શાપરના પડવલા ગામેથી ઉત્તરપ્રદેશનો ગેંગસ્ટર ઝડપાયો

શાપરના પડવલા ગામેથી ઉત્તરપ્રદેશનો ગેંગસ્ટર ઝડપાયો

ગેંગસ્ટર એક્ટ હેઠળ નોંધાયેલા ગુનામાં એક વર્ષથી ફરાર હતો આરોપી, ઓળખ છુપાવી ઇન્ડસ્ટ્રીયલ વિસ્તારમાં રહેતો હતો

અગ્ર ગુજરાત, રાજકોટ

રાજકોટ જિલ્લાના શાપર વિસ્તારમાંથી ઉત્તરપ્રદેશના કુખ્યાત ગેંગસ્ટર મુકેશ મૌર્યની ધરપકડ થતા પોલીસ તંત્રમાં ચકચાર મચી ગઈ છે. ઉત્તરપ્રદેશમાં ગેંગસ્ટર એન્ડ એન્ટી સોશિયલ એક્ટિવિટી એક્ટ હેઠળ ગુનો નોંધાયા બાદ આરોપી છેલ્લા એક વર્ષથી ફરાર હતો અને ધરપકડથી બચવા માટે રાજકોટ જિલ્લાના પડવલા ગામે પોતાની ઓળખ છુપાવીને રહેતો હોવાનું સામે આવ્યું છે. શાપર પોલીસે ચોક્કસ બાતમીના આધારે કાર્યવાહી કરીને આરોપીને ઝડપી પાડી હવે તેને ઉત્તરપ્રદેશ પોલીસના હવાલે કરવા માટેની કાનૂની પ્રક્રિયા હાથ ધરી છે.
મળતી માહિતી મુજબ રાજકોટ જિલ્લા પોલીસ વડા વિજયસિંહ ગુર્જરે નાસતા ફરતા અને ગંભીર ગુનાઓમાં સંડોવાયેલા આરોપીઓને ઝડપી પાડવા માટે તમામ પોલીસ મથકોને ખાસ સૂચનાઓ આપી હતી. જેના પગલે શાપર પોલીસ મથકના પીઆઈ આર.બી. રાણા અને તેમની ટીમ દ્વારા સતત પેટ્રોલિંગ તેમજ ગુપ્ત બાતમીદારો મારફતે માહિતી એકત્ર કરવાની કામગીરી ચાલી રહી હતી. આ દરમિયાન શાપર પોલીસની સર્વેલન્સ ટીમ પેટ્રોલિંગમાં હતી ત્યારે હેડ કોન્સ્ટેબલ દિનેશભાઈ ખાટરીયાને એક મહત્વપૂર્ણ બાતમી મળી હતી. બાતમી મુજબ ઉત્તરપ્રદેશમાં ગેંગસ્ટર એક્ટ હેઠળ નોંધાયેલા ગુનામાં ફરાર જાહેર કરાયેલ એક આરોપી હાલ શાપર નજીકના પડવલા ગામના ઇન્ડસ્ટ્રીયલ વિસ્તારમાં ખોટી ઓળખ સાથે રહે છે અને સ્થાનિક કારખાનામાં કામકાજ કરતો હોવાનું જાણવા મળ્યું હતું.
બાતમીના આધારે પોલીસે તાત્કાલિક ટેક્નિકલ સર્વેલન્સ અને હ્યુમન સોર્સની મદદથી માહિતીની ખરાઈ શરૂ કરી હતી. લાંબા સમય સુધી ગુપ્ત દેખરેખ રાખ્યા બાદ પોલીસે પડવલા ઇન્ડસ્ટ્રીઝ વિસ્તારમાં દરોડો પાડી આરોપી મુકેશ નંગેભાઈ મૌર્યને ઝડપી પાડ્યો હતો. આરોપી હાલ પડવલા ગામે રોટેક પંપ કારખાનાની પાછળના વિસ્તારમાં રહેતો હતો, જ્યારે તેનું મૂળ વતન ઉત્તરપ્રદેશના બલરામપુર જિલ્લાના ગંગાપુર તુલસીપુર વિસ્તારમાં હોવાનું સામે આવ્યું છે. પોલીસ તપાસમાં સામે આવ્યું છે કે મુકેશ મૌર્ય અને તેની ગેંગ સામે ઉત્તરપ્રદેશમાં હત્યા, હુમલો, ધાકધમકી, ગેરકાયદે હથિયારો અને અન્ય ગંભીર પ્રકારના મળી કુલ 19થી વધુ ગુનાઓ નોંધાયેલા છે. આરોપીની ગુનાહિત પ્રવૃત્તિઓને ધ્યાનમાં રાખી ગયા વર્ષે તેના અને તેની ગેંગ વિરુદ્ધ ગેંગસ્ટર એન્ડ એન્ટી સોશિયલ એક્ટિવિટી એક્ટ હેઠળ કાર્યવાહી કરવામાં આવી હતી. ત્યારબાદથી આરોપી સતત સ્થળ બદલતો રહ્યો હતો અને આખરે રાજકોટ જિલ્લામાં આવીને આશરો લીધો હતો. પ્રાથમિક તપાસમાં એવું પણ સામે આવ્યું છે કે આરોપી સ્થાનિક લોકોમાં ભળી જવા માટે પોતાની ઓળખ છુપાવી સામાન્ય મજૂર તરીકે રહેતો હતો. તેણે કોઈને પોતાના ગુનાહિત ભૂતકાળ અંગે જાણ ન થાય તે માટે ખૂબ સાવચેતી રાખી હતી. જોકે પોલીસની ટેક્નિકલ તપાસ અને સતત દેખરેખને કારણે આખરે તેનો ભાંડો ફૂટ્યો હતો.
શાપર પોલીસની આ કામગીરીને મહત્વપૂર્ણ સફળતા માનવામાં આવી રહી છે, કારણ કે એક વર્ષથી ફરાર રહેલો ગેંગસ્ટર ગુજરાતમાં આશરો લઈ રહ્યો હતો. પોલીસે આરોપીની ધરપકડ બાદ તેની વધુ પૂછપરછ શરૂ કરી છે. સાથે જ તે ગુજરાતમાં અન્ય કોઈ ગુનાહિત પ્રવૃત્તિમાં સંડોવાયેલો હતો કે નહીં તેમજ અહીં તેને આશરો કોણે આપ્યો હતો તે દિશામાં પણ તપાસ હાથ ધરવામાં આવી છે. હાલ આરોપીને કાયદેસરની કાર્યવાહી પૂર્ણ કર્યા બાદ ઉત્તરપ્રદેશની તુલસીપુર પોલીસના હવાલે સોંપવાની તજવીજ શરૂ કરવામાં આવી છે. સમગ્ર ઓપરેશનમાં શાપર પોલીસની સર્વેલન્સ ટીમ, સ્થાનિક પોલીસ સ્ટાફ તેમજ ટેક્નિકલ ટીમે મહત્વપૂર્ણ ભૂમિકા ભજવી હોવાનું જાણવા મળ્યું છે.