મુસાફરોના ખિસ્સા હળવા થશે! રેલવે સ્ટેશનો પર મળતા નાસ્તાઓમાં મોંઘવારી

મુસાફરોના ખિસ્સા હળવા થશે! રેલવે સ્ટેશનો પર મળતા નાસ્તાઓમાં મોંઘવારી

વડાપાંઉ, સમોસા, સાંભાર, ઇડલી સહિતની ખાદ્યચીજોના ભાવમાં વધારો : મધ્યમ વર્ગને વધુને વધુ ડોઝ મળશે : તા.૧ જૂનથી અમલવારી

અગ્ર ગુજરાત, રાજકોટ

ઇન્ડિયન રેલવેના રેલવે સ્ટેશનો પર ચાલતા કેટરિંગ સ્ટોલ્સના ખાદ્ય પદાર્થોના ભાવમાં મહત્વપૂર્ણ ફેરફાર કરવામાં આવ્યા છે. 1 જૂનથી લાગુ થનારી નવી દર યાદી મુજબ વડાપાંવ, સમોસા, મસાલા ઢોસા સહિત અનેક નાસ્તાના ભાવમાં વધારો થશે, જેના કારણે મુસાફરોના રોજિંદા ખર્ચમાં વધારો થવાનો છે.

નવી સૂચિ અનુસાર વડાપાંવનો ભાવ 15 રૂપિયાથી વધીને 20 રૂપિયા, સમોસાનો ભાવ 12 રૂપિયાથી વધીને 20 રૂપિયા અને રગડા પાંવનો ભાવ 20 રૂપિયાથી વધીને 25 રૂપિયા સુધી પહોંચશે. આ વધારો ખાસ કરીને સ્ટેશન પર નિયમિત મુસાફરી કરતા મુસાફરો માટે નોંધપાત્ર ગણાય છે, કારણ કે આ નાસ્તા સૌથી વધુ વેચાતા આઇટમ્સમાં સામેલ છે.

નવા દર મુજબ પાવભાજી અને વેજ પિઝા જેવા લોકપ્રિય ફાસ્ટ ફૂડના ભાવમાં પણ સુધારો કરવામાં આવ્યો છે. મસાલા ઢોસો હવે 35 રૂપિયામાં ઉપલબ્ધ રહેશે, જ્યારે સાંભાર અથવા ચટણી સાથે ઇડલીના બે પીસ 30 રૂપિયામાં મળશે. આ ફેરફારો દક્ષિણ ભારતીય અને સ્ટ્રીટ ફૂડ બંને પ્રકારના નાસ્તા પર અસર કરશે.

ઇન્ડિયન રેલવેએ સ્પષ્ટ કર્યું છે કે ભાવ વધારા સાથે ખાદ્ય પદાર્થોની ગુણવત્તામાં સુધારો કરવામાં આવશે. તમામ સ્ટોલ પર દ્વિભાષી ભાવ યાદી લગાવવી ફરજિયાત રહેશે અને વધુ વસૂલી અથવા ગુણવત્તા સંબંધિત ફરિયાદો પર નિયમિત નિરીક્ષણ કરવામાં આવશે, જેથી મુસાફરોને યોગ્ય સેવા મળી રહે.

યથાવત રહેલા ભાવ

જોકે તમામ વસ્તુઓ મોંઘી થઈ નથી. મિસલ પાંવ 35 રૂપિયા, કચોરી 15 રૂપિયા અને દાબેલી 20 રૂપિયામાં અગાઉના દર મુજબ જ ઉપલબ્ધ રહેશે. ઉપરાંત જ્યુસ અને સોડાના ભાવમાં પણ કોઈ ફેરફાર કરવામાં આવ્યો નથી, જેથી કેટલીક વસ્તુઓ મુસાફરો માટે હજી પણ સમાન દરે ઉપલબ્ધ રહેશે.

ઇંધણના વધેલા ભાવની અસર

રેલવે અધિકારીઓના જણાવ્યા મુજબ દેશમાં વધતી મોંઘવારી, એલપીજી અને ઇંધણના વધતા ભાવને ધ્યાનમાં રાખીને આ નિર્ણય લેવામાં આવ્યો છે. સાથે જ મુસાફરોને વધુ સારી ગુણવત્તાની સેવા આપવા માટે ભાવ સુધારો જરૂરી ગણાયો છે. આ નિર્ણયથી સ્ટોલ સંચાલકોના ખર્ચમાં સંતુલન લાવવાનો પ્રયાસ કરવામાં આવ્યો છે.