ચોટીલા નજીક કારમાંથી 211 બોટલ વિદેશી દારૂ સાથે સુરતનું દંપતી અને પુત્ર ઝડપાયા
પરિવારની આડમાં દારૂની હેરાફેરીનો પર્દાફાશ કરતી રેન્જ આજીની ટીમ ; રાજસ્થાનથી દારૂ લાવી ગોંડલમાં સપ્લાય થવાનો હતો
અગ્ર ગુજરાત, રાજકોટ
ગુજરાતમાં દારૂબંધી હોવા છતાં બુટલેગરો દ્વારા દારૂની હેરાફેરી માટે રોજ નવા રસ્તા અપનાવવામાં આવી રહ્યા છે. ક્યાંક લક્ઝરી વાહનોનો ઉપયોગ થાય છે તો ક્યાંક પરિવાર સાથે મુસાફરીના બહાને પોલીસને ગેરમાર્ગે દોરવાનો પ્રયાસ થાય છે. આવી જ એક ચાલાકીનો પર્દાફાશ રાજકોટ રેન્જ પોલીસની ટીમે ચોટીલા નજીક કર્યો છે. પીયાવા ગામ પાસે પોલીસે એક કારમાંથી વિદેશી દારૂની 211 બોટલો ઝડપી પાડી સુરતના દંપતી અને તેમના પુત્રની અટકાયત કરી હતી. પોલીસે દારૂ, કાર અને મોબાઈલ ફોન મળી કુલ રૂ.3.25 લાખથી વધુનો મુદ્દામાલ કબ્જે કરી આગળની કાર્યવાહી હાથ ધરી છે.
મળતી માહિતી મુજબ રાજકોટ રેન્જ આઈજી નિર્લિપ્ત રાય દ્વારા ગેરકાયદેસર પ્રવૃત્તિઓ અને ખાસ કરીને દારૂની હેરાફેરી અટકાવવા માટે તમામ ટીમોને સઘન ચેકિંગ અને વોચ રાખવાની સૂચનાઓ આપવામાં આવી છે. તે અનુસંધાને રાજકોટ રેન્જની ટીમ સતત હાઈવે અને સંવેદનશીલ વિસ્તારોમાં પેટ્રોલિંગ કરી રહી હતી. દરમિયાન પીએસઆઈ બી.સી. મીયાત્રા અને તેમની ટીમને ચોક્કસ બાતમી મળી હતી કે એક શંકાસ્પદ કારમાં વિદેશી દારૂનો જથ્થો લઈ જવાઈ રહ્યો છે. બાતમીના આધારે પોલીસ દ્વારા ચોટીલા તાલુકાના પીયાવા ગામ નજીક વોચ ગોઠવવામાં આવી હતી. થોડા સમય બાદ GJ-21-BC-1182 નંબરની કાર ત્યાંથી પસાર થતાં પોલીસે તેને રોકી તપાસ હાથ ધરી હતી. કારમાં એક પુરુષ, તેની પત્ની અને પુત્ર મુસાફરી કરતા હોવાથી પ્રથમ નજરે પરિવાર પ્રવાસ પર નીકળ્યો હોય તેવી સ્થિતિ લાગી હતી. જોકે પોલીસને મળેલી બાતમીને આધારે ટીમે કારની ઝીણવટભરી તપાસ શરૂ કરી હતી.
તપાસ દરમિયાન કારના અલગ અલગ ભાગોમાં અને ગુપ્ત ખાનાઓમાં સંતાડીને રાખવામાં આવેલી વિદેશી દારૂની બોટલો મળી આવતા પોલીસ પણ ચોંકી ઉઠી હતી. પોલીસે ગણતરી કરતાં કુલ 211 બોટલો મળી આવી હતી, જેની અંદાજિત કિંમત રૂ.1.46 લાખ હોવાનું સામે આવ્યું છે. પોલીસે દારૂ ઉપરાંત કાર અને મોબાઈલ ફોન પણ કબ્જે કર્યા હતા. આમ કુલ રૂ.3,25,242નો મુદ્દામાલ જપ્ત કરવામાં આવ્યો છે.
આ કેસમાં પોલીસે સુરતના હરિઓમનગર વિસ્તારમાં રહેતા સોહનરામ ગણેશરામ પરમાર, તેની પત્ની રેખાબેન અને પુત્ર કુણાલ પરમારની અટકાયત કરી હતી. પૂછપરછ દરમિયાન બહાર આવ્યું હતું કે આ દારૂનો જથ્થો રાજસ્થાનના હરીશ મેવાડા નામના શખ્સે મોકલાવ્યો હતો. જ્યારે ગોંડલના વિશાલ નામના શખ્સે આ જથ્થો મંગાવ્યો હોવાનું પણ સામે આવ્યું છે. હાલ બંને મુખ્ય સૂત્રધારોને શોધવા માટે પોલીસ દ્વારા અલગ અલગ દિશામાં તપાસ હાથ ધરવામાં આવી છે.
પોલીસ સૂત્રોના જણાવ્યા મુજબ, છેલ્લા કેટલાક સમયથી દારૂની હેરાફેરીમાં પરિવારનો ઉપયોગ કરીને પોલીસને શંકાથી દૂર રાખવાના પ્રયાસો વધી રહ્યા છે. મહિલા અને બાળકો સાથે વાહનમાં મુસાફરી કરવાથી ચેકિંગ દરમિયાન સરળતાથી પસાર થઈ જવાય તેવી બુટલેગરોની માન્યતા હોય છે, પરંતુ રાજકોટ રેન્જ પોલીસની સતર્કતાને કારણે આ આખો કારસો નિષ્ફળ ગયો હતો.ચોટીલા પોલીસ મથકે આરોપીઓ સામે પ્રોહિબિશન એક્ટ હેઠળ ગુનો નોંધી વધુ તપાસ શરૂ કરવામાં આવી છે. પોલીસે જપ્ત કરાયેલા મોબાઈલ ફોનના કોલ ડિટેઈલ્સ તેમજ અન્ય ડિજિટલ પુરાવાઓના આધારે દારૂના નેટવર્ક સુધી પહોંચવા માટે કાર્યવાહી તેજ કરી છે. સાથે જ રાજસ્થાનથી સૌરાષ્ટ્ર સુધી કાર્યરત સપ્લાય ચેઈન અંગે પણ માહિતી એકત્ર કરવામાં આવી રહી છે.
આ સમગ્ર કાર્યવાહી રાજકોટ રેન્જ પીઆઈ અપૂર્વ પટેલના માર્ગદર્શન હેઠળ પાર પાડવામાં આવી હતી. જેમાં પીએસઆઈ પી.એન. મોરી, બી.સી. મીયાત્રા, સી.એમ. કાંટેલીયા, એએસઆઈ વકારભાઈ આરબ, હેડ કોન્સ્ટેબલ રસીકભાઈ પટેલ તેમજ કોન્સ્ટેબલ નિકુલભાઈ પંપાણીયા, ફતેસિંહ પરમાર, સાહીલભાઈ ખોખર અને દેવશીભાઈ સહિતની ટીમે મહત્વપૂર્ણ ભૂમિકા ભજવી હતી.
