ગોંડલમાં ગાંજાના જથ્થા સાથે પેડલર ઝડપાયો ઘરેથી જ ચલાવતો હતો વેચાણનો ધંધો

ગોંડલમાં ગાંજાના જથ્થા સાથે પેડલર ઝડપાયો ઘરેથી જ ચલાવતો હતો વેચાણનો ધંધો

રૂરલ એસઓજીએ 1.399 કિલો ગાંજો જપ્ત કર્યો, સપ્લાયર ઇમરાન બકાલીની શોધખોળ

અગ્ર ગુજરાત, રાજકોટ

રાજકોટ જિલ્લાના ગોંડલ શહેરમાં નશીલા પદાર્થોના કારોબાર સામે રૂરલ એસઓજીને મહત્વની સફળતા મળી છે. ગુંદાળા શેરી વિસ્તારમાં આવેલા એક મકાનમાં ગાંજાનો જથ્થો સંગ્રહ કરીને તેનું વેચાણ કરવામાં આવતું હોવાની ચોક્કસ બાતમીના આધારે પોલીસે દરોડો પાડી કુખ્યાત પેડલર સદામ અશરફ તૈલીને ઝડપી લીધો હતો. પોલીસે તેની પાસેથી ગાંજાનો જથ્થો સહિત કુલ રૂ.63 હજારથી વધુનો મુદ્દામાલ કબજે કરી કાયદેસરની કાર્યવાહી હાથ ધરી છે.
રાજકોટ જિલ્લા પોલીસ વડા વિજયસિંહ ગુર્જરના માર્ગદર્શન હેઠળ જિલ્લામાં નશાખોરીના દૂષણને નાબૂદ કરવા માટે “સે નો ટુ ડ્રગ્સ” અભિયાન સક્રિય રીતે અમલમાં મૂકવામાં આવી રહ્યું છે. આ અભિયાનના ભાગરૂપે રૂરલ એસઓજીની ટીમો સતત પેટ્રોલિંગ અને બાતમીદારો મારફતે મળતી માહિતીના આધારે કાર્યવાહી કરી રહી છે. એસઓજી પીઆઈ એફ.એ. પારગીની દેખરેખ હેઠળ કામગીરી દરમિયાન પોલીસને ટેકનિકલ સર્વેલન્સ તેમજ બાતમીદારો પાસેથી જાણકારી મળી હતી કે ગોંડલના ગુંદાળા શેરી વિસ્તારમાં રહેતો એક શખ્સ પોતાના રહેણાંક મકાનમાં ગાંજાનો જથ્થો રાખી તેનું વેચાણ કરી રહ્યો છે. માહિતીની ખાતરી કર્યા બાદ પોલીસે તાત્કાલિક કાર્યવાહી હાથ ધરી હતી.
પોલીસની ટીમે શંકાસ્પદ મકાન પર દરોડો પાડી સર્ચ હાથ ધરતાં મકાનમાંથી પ્લાસ્ટિકની કાળી કોથળીમાં છુપાવી રાખેલો વનસ્પતિજન્ય માદક પદાર્થ ગાંજો મળી આવ્યો હતો. તપાસ દરમિયાન ગાંજાનું વજન 1.399 કિલો હોવાનું સામે આવ્યું હતું. પોલીસે ગાંજાની કિંમત રૂ.58,850 આંકી હતી. ઉપરાંત અન્ય વસ્તુઓ સહિત કુલ રૂ.63 હજારનો મુદ્દામાલ જપ્ત કરવામાં આવ્યો હતો. આ મામલે પોલીસે સદામ અશરફ તૈલી (રહે. ગુંદાળા શેરી, નાની બજાર, ગોંડલ)ની ધરપકડ કરી ગોંડલ એ-ડિવિઝન પોલીસ સ્ટેશન ખાતે એનડીપીએસ એક્ટ હેઠળ ગુનો નોંધ્યો છે. આરોપીની પૂછપરછ દરમિયાન ગાંજાનો જથ્થો સપ્લાય કરનાર તરીકે ઇમરાન હનીફ બકાલી (રહે. ચોરી દરવાજા, ગોંડલ)નું નામ સામે આવ્યું હતું. જેના આધારે પોલીસે તેને વોન્ટેડ જાહેર કરી શોધખોળ શરૂ કરી છે.
પોલીસ તપાસમાં વધુ એક મહત્વની બાબત સામે આવી છે કે સદામ તૈલી અગાઉ પણ નશીલા પદાર્થોના ગુનાઓમાં સંડોવાયેલો રહ્યો છે. તેની સામે ગોંડલ સીટી પોલીસ સ્ટેશન તેમજ રાજકોટ શહેરના ભક્તિનગર પોલીસ સ્ટેશનમાં એનડીપીએસ એક્ટ હેઠળ અગાઉ ગુનાઓ નોંધાયેલા હોવાનું જાણવા મળ્યું છે. જેના કારણે પોલીસ હવે તેની જૂની ગુનાહિત પ્રવૃત્તિઓ અને નશાના નેટવર્ક અંગે પણ ઊંડાણપૂર્વક તપાસ કરી રહી છે.
આ સમગ્ર સફળ કામગીરીમાં એસઓજી પીઆઈ એફ.એ. પારગી, ગોંડલ એ-ડિવિઝન પીઆઈ જે.આર. ઝાલાના માર્ગદર્શન હેઠળ પીએસઆઈ જી.જે. ઝાલા, પી.બી. મિશ્રા સહિતના અધિકારીઓ અને સ્ટાફે મહત્વની ભૂમિકા ભજવી હતી. પોલીસનું માનવું છે કે આવી સતત કાર્યવાહીઓથી જિલ્લામાં નશાના કારોબાર પર અસરકારક નિયંત્રણ લાવી શકાય છે.