વેકેશન પૂર્ણ! પ૪૦૦૦ શાળાનું પટાંગણ જીવંત બન્યું

જયાં વીણાવાદિની વસનારી એવી શાળા છે સુંદર મારી, પ્રાર્થનાના સુરે શોભનારી, એવી શાળા છે સુંદર મારી

વેકેશન પૂર્ણ! પ૪૦૦૦ શાળાનું પટાંગણ જીવંત બન્યું

દોઢ મહિનાથી સૂમસામ સ્કૂલોનો પરિસરમાં બાળકોની કિલ્લકારીઓ ગુંજી : પ્રથમ દિવસે કુમકુમ તિલક અને મોઢા મીઠા કરાવી બાળકોનું સ્વાગત

અભ્યાસનો બોઝ લાદવાના બદલે શિક્ષકોએ વિવિધ રમતો રમાડી છાત્રોને વાતાવરણ સાથે મેચ કરાવ્યા : બીજા સત્રનો પ્રારંભ

અગ્ર ગુજરાત, રાજકોટ

રાજકોટ સહિત રાજયભરની ૫૪૦૦૦ શાળાઓમાં વેકેશન પૂર્ણ થતાં નવા શૈક્ષણિક સત્રનો પ્રારંભ થયો છે. છેલ્લા દોઢ બે મહિનાથી સૂમસામ બનેલા સ્કૂલના પટાંગણો બાળકો અને છાત્રોની કિલકારીઓથી ફરી જીવંત બન્યા છે. આજે પ્રથમ દિવસે બાળકોનું કુમકુમ તિલક અને મોઢા મીઠા કરાવી સ્વાગત કરવામાં આવ્યું હતું. તેમજ પ્રથમ દિવસે અભ્યાસનો બોઝ નાખવાના બદલે વિવિધ રમતો રમાડી બાળકોને શાળાના વાતાવરણમાં ઢાળવાનો શિક્ષકો દ્વારા સરાહનીય પ્રયાસ કરાયો હતો.

વહેલી સવારથી જ વિદ્યાર્થીઓના સ્વાગત માટે આચાર્ય, શિક્ષકો સહિતનો સ્ટાફ ગેટની સામે ઊભો રહ્યો હતો. વિદ્યાર્થીઓને આવકાર સાથે કંકુ તિલક કરીને મોઢું મીઠું કરાવી આવકાર્યા હતાં. તો વિદ્યાર્થીઓએ પણ શિક્ષકોને પગે લાગી આશિર્વાર લીધા હતાં. સ્કૂલના પહેલાં દિવસે વિદ્યાર્થીઓમાં જુના અને નવા મિત્રોને મળવાને લઈ અલગ જ ખુશી જોવા મળી હતી. તો બીજી તરફ નાના ભૂલકાઓને વાલીઓ સ્કૂલ છોડીને જતાં બાળકો રડવા લાગ્યાં હતાં.

વિદ્યાર્થિનીએ જણાવ્યું કે, શાળાએ આવવાની મને બહુ જ મજા આવે છે. કારણ કે શાળામાં મિત્રો અને શિક્ષકોને મળવાનો ખૂબ આનંદ હોય છે. વેકેશનમાં બહાર ફરવા માટે ગયા હતા. તેમજ બહાર ફરવાની પણ અમને ખૂબ મજા આવી છે, જેથી આજે પહેલા દિવસે મિત્રોને મળીને ખૂબ મજા આવી છે. કારણ કે શિક્ષકો અને શાળાને ખૂબ યાદ કરતા હતા.

રાજકોટની વી. જે. મોદી સ્કૂલના વિદ્યાર્થીઓએ શૈક્ષણિક ક્ષેત્ર પ્રારંભ થયાના પ્રથમ દિવસે પ્રાર્થના અને વૈદિક મંત્રોચ્ચારનું ઉચ્ચારણ કર્યુ, જેથી દિવ્ય વાતાવરણ સર્જાયું હતું. પ્રિન્સિપાલ ડોલી વાજાએ જણાવ્યું હતું કે, શાળામાં ‘શિક્ષા સે સંસ્કાર અભિયાન’ ચાલે છે જે અંતર્ગત વેકેશનમાં કોઈ પણ જગ્યાએ જાઓ તો ત્યાંના ભૌગોલિક વિશેષતા અને ધાર્મિક મહત્વ જાણવાનું કહેવામાં આવે છે. આજે વૈદિક મંત્રોચ્ચાર સાથે બાળકોને આવકારવામાં આવ્યા હતા.

ગરમીથી રક્ષણ આપવા સ્કૂલમાં વ્યવસ્થા

હાલ રાજ્યભરમાં ગરમીનો પ્રકોપ હોવા છતાં, વહીવટી તંત્ર તરફથી વેકેશન લંબાવવાની કોઈ અન્ય સૂચના ન મળતાં પૂર્વ નિર્ધારિત સમયપત્રક મુજબ જ નવું શૈક્ષણિક વર્ષ શરૂ કરવામાં આવ્યું છે. આ અસહ્ય ગરમીને ધ્યાનમાં રાખીને શાળાઓ દ્વારા વિદ્યાર્થીઓની સુરક્ષા અને સુવિધા માટે ખાસ આયોજન કરવામાં આવ્યું છે. શાળા સંચાલકો દ્વારા દરેક ક્લાસરૂમમાં પંખા, વેન્ટિલેશન અને વિદ્યાર્થીઓની બેઝિક જરૂરિયાતો પૂરતી રાખવા પર ભાર મુકાયો છે. આ ઉપરાંત, તીવ્ર ગરમીથી બચાવવા માટે સ્કૂલોમાં ઠંડા અને શુદ્ધ પીવાના પાણી માટે વોટર કુલર સહિતની વિશેષ વ્યવસ્થાઓ પણ ઊભી કરવામાં આવી છે.