વડોદરા નજીક ટ્રક પાછળ ટ્રાવેલ્સ ઘૂસી છ મુસાફરના મોત

વડોદરા નજીક ટ્રક પાછળ ટ્રાવેલ્સ ઘૂસી છ મુસાફરના મોત

રાજસ્થાનના બાસવાડાથી સુરત જતી બસનો અકસ્માત સર્જાયો : 3૧થી વધારે લોકો ગંભીર રીતે ઘાયલ : SDRF, NDRF અને પોલીસ સહિતના કાફલા દ્વારા બચાવ કામગીરી : વહેલી સવારે ૪ વાગ્યે બનેલી કરૂણાંતિકા

અગ્ર ગુજરાત, વડોદરા

વડોદરા શહેરના કોટંબી સ્ટેડિયમ નજીક આજે(17 જૂન) વહેલી સવારે 4 વાગ્યા આસપાસ રોડ પર ઉભેલી એક ટ્રક પાછળ લક્ઝરી બસ ધડાકાભેર અથડાતા ભયાનક અકસ્માત સર્જાયો હતો. આ અકસ્માતમાં 6ના મોત થયા જેમાં એક નવ વર્ષના બાળકનો પણ સમાવેશ થાય છે. તથા 31 લોકો ઈજાગ્રસ્ત થતા તેમને સારવાર માટે વડોદરાની એસએસજી હોસ્પિટલમાં ખસેડાયા છે.

બાલાજી ટ્રાવેલ્સની લક્ઝરી બસ રાજસ્થાનના બાસવાડાથી સુરત જતી હતી તે દરમિયાન વડોદરામાં આ અકસ્માત સર્જાયો હતો. બસમાં અનેક મુસાફરો ફસાયાની માહિતી મળતા જ બચાવ કામગીરી યુદ્ધના ધોરણે શરૂ કરવામાં આવી હતી.

SDRF, NDRF અને વડોદરા ફાયર વિભાગની ટીમોએ ઘટનાસ્થળે પહોંચી ઘાયલોને બહાર કાઢવા માટે રેસ્ક્યૂ ઓપરેશન ચલાવ્યું હતું. બાદમાં ટ્રક અને લક્ઝરી હટાવી રોડ ક્લિયર કરાયો હતો. ઈજાગ્રસ્ત પ્રવાસી બંસીલાલે જણાવ્યું હતું કે તે રાજસ્થાનથી સુરત કામ અર્થે જઈ રહ્યો હતો. વહેલી સવારે તે સૂતો હતો તે દરમિયાન આ અકસ્માત થયો હતો. અકસ્માત થયો ત્યારે કરંટ લાગ્યો હોય તેવો અનુભવ થયો હતો. તેની સાથે બસમાં અન્ય બે યુવકો પણ હતા.

કમાન્ડન્ટ NDRFના 6 બટાલિયન કમાન્ડન્ટ સુરેન્દ્રસિંઘે જણાવ્યું હતું કે આજે સવારે 4:40 વાગ્યે કંટ્રોલ રૂમમાં માહિતી મળી હતી કે કોટંબી સ્ટેડિયમ પાસે એક બસ અને ટ્રક વચ્ચે અકસ્માત થયો છે. માહિતી મળતા જ NDRFની ટીમ ઘટનાસ્થળે જવા રવાના થઈ હતી. ત્યાં પહોંચીને જોયું તો એક પેસેન્જર બસ અને ટ્રક વચ્ચે જોરદાર ટક્કર થઈ હતી. ટીમે કટીંગ ટુલ્સ અને અન્ય અદ્યતન સાધનોનો ઉપયોગ કરીને તુરંત જ બચાવ કામગીરી શરૂ કરી દીધી હતી. આ ઓપરેશનમાં અત્યાર સુધી 24 લોકોને સુરક્ષિત રીતે બચાવી લેવામાં આવ્યા છે, જ્યારે 5 મૃતદેહોને બહાર કાઢીને હોસ્પિટલ ખસેડવામાં આવ્યા છે. હાલમાં ટીમ દ્વારા તપાસ કરવામાં આવી રહી છે કે હજુ પણ કોઈ અંદર ફસાયેલું છે કે નહીં. આ ચકાસણી પૂર્ણ થયા બાદ ઓપરેશન પૂરું કરવામાં આવશે. ટીમની સાથે ડૉક્ટર અને એમ્બ્યુલન્સ પણ હાજર હતા, જેથી ઘાયલોને તાત્કાલિક પ્રાથમિક સારવાર આપી હોસ્પિટલ પહોંચાડી શકાયા. NDRFની 2 ટીમો ઉપરાંત SDRF, સિવિલ પોલીસ અને ફાયર સર્વિસની ટીમો પણ આ બચાવ કામગીરીમાં સાથે મળીને કામ કરી રહી હતી.

મૃતકોના નામ

• વિનોદ નરેશ ડામોર (ઉં. 30 વર્ષ)
• મુકેશ જીવાજી ડિંડોર (ઉં. 34 વર્ષ)
• પ્રીત હિતેશ ભાટિયા (ઉં. 9 વર્ષ)
• મહેન્દ્રકુમાર ભોગીલાલ પંડ્યા (ઉં. 68 વર્ષ)
• પિંકી ભાટિયા
• અજાણ્યા પુરુષની ઓળખ બાકી