કોઠારીયા બ્રિજ, કોરાટ ચોક, પારડી પૂલ સહિત ગોંડલ સુધી ચાલતા કામગીરી સમીક્ષા કરતા સાંસદ
નેશનલ હાઇ-વે ઓથોરીટી અને ઉદ્યોગપતિઓ સાથે સિકસલેન બાબતે પરસોત્તમ રૂપાલાની બેઠક : સમય મર્યાદામાં અને ઝડપથી કામગીરી પૂર્ણ કરવા સૂચના
અગ્ર ગુજરાત, રાજકોટ
રાજકોટ શહેર અને આસપાસના વિસ્તારોમાં રાષ્ટ્રીય ધોરીમાર્ગ પર ચાલી રહેલા મહત્વપૂર્ણ વિકાસકાર્યોને વધુ ગતિ આપવા તથા સમયમર્યાદામાં પૂર્ણ કરવા માટે સાંસદ પરષોત્તમભાઈ રૂપાલાના અધ્યક્ષસ્થાને એક મહત્વપૂર્ણ બેઠક યોજાઈ હતી. આ બેઠકમાં રાજકોટ દક્ષિણના ધારાસભ્ય રમેશભાઈ ટીલાળા, નેશનલ હાઈવે ઓથોરિટીના પ્રોજેક્ટ ડિરેક્ટર તથા તેમની ટીમ, શાપર-વેરાવળ ઇન્ડસ્ટ્રિયલ એસોસિએશન, હડમતાળા ઇન્ડસ્ટ્રિયલ એસોસિએશનના પ્રતિનિધિઓ તેમજ વિવિધ ઉદ્યોગપતિઓ ઉપસ્થિત રહ્યા હતા.
બેઠક દરમિયાન રાજકોટના કોઠારિયા બ્રિજ, કોરાટ ચોક, પારડી બ્રિજ સહિત રાજકોટથી ગોંડલ સુધી રાષ્ટ્રીય ધોરીમાર્ગ પર ચાલી રહેલા વિવિધ વિકાસકાર્યોની વિસ્તૃત સમીક્ષા કરવામાં આવી હતી. આ કાર્યોને ઝડપભેર અને નિર્ધારિત સમયમર્યાદામાં પૂર્ણ કરવા માટે જરૂરી આયોજન, સંકલન અને તંત્ર દ્વારા લેવાય તેવી કામગીરી અંગે ચર્ચા કરવામાં આવી હતી.
ઉદ્યોગ ક્ષેત્રના પ્રતિનિધિઓએ માર્ગ નિર્માણ અને બ્રિજ સંબંધિત કાર્યોના કારણે સર્જાતી ટ્રાફિક અને અવરજવરની સમસ્યાઓ અંગે રજૂઆતો કરી હતી. જેના અનુસંધાને નેશનલ હાઈવે ઓથોરિટીના અધિકારીઓએ ચાલી રહેલા કાર્યોની પ્રગતિ અંગે માહિતી આપી અને કાર્યોને વધુ ઝડપથી પૂર્ણ કરવા માટે જરૂરી પગલાં અંગે ખાતરી આપી હતી.
બેઠકમાં ઉપસ્થિત લોકપ્રતિનિધિઓ અને ઉદ્યોગજગતના આગેવાનોએ જણાવ્યું હતું કે રાષ્ટ્રીય ધોરીમાર્ગના આ મહત્વપૂર્ણ પ્રોજેક્ટો પૂર્ણ થવાથી ટ્રાફિક વ્યવસ્થામાં સુધારો થશે, વાહનચાલકોને સુવિધા મળશે તેમજ રાજકોટ અને આસપાસના ઔદ્યોગિક વિસ્તારોના વિકાસને વધુ વેગ મળશે.
આ બેઠક સૌહાર્દપૂર્ણ વાતાવરણમાં યોજાઈ હતી અને વિકાસલક્ષી કાર્યોને સમયસર પૂર્ણ કરવા માટે સૌએ સંકલિત પ્રયાસો કરવાની પ્રતિબદ્ધતા વ્યક્ત કરી હતી.
