ધોલેરામાં દેશનું પ્રથમ MICRO-LED યુનિટ બનશે
રૂ.3૯3૬ કરોડના બે સેમિકન્ડકટર પ્રોજેકટને કેન્દ્રની લીલીઝંડી : ૨૦૦૦થી વધારે યુવાનોને મળશે રોજગારી : સુરતમાં પણ સ્થપાશે પ્લાન્ટ
અગ્ર ગુજરાત, અમદાવાદ
વડાપ્રધાન નરેન્દ્ર મોદીની અધ્યક્ષતામાં મળેલી કેન્દ્રિય મંત્રીમંડળની બેઠકમાં ભારત સેમિકન્ડક્ટર મિશન હેઠળ ગુજરાત માટે બે મહત્વપૂર્ણ પ્રોજેક્ટને મંજૂરી આપવામાં આવી છે. કુલ 3,936 કરોડના આ રોકાણથી રાજ્યમાં સેમિકન્ડક્ટર અને ડિસ્પ્લે ટેક્નોલોજીના ક્ષેત્રે ઐતિહાસિક વિકાસનો માર્ગ ખુલ્યો છે. ધોલેરામાં દેશનું પહેલું GaN આધારિત Micro-LED યુનિટ બનશે. આ પ્રોજેક્ટોથી અંદાજે 2,200થી વધુ કુશળ યુવાનોને સીધી રોજગારી મળશે, જ્યારે પરોક્ષ રીતે હજારો રોજગાર તકો સર્જાશે.
જ્યારે ગુજરાતની સુચી સેમિકોન પ્રા.લિ. દ્વારા સુરત ખાતે સેમિકન્ડક્ટર પેકેજિંગ અને ટેસ્ટિંગ (OSAT) યુનિટ સ્થાપવામાં આવશે. આ આધુનિક પ્લાન્ટમાં દર વર્ષે 100 કરોડથી વધુ ચિપ્સના પેકેજિંગ અને ટેસ્ટિંગ કરવાની ક્ષમતા રહેશે, જેમાં પાવર અને એનાલોગ સેમિકન્ડક્ટર ચિપ્સનો સમાવેશ થાય છે. ઓટોમોબાઈલ, ઈલેક્ટ્રોનિક્સ અને ઔદ્યોગિક ક્ષેત્ર માટે ઉપયોગી આ ચિપ્સનું ઉત્પાદન “મેક ઇન ઇન્ડિયા” અભિયાનને બળ આપશે તેમજ પ્રદેશમાં રોજગારના નવા અવસર ઊભા કરશે.
કેન્દ્ર સરકારના મહત્ત્વાકાંક્ષી ઇન્ડિયા સેમિકંડકટર મિશન હેઠળ મંજૂર થયેલા આ પ્રોજેક્ટોમાંથી એક પ્રોજેક્ટ ક્રિસ્ટલ મેટ્રીક લિમિટેડ દ્વારા ગુજરાતના ધોલેરા ખાતે સ્થાપિત કરવામાં આવશે. ધોલેરા સ્પેશિયલ ઇન્વેસ્ટમેન્ટ રીજન (SIR)માં આવનારો આ યુનિટ રાજ્યને ગ્લોબલ સેમિકન્ડક્ટર મેપ પર મજબૂત સ્થાન અપાવશે.
આ પ્રોજેક્ટ અંતર્ગત કમ્પાઉન્ડ સેમિકન્ડક્ટર ફેબ્રિકેશન, એસેમ્બલી અને ટેસ્ટિંગની સુવિધાઓ ઉભી કરવામાં આવશે. ખાસ કરીને ગેલિયમ નાઇટ્રાઇડ (GaN) આધારિત મિની અને માઇક્રો-એલઇડી ડિસ્પ્લે મોડ્યુલોનું ઉત્પાદન કરવામાં આવશે, જે ભારત માટે પ્રથમ વ્યાવસાયિક પહેલ ગણાશે. GaN ટેક્નોલોજી વધુ કાર્યક્ષમ, ઊંચી બ્રાઇટનેસ અને ઓછી ઉર્જા વપરાશ માટે જાણીતી છે, જેના કારણે તે ભવિષ્યની ડિસ્પ્લે ટેક્નોલોજીમાં મહત્વપૂર્ણ સ્થાન ધરાવે છે.
ધોલેરાના પ્લાન્ટની ઉત્પાદન ક્ષમતા અંગે વાત કરીએ તો, આ યુનિટ દર વર્ષે આશરે 72,000 ચોરસ મીટર જેટલા અદ્યતન ડિસ્પ્લે પેનલનું ઉત્પાદન કરશે. સાથે જ 24,000 સેટ GaN એપિટેક્સી વેફર્સ પણ તૈયાર કરવામાં આવશે. આ ઉત્પાદનોનો ઉપયોગ ટેલિવિઝન, સ્માર્ટફોન, ઓટોમોબાઇલ ડિસ્પ્લે, ડિજિટલ સાઇનેજ ઉપરાંત એક્સ્ટેન્ડેડ રિયાલિટી (XR), ઓગમેન્ટેડ રિયાલિટી (AR), વર્ચ્યુઅલ રિયાલિટી (VR) અને સ્માર્ટ વેરેબલ્સ જેવા નવા યુગના ઉપકરણોમાં થશે.
વિશેષજ્ઞોના મત મુજબ, આ પ્રોજેક્ટ ભારતને ઇલેક્ટ્રોનિક્સ અને સેમિકન્ડક્ટર ક્ષેત્રે આયાત પરની નિર્ભરતા ઘટાડવામાં મદદરૂપ બનશે અને દેશને “આત્મનિર્ભર ભારત” અભિયાન તરફ આગળ ધપાવશે. સાથે જ ગુજરાતમાં પહેલેથી જ ઉભી થઈ રહેલી સેમિકન્ડક્ટર ઇકોસિસ્ટમ જેમ કે ધોલેરા SIRમાં વિકસતી સુવિધાઓને આ પ્રોજેક્ટથી વધુ વેગ મળશે.
રાજ્ય સરકાર અને કેન્દ્ર સરકારના સંયુક્ત પ્રયાસોથી ગુજરાત હવે માત્ર મેન્યુફેક્ચરિંગ હબ નહીં પરંતુ હાઈ-ટેક ઇનોવેશન સેન્ટર તરીકે ઉભરી રહ્યું છે. આ નિર્ણયથી વૈશ્વિક રોકાણકારોમાં પણ વિશ્વાસ વધશે અને આગામી સમયમાં વધુ મોટી ટેક કંપનીઓ ગુજરાત તરફ આકર્ષાય તેવી શક્યતા છે.
