- સાઉથ આફ્રિકા અને ન્યુઝીલેન્ડ આજે મેચ
- વર્લ્ડકપ 2023માં ક્વિન્ટન ડી કોકે ફટકારી ચોથી સદી
- ક્વિન્ટન ડી કોકે કુમાર સંગાકારાના રેકોર્ડની બરાબરી કરી
સાઉથ આફ્રિકાના સ્ટાર વિકેટકીપર બેટ્સમેન ક્વિન્ટન ડી કોકે વર્લ્ડકપ 2023માં શાનદાર પ્રદર્શન કર્યું છે. તેણે આ ટૂર્નામેન્ટમાં અત્યાર સુધીમાં કુલ ચાર સદી ફટકારી છે. બુધવારે ન્યુઝીલેન્ડ સામે પણ ડી કોકે સદી ફટકારી હતી અને શાનદાર ઇનિંગ રમી હતી. ભારતની ધરતી પર આ તેની છઠ્ઠી સદી હતી. આ સાથે તેણે વર્લ્ડ કપની એક જ સિઝનમાં સૌથી વધુ સદી ફટકારવાના મામલે કુમાર સંગાકારાની બરાબરી કરી લીધી છે. તેણે ન્યૂઝીલેન્ડ સામે 116 બોલમાં 114 રનની ઇનિંગ રમી જેમાં 10 ચોગ્ગા અને ત્રણ છગ્ગાનો સમાવેશ થાય છે.
રોહિત શર્માના રેકોર્ડથી એક ડગલું દૂર
ક્વિન્ટન ડી કોકે વર્લ્ડકપ 2023માં અત્યાર સુધીમાં ચાર સદી ફટકારી છે. તે જ સમયે, તે હવે આ ટૂર્નામેન્ટની એક જ સિઝનમાં સૌથી વધુ સદી ફટકારવાના મામલે માત્ર રોહિત શર્માથી પાછળ છે. જો તે બાકીની મેચોમાં વધુ એક સદી ફટકારે છે તો તે રોહિત શર્માની પાંચ સદીની બરાબરી કરી લેશે. સાઉથ આફ્રિકા તેની 7મી મેચ રમી રહ્યું છે. તેણે હજુ લીગ તબક્કામાં બે મેચ રમવાની છે. ત્યાર બાદ જો ટીમ સેમીફાઈનલ કે ફાઈનલમાં પહોંચે છે તો તેને ત્યાં પણ બે મેચ રમવાની રહેશે. આવી સ્થિતિમાં હવે ડી કોકનું ફોર્મ જોતા લાગે છે કે તે રોહિતનો રેકોર્ડ તોડી શકે છે.
ODI વર્લ્ડ કપની એક સિઝનમાં સૌથી વધુ સદી
- રોહિત શર્મા – 5 (2019 વર્લ્ડકપ)
- કુમાર સંગાકારા- 4 (2015 વર્લ્ડકપ)
- ક્વિન્ટન ડી કોક- 4 (2023 વર્લ્ડકપ)
- સૌરવ ગાંગુલી- 3 (2003 વર્લ્ડકપ)
- મેથ્યુ હેડન- 3 (2007 વર્લ્ડકપ)
- માર્ક વો – 3 (1996 વર્લ્ડકપ)
ડી કોકની કારકિર્દીનો રેકોર્ડ
ક્વિન્ટન ડી કોકની વાત કરીએ તો આ તેની ODI કરિયરની 21મી સદી હતી. તેણે આ ફોર્મેટમાં 152 મેચ રમી છે અને 152 ઇનિંગ્સમાં 6721 રન બનાવ્યા છે. આ તેનો છેલ્લો વર્લ્ડકપ છે. આ ટૂર્નામેન્ટ પહેલા જ તેણે આંતરરાષ્ટ્રીય ક્રિકેટને અલવિદા કહેવાનો નિર્ણય લીધો હતો.
