ભૂતપૂર્વ શિક્ષિકા પરના દુષ્કર્મ કેસમાં વોન્ટેડ વિદ્યાર્થી જામકંડોરણાથી ઝડપાયો
લગ્ન અને વિદેશમાં સ્થાયી થવાના વચનો આપી અઢી વર્ષ સુધી શારીરિક સંબંધો બાંધ્યાનો આરોપ; અશ્લીલ ફોટા વાયરલ કરવાના કેસમાં પણ સંડોવણી
અગ્ર ગુજરાત, રાજકોટ
રાજકોટ શહેરમાં પોતાની જ ભૂતપૂર્વ શિક્ષિકાને લગ્ન કરવાની અને ઓસ્ટ્રેલિયામાં સ્થાયી થવાની લાલચ આપી લાંબા સમય સુધી શારીરિક શોષણ કર્યાના આરોપસર ફરાર બનેલા યુવાનને ગાંધીગ્રામ પોલીસની સર્વેલન્સ સ્ક્વોડે જામકંડોરણાથી ઝડપી પાડ્યો છે. આરોપી સામે દુષ્કર્મ ઉપરાંત અંગત ફોટા અને વીડિયોનો દુરુપયોગ કરવાના ગંભીર ગુનાઓ પણ નોંધાયેલા હોવાનું સામે આવ્યું છે.
પોલીસના જણાવ્યા મુજબ, મવડી વિસ્તારમાં આવેલી સંસ્કાર સિટીમાં રહેતો ધ્રુવલ પંકજભાઈ દેસાઈ (ઉં.વ. 28) છેલ્લા અઢી મહિનાથી પોલીસ પકડથી દૂર રહેતો હતો. તેની શોધખોળ દરમિયાન ટેક્નિકલ સર્વેલન્સ અને ખાનગી બાતમીના આધારે તેનું લોકેશન જામકંડોરણા વિસ્તારમાં મળતાં પોલીસે તેને ઝડપી લીધો હતો.
આરોપી સામે નોંધાયેલા પ્રથમ ગુનામાં એક ડિવોર્સી શિક્ષિકાએ ફરિયાદ નોંધાવી હતી. ફરિયાદ મુજબ, ધોરણ-10માં પોતાનો વિદ્યાર્થી રહેલો ધ્રુવલ વર્ષો બાદ સોશિયલ મીડિયા મારફતે સંપર્કમાં આવ્યો હતો. ત્યારબાદ તેણે લગ્ન કરવાની અને વિદેશમાં સાથે વસવાટ કરવાની ખાતરી આપી વિશ્વાસ કેળવ્યો હતો. આ વિશ્વાસના આધારે અનેક વખત શારીરિક સંબંધો બાંધ્યા હોવાનો તેમજ ધંધામાં નુકસાન થયાનું કારણ આપી રોકડ રકમ, પીએફની બચત અને સોનાના દાગીના વેચાવી કુલ સાત લાખ રૂપિયાથી વધુની રકમ મેળવ્યાનો આક્ષેપ કરવામાં આવ્યો છે. ફરિયાદમાં વધુમાં જણાવાયું છે કે બાદમાં આરોપીએ લગ્ન કરવાનો ઇનકાર કરી દીધો હતો. જેથી પીડિતાએ તેની સામે દુષ્કર્મ સહિતની કલમો હેઠળ ફરિયાદ નોંધાવી હતી. આ ઉપરાંત ધ્રુવલ દેસાઈ સામે અન્ય એક કેસમાં યુવતીના અંગત ફોટા અને વીડિયોનો દુરુપયોગ કરી તેને ફરતા કરવાના તેમજ માહિતી પ્રૌદ્યોગિકી અધિનિયમની જોગવાઈઓ હેઠળ પણ ગુનો નોંધાયેલ છે.
બંને કેસોમાં વોન્ટેડ જાહેર થયેલા આરોપીને ઝડપી પાડ્યા બાદ પોલીસે કાયદેસરની કાર્યવાહી હાથ ધરી છે. આરોપીને કોર્ટમાં રજૂ કરી વધુ પૂછપરછ દરમિયાન અન્ય મહત્વની વિગતો બહાર આવે તેવી શક્યતા વ્યક્ત કરવામાં આવી રહી છે.
