જેતપુરના ખારચીયા પાસેથી કારમાંથી ૫૦૦ લીટર દેશી દારૂ સાથે એક ઝડપાયો
ચાર લાખનો મુદામાલ પોલીસે જપ્ત કર્યો
અગ્ર ગુજરાત, જેતપુર
રાજકોટ રેન્જ દ્વારા ગેરકાયદેસર પ્રવૃત્તિઓ ડામવા માટે હાથ ધરવામાં આવેલી ઝુંબેશ અંતર્ગત, રાજકોટ રેન્જ ટીમે જેતપુર તાલુકાના ખારચીયા રોડ પરથી દેશી દારૂના જથ્થા સાથે એક શખ્સને ઝડપી પાડી ગણનાપાત્ર કેસ શોધી કાઢ્યો છે.
રાજકોટ રેન્જ આઈ.જી. નિર્લિપ્ત રાય (IPS) દ્વારા રેન્જ હેઠળના તમામ જિલ્લાઓમાં પ્રોહિબિશન અને જુગાર જેવી ગેરકાયદેસર પ્રવૃત્તિઓ ડામી દેવા માટે કડક સૂચનાઓ આપવામાં આવી હતી. આ સૂચનાના અમલીકરણ માટે રાજકોટ રેન્જના પી.આઈ. અપૂર્વ પટેલના માર્ગદર્શન હેઠળ પોલીસ સબ ઇન્સપેક્ટર પી.એન.મોરી, બી.સી.મીયાત્રા, સી.એમ.કાંટેલીયા અને તેમની ટીમ દ્વારા સતત વોચ અને ટેકનિકલ એનાલિસિસ કરવામાં આવી રહ્યું હતું.
દરમિયાન, પોલીસ સ્ટાફના દિવ્યેશભાઇ સુવા, વકારભાઇ આરબ, શિવરાજસિહ ઝાલા, નિકુલભાઇ પંપાણીયા અને ડ્રાઈવર ગોવીંદભાઇ ધાંધળને ચોક્કસ બાતમી મળી હતી. આ બાતમીના આધારે જેતપુર-બગસરા રોડ પર ખારચીયા ગામ તરફ જતા રસ્તે, રણુજા મંદિર નજીક મામાદેવના મંદિર પાસે પોલીસે વોચ ગોઠવી હતી.
પોલીસે શંકાસ્પદ ઇકોસ્પોર્ટસ કાર નં. GJ-11-AB-8238 ને અટકાવી તેની તલાશી લેતા તેમાંથી ૫૦૦ લીટર દેશી દારૂ મળી આવ્યો હતો. પોલીસે કાર ચાલક દિપક ઉર્ફે મોતીયો ગુણવંતરાય વોરા (રહે. રામપરા, તા. ધોરાજી, મૂળ રહે. જેતપુર) ની ધરપકડ કરી હતી. પોલીસે દેશી દારૂ, મોબાઈલ અને ઇકોસ્પોર્ટસ કાર મળી કુલ રૂ. ૪,૦૦,૫૦૦/- નો મુદ્દામાલ જપ્ત કર્યો છે.
તપાસ દરમિયાન દારૂનો જથ્થો પૂરો પાડનાર અને મંગાવનાર અન્ય બે શખ્સો – દિલુભાઇ બોરીચા (રહે. ધારી બગસરા) અને કિશન ડાયાભાઇ રાઠોડ (રહે. જેતપુર) ના નામ ખુલતા, પોલીસે મુખ્ય આરોપી દિપક વોરા તથા આ બંને શખ્સો વિરુદ્ધ જેતપુર તાલુકા પોલીસ સ્ટેશનમાં ગુનો નોંધી વધુ તપાસ હાથ ધરી છે.
