નર્સિંગ વિદ્યાર્થીનીને સરધારમાં બંધક બનાવી દુષ્કર્મ, છોડવા માટે પિતા પાસે 20 લાખની ખંડણી મંગાઈ
કચ્છની વિદ્યાર્થીનીને પરિચયનો લાભ લઈ સરધાર લઈ જઈ આચરવામાં આવ્યું કાંડ ; પરિવારજનો અને જિલ્લા પંચાયત સભ્યના પતિ સામે ગુનો નોંધાયો
અગ્ર ગુજરાત, રાજકોટ
કચ્છ જિલ્લાના રાપર પંથકની 20 વર્ષીય યુવતીને રાજકોટમાં પરિચિત યુવાન દ્વારા બંધક બનાવી તેની સાથે દુષ્કર્મ આચરવામાં આવ્યું હોવાના ગંભીર આક્ષેપો સામે આવ્યા છે. એટલું જ નહીં, યુવતીને મુક્ત કરવા બદલ રૂ.20 લાખની માંગણી કરવામાં આવી હોવાનો પણ આરોપ છે. સમગ્ર મામલે આજીડેમ પોલીસ મથકમાં દુષ્કર્મ, ખંડણી, ધમકી અને અન્ય ગંભીર કલમો હેઠળ ગુનો નોંધાતા તપાસનો ધમધમાટ શરૂ થયો છે.
ફરિયાદ મુજબ યુવતી અગાઉ રાજકોટમાં ધોરણ-12નો અભ્યાસ કરતી હતી. તે દરમિયાન રાજપરા વિસ્તારના રહેવાસી રામ છૈયા સાથે તેની ઓળખાણ થઈ હતી. યુવતીના જણાવ્યા અનુસાર, રામ તેને સતત સંપર્કમાં રહેવાનો પ્રયાસ કરતો હતો, જોકે ત્યારબાદ તેણી ધ્રોલ ખાતે નર્સિંગનો અભ્યાસ કરવા જતી રહી હતી. બે વર્ષનો અભ્યાસ પૂર્ણ કર્યા બાદ તે પોતાના વતન કચ્છ પરત ફરી હતી.
યુવતીએ પોલીસને આપેલા નિવેદનમાં જણાવ્યું છે કે, જાન્યુઆરી મહિનામાં નર્સિંગનું પરિણામ મેળવવા માટે તે ધ્રોલ ગઈ હતી. ત્યાંથી બહાર નીકળતાં જ આરોપી રામ કાર લઈને આવ્યો હતો અને બળજબરીપૂર્વક તેને વાહનમાં બેસાડી હતી. આ દરમિયાન કોરા કાગળો પર સહી કરાવવામાં આવી હતી તેમજ કેટલાક ફોટોગ્રાફ્સ પણ લેવામાં આવ્યા હતા. ત્યારબાદ તેને રાજકોટમાં ઉતારી દેવામાં આવી હતી.
મામલાનો વળાંક માર્ચ મહિનામાં આવ્યો હતો. ફરિયાદ મુજબ, યુવતી પોતાના બીમાર સગાંની મુલાકાત લેવા સામખીયારી જવા નીકળી હતી ત્યારે રસ્તામાં કારમાં આવેલા રામ અને તેના સાથીઓએ તેને રોકી લીધી હતી. તેનો મોબાઇલ ફોન કબજે કરી સંપર્ક તોડી નાખવામાં આવ્યો હતો. ત્યારબાદ યુવતીને નવાગામ (સરધાર) ખાતે લઈ જવામાં આવી હતી.
યુવતીનો આક્ષેપ છે કે તેને એક રૂમમાં ગોંધી રાખવામાં આવી હતી અને તેની ઇચ્છા વિરુદ્ધ વારંવાર શારીરિક સંબંધ બાંધવામાં આવ્યા હતા. આ દરમિયાન આરોપી રામ ઉપરાંત તેના પિતા મુકેશ અને ભાઈ શ્યામ દ્વારા પણ સતત દબાણ અને ધમકીઓ આપવામાં આવતી હતી. વિરોધ કરવાથી મારપીટ અને માનસિક ત્રાસ અપાતો હોવાનું પણ ફરિયાદમાં ઉલ્લેખાયું છે.
ફરિયાદમાં વધુ એક ચોંકાવનારો આરોપ એ છે કે આરોપીઓના સંબંધી અને જિલ્લા પંચાયત સભ્યના પતિ તરીકે ઓળખાતા રાજેશ ઉર્ફે રાજા ચાવડાએ યુવતીને ધમકાવી હતી. યુવતીના જણાવ્યા પ્રમાણે તેના માથા પર બંદૂક જેવું હથિયાર મૂકી પરિવાર પાસેથી રૂ.20 લાખ લાવવાની માંગણી કરવામાં આવી હતી. પૈસા નહીં મળે તો ક્યારેય મુક્ત નહીં કરવામાં આવે તેવી ધમકી પણ આપવામાં આવી હોવાનું જણાવાયું છે.
ઘટનાક્રમ દરમિયાન યુવતીને બહારની દુનિયા સાથે સંપર્ક સાધવાની કોઈ તક મળતી નહોતી. જોકે થોડા દિવસ પહેલાં તેને આરોપીનો મોબાઇલ હાથમાં આવતા તેણે સોશિયલ મીડિયા મારફતે પોતાના ભાઈનો નંબર મેળવ્યો હતો અને ગુપ્ત રીતે સંપર્ક સાધ્યો હતો. યુવતીએ પરિવારજનોને પોતાની સ્થિતિ વિશે જાણ કરતાં તેઓ તાત્કાલિક નવાગામ પહોંચી ગયા હતા.
પરિવારજનોએ આરોપી પક્ષ સાથે ચર્ચા કરી યુવતીને પરત સોંપવા વિનંતી કરી હતી, પરંતુ યુવતીના જણાવ્યા મુજબ આરોપીઓએ પૈસાની માંગણી જ ચાલુ રાખી હતી. અંતે યુવતીનો ભાઈ અને અન્ય સગાંઓએ જે રૂમમાં તેને રાખવામાં આવી હતી તેનો દરવાજો તોડી તેને બહાર કાઢી પોતાની સાથે લઈ ગયા હતા.
પ્રારંભિક તબક્કે ફરિયાદ કચ્છ જિલ્લાના આડેસર પોલીસ મથકમાં નોંધાઈ હતી. ઘટનાનો વિસ્તાર રાજકોટ સાથે સંકળાયેલો હોવાથી કેસને આજીડેમ પોલીસ મથકમાં ટ્રાન્સફર કરવામાં આવ્યો હતો. પોલીસે આરોપી રામ મુકેશ છૈયા, મુકેશ રાયધણ છૈયા, શ્યામ મુકેશ છૈયા અને રાજેશ ઉર્ફે રાજા ચાવડા સામે દુષ્કર્મ, ખંડણી, અપહરણ, ધમકી અને અન્ય સંબંધિત કલમો હેઠળ ગુનો નોંધી તપાસ શરૂ કરી છે.
પોલીસ સૂત્રોના જણાવ્યા મુજબ ફરિયાદમાં કરાયેલા આક્ષેપોની દરેક દિશામાં તપાસ કરવામાં આવી રહી છે. યુવતીના નિવેદનો, મોબાઇલ ફોનની વિગતો, સોશિયલ મીડિયા ચેટ્સ તેમજ અન્ય પુરાવાઓ એકત્રિત કરવાની કાર્યવાહી હાથ ધરવામાં આવી છે. સમગ્ર ઘટનાએ રાજકોટ અને કચ્છ બંને વિસ્તારોમાં ભારે ચર્ચા જગાવી છે અને હવે તપાસના પરિણામો પર સૌની નજર મંડાઈ છે.
