અમરેલીના યુવાનને 96 હજારનો ચુનો ચોપડનાર સાયબર ઠગ પાટણથી ઝડપાયો
આરોપી સામે ગુજરાતભરમાં 8 ગુનાઓ નોંધાયેલા : બે મહિનામાં રૂ.2.74 કરોડના શંકાસ્પદ ટ્રાન્ઝેક્શનનો ખુલાસો, રિમાન્ડ મેળવવા કાર્યવાહી
અગ્ર ગુજરાત, રાજકોટ
શેરબજારમાં આકર્ષક નફાની લાલચ આપી લોકોને છેતરતી સાયબર ગુનેગારોની ચેઇન સામે પોલીસને મહત્વની સફળતા મળી છે. અમરેલી જિલ્લાના એક યુવાન સાથે રૂ.96 હજારની ઓનલાઈન છેતરપિંડીના કેસની તપાસ દરમિયાન પોલીસે પાટણના મહેનરજી મફાજી ઠાકોર નામના શખ્સની ધરપકડ કરી છે. તપાસમાં સામે આવ્યું છે કે આરોપી માત્ર એક જ ગુનામાં નહીં, પરંતુ સમગ્ર ગુજરાતમાં નોંધાયેલા 8 જેટલા સાયબર ફ્રોડ કેસોમાં સંડોવાયેલો હોવાનું બહાર આવ્યું છે.
પોલીસે આરોપીના બેંકિંગ વ્યવહારોની ઊંડાણપૂર્વક તપાસ કરતાં ચોંકાવનારી વિગતો સામે આવી હતી. માત્ર બે મહિનાના સમયગાળામાં તેના વિવિધ ખાતાઓમાં અંદાજે રૂ.2.74 કરોડની રકમ જમા થઈ હોવાનું જાણવા મળ્યું છે. પ્રાથમિક તપાસ મુજબ આ રકમ વિવિધ પ્રકારની સાયબર છેતરપિંડી દ્વારા એકત્ર કરવામાં આવી હોવાની આશંકા વ્યક્ત કરવામાં આવી રહી છે.
પોલીસ અધિકારીઓના જણાવ્યા મુજબ ઘણી વખત ફરિયાદોમાં નાની રકમની છેતરપિંડી સામે આવતી હોય છે, પરંતુ આરોપીઓના નાણાકીય વ્યવહારોનું વિશ્લેષણ કરવામાં આવે ત્યારે કરોડો રૂપિયાના ગેરકાયદેસર વ્યવહારો અને વ્યાપક ઠગાઈના નેટવર્કનો પર્દાફાશ થતો હોય છે. આ કેસમાં પણ રૂ.96 હજારની ફરિયાદથી શરૂ થયેલી તપાસ કરોડો રૂપિયાના સાયબર ફ્રોડ સુધી પહોંચી છે. ઝડપાયેલા આરોપીની વધુ પૂછપરછ માટે રિમાન્ડ મેળવવાની તજવીજ હાથ ધરવામાં આવી છે. સાથે જ તેની સાથે સંકળાયેલા અન્ય શખ્સો, બેંક ખાતાઓ અને નાણાંના પ્રવાહ અંગે પણ તપાસનો ધમધમાટ શરૂ કરવામાં આવ્યો છે. પોલીસે નાગરિકોને અપીલ કરી છે કે કોઈપણ પ્રકારની ઓનલાઈન છેતરપિંડીનો ભોગ બને તો વિલંબ કર્યા વિના તાત્કાલિક 1930 સાયબર હેલ્પલાઇન પર ફરિયાદ નોંધાવે. સમયસર જાણ કરવામાં આવે તો ફ્રોડની રકમ આરોપીઓ સુધી પહોંચે તે પહેલાં જ સંબંધિત ખાતાં ફ્રીઝ કરીને નાણાં પરત મેળવવાની પ્રક્રિયા સરળ બની શકે છે.
