાં હીરા ઘસવાનું કામ કરતો હતો. તેની પત્ની હેતલ એકાદ મહિના પહેલાં રિસામણે માવતરે જતી રહી હતી અને કોર્ટમાં કેસ કર્યો હતો. કોર્ટની મુદ્દતે અશ્વિન હાજર થયો હતો, પરંતુ તેની પત્ની હાજર રહી નહોતી. ત્યારબાદ તે સાસરીયે ગયો હોવાની પણ પરિવારને જાણ થઈ હતી. આ સમગ્ર ઘટનાક્રમ બાદ તેનો મૃતદેહ મળી આવતાં પરિવારે શંકા વ્યક્ત કરી હતી. યુવકે કોઈ ઝેરી પદાર્થ પી લીધો હોવાની આશંકા પણ વ્યક્ત કરવામાં આવી રહી છે. આટકોટ પોલીસે મૃતદેહને ફોરેન્સિક પોસ્ટમોર્ટમ માટે રાજકોટ ખસેડી મોતનું ચોક્કસ કારણ જાણવા તપાસ હાથ ધરી છે.
