રાજયમાં રૂ.૬૨૨ કરોડના સાયબર કૌભાંડમાં પોલીસે વધુ આઠ આરોપીની કરી ધરપકડ
મ્યુલહન્ટ અંતર્ગત અત્યાર સુધીમાં ૪૦ આરોપીની અટકાયત : ૧૦3૯ સાયબર ફ્રોડની ફરિયાદમાં પોલીસની લાલ આંખ
અગ્ર ગુજરાત, અમદાવાદ
ડિજિટલ યુગમાં વધતા જતા સાયબર અપરાધો સામે ગુજરાત પોલીસની સી.આઈ.ડી. ક્રાઇમ (સાયબર સેન્ટર ઓફ એક્સલન્સ)એ લાલ આંખ કરી છે. રાજ્યના પોલીસ મહાનિદેશક (સી.આઇ.ડી. ક્રાઇમ અને રેલ્વેઝ) ડો. કે. લક્ષ્મીનારાયણ રાવ અને પોલીસ મહાનિરીક્ષક બિપીન આહિરેની સીધી સૂચનાથી હાથ ધરવામાં આવેલા ‘ઓપરેશન મ્યુલ હન્ટ ૨.૦’ અંતર્ગત સાયબર ક્રાઇમ ઇતિહાસની એક મોટી સફળતા મળી છે. પોલીસે 622 કરોડના કૌભાંડમાં વધુ 8 આરોપીઓની ધરપકડ કરી છે. આ સાથે જ આ કૌભાંડમાં ઝડપાયેલ આરોપીઓનો આંક 40 પર પહોંચ્યો છે.
પોલીસ અધિક્ષક ડો. રાજદીપસિંહ ઝાલા, સંજયકુમાર કેશવાલા અને વિવેક ભેડાના માર્ગદર્શન હેઠળની ટીમે સુરત, ભાવનગર, રાજકોટ અને ઉંઝા ખાતે દરોડા પાડી વધુ 8 રીઢા ગુનેગારોની ધરપકડ કરી છે. સાયબર સેન્ટર ઓફ એક્સલન્સ, ગાંધીનગર દ્વારા છેલ્લા એક મહિનામાં હાથ ધરવામાં આવેલી સઘન કામગીરીમાં ચોંકાવનારા આંકડા જણાયા છે. જેમાં સાયબર ફ્રોડની 1039 ફરિયાદમાં કૂલ 622 કરોડનું સાયબર ફ્રોડ કરવામાં આવ્યું હતું. જેમાં કૂલ 40 આરોપીઓની ધરપકડ કરવામાં આવી છે. પોલીસે આરોપીઓની મોડેસ ઓપરેન્ડી અંગે કહ્યું હતું કે, આરોપીઓ કમિશનની લાલચ આપી અન્ય લોકોના નામે અથવા બોગસ પેઢીઓના નામે ‘મ્યુલ એકાઉન્ટ’ ખોલાવતા હતા.
સાયબર ફ્રોડના નાણાં આ ખાતાઓમાં જમા કરાવી, ત્યારબાદ તેને રોકડમાં રૂપાંતરિત કરી આંગડીયા મારફતે સગેવગે કરવામાં આવતા હતા. તપાસમાં ઓનલાઇન ફાઇનાન્સ ફ્રોડ, રોકાણ ફ્રોડ, અને UPI સંબંધિત છેતરપિંડી જેવી પદ્ધતિઓ ખૂલી છે.
આ કૌભાંડમાં સીઆઇડી ક્રાઇમે મુકેશ દેવાભાઇ મેર (ભાવનગર), ફરદિનખાન નાસીરખાન પઠાણ (ભાવનગર), અક્ષય મહેન્દ્રભાઈ પટેલ (ઊંઝા), દેવેન્દ્ર કાંતિભાઇ પટેલ (ઉંઝા), ચેતન નારણભાઈ અમલાણી (રાજકોટ) જતીન પ્રફુલભાઈ કક્કડ (રાજકોટ), કપિલ ભાઈ સુરેશભાઈ કોટક (રાજકોટ) અને મહેન્દ્ર ભાઈ માધવજીભાઈ કોકિયા (રાજકોટ)નો સમાવેશ થાય છે. નોંધનીય છે કે, આ સમગ્ર ઓપરેશનમાં સી.આઈ.ડી. ક્રાઇમના પી.આઈ. વૈભવ જોટાણિયા, કુલદીપ પરમાર અને તેમની આખી ટેક્નિકલ ટીમ દ્વારા સરાહનીય કામગીરી કરવામાં આવી છે.
પોલીસની જાહેર જનતાને સાવચેતીની અપીલ
કોઈપણ લાલચમાં આવીને પોતાના બેંક ખાતાની વિગતો અન્યને આપવી નહીં. તમારા ખાતામાં આવતા દરેક નાણાં માટે તમે પોતે જવાબદાર છો, તેથી કમિશનના મોહમાં પડી ગુનાનો ભાગ ન બનો. જો તમે સેક્ટોર્શન, મોર્ફ ફોટો કે ન્યુડ વીડિયો કોલના શિકાર બનો, તો ડર્યા વગર ૧૯૩૦ નંબર પર સંપર્ક કરો. પોલીસ તમારી ઓળખ ગુપ્ત રાખી મદદ કરશે.
