કોટડા પંથકમાં તસ્કરો ગોડાઉનમાંથી જીરું અને ખેડૂતના ઘરેથી દાગીના ચોરી ગયા
બે અલગ બનાવોમાં રૂ.1.44 લાખથી વધુની મત્તા પર તસ્કરોનો હાથફેરો; પોલીસ દ્વારા આરોપીઓની શોધખોળ
અગ્ર ગુજરાત, રાજકોટ
કોટડા પંથકમાં તસ્કરો બેફામ બન્યા હોય તેવી સ્થિતિ સર્જાઈ છે. ગોંડલ તાલુકાના કોટડા ગામે વાડીના ગોડાઉનમાંથી રૂ.50 હજારનું જીરું ચોરી જવાની ઘટના સામે આવી છે, જ્યારે કોટડાસાંગાણીના અનિડા વાછરા ગામે ખેડૂતના બંધ મકાનને નિશાન બનાવી સોના-ચાંદીના દાગીના સહિત રૂ.94,500ની મત્તાની ચોરી કરવામાં આવી હતી. બંને બનાવોમાં પોલીસે અલગ-અલગ ગુના નોંધી તપાસ શરૂ કરી છે.
પ્રથમ બનાવમાં ગોંડલના માલવિયાનગર વિસ્તારમાં રહેતા નિવૃત્ત અને સમાજસેવક સુભાષભાઈ બેચરભાઈ દુદાણીએ ગોંડલ તાલુકા પોલીસ સ્ટેશનમાં ફરિયાદ નોંધાવી હતી. તેમની કોટડા ગામના ટોડા વિસ્તારમાં આવેલી વાડીમાં આવેલા ગોડાઉનમાં શિયાળુ પાકનું 25 મણ જીરું 16 બાચકામાં ભરી રાખવામાં આવ્યું હતું. પૂરતો ભાવ ન મળતાં જીરું વેચવાને બદલે સ્ટોર કરવામાં આવ્યું હતું.
ગત 15મી તારીખે ગોડાઉન ચકાસવા ગયા ત્યારે જીરું સલામત હતું, પરંતુ 27મી તારીખે સવારે તપાસ કરતાં બાચકા ગાયબ મળી આવ્યા હતા. વધુ તપાસ કરતાં ગોડાઉનની છતના પતરા તોડી અંદર પ્રવેશ કરાયો હોવાનું સામે આવ્યું હતું. અજાણ્યા તસ્કરો અંદાજે રૂ.50 હજારનું જીરું ચોરી ગયા હોવાનું બહાર આવતાં પોલીસે ગુનો નોંધી તપાસ હાથ ધરી છે.
બીજા બનાવમાં કોટડાસાંગાણી તાલુકાના અનિડા વાછરા ગામે રહેતા ખેડૂત મનોજભાઈ નારણભાઈ ગુજરાતીના મકાનને તસ્કરોએ નિશાન બનાવ્યું હતું. મનોજભાઈ અને તેમની પત્ની ખેતીકામ માટે કાલંભડી ગામની વાડીએ ગયા હતા અને રાત્રે પાણી વાળવાનું હોવાથી ખેતરે જ રોકાયા હતા. દરમિયાન તેમના બંધ મકાનનું તાળું તોડી તસ્કરો ઘરમાં ઘૂસ્યા હતા.
બીજા દિવસે પરિવારને ચોરીની જાણ થતાં ઘરે પહોંચી તપાસ કરવામાં આવી હતી. ઘરમાં કબાટનો સામાન વેરવિખેર હાલતમાં મળી આવ્યો હતો. કબાટમાંથી સોનાની બુટ્ટી, લોકેટ, સોનાના દાણા, ચાંદીના સાંકડા, મંગળસૂત્ર, ઝાંઝરી, ચાંદીની ગાય, તુલસીનો ક્યારો, સિક્કા સહિત કુલ રૂ.94,500ની મત્તા ચોરી થઈ હોવાનું સામે આવ્યું હતું. બંને બનાવોએ ગ્રામ્ય વિસ્તારોમાં સુરક્ષા વ્યવસ્થાને લઈને સવાલો ઉભા કર્યા છે. ગોંડલ તાલુકા અને લોધિકા પોલીસે ગુના નોંધી તસ્કરો સુધી પહોંચવા માટે તપાસના ચક્રો ગતિમાન કર્યા છે.
