અનીડામાં સરકારી જમીન પર કબજો કરવો ભારે પડ્યો, ભૂમાફિયાની ધરપકડ

અનીડામાં સરકારી જમીન પર કબજો કરવો ભારે પડ્યો, ભૂમાફિયાની ધરપકડ

એક વખત દબાણ હટાવી દંડ ફટકારાયા બાદ પણ ફરી ઓરડીઓ બાંધી ભાડે આપી દીધી હતી

અગ્ર ગુજરાત, રાજકોટ

ગોંડલ તાલુકાના અનીડા ગામે સરકારી જમીન પર વારંવાર ગેરકાયદે કબજો કરવાના આરોપસર ગોંડલના હાર્દિક માવાણીની પોલીસે ધરપકડ કરી છે. અગાઉ તંત્ર દ્વારા દબાણ દૂર કરવામાં આવ્યું હોવા છતાં આરોપીએ ફરીથી સરકારી જમીન પર બાંધકામ ઉભું કરી તેનો ઉપયોગ શરૂ કર્યો હોવાનું સામે આવતા મામલતદારે ફરિયાદ નોંધાવતા લેન્ડ ગ્રેબિંગ એક્ટ હેઠળ કાર્યવાહી હાથ ધરવામાં આવી હતી.
પ્રાપ્ત વિગતો મુજબ, ગોંડલ તાલુકાના અનીડા ગામે આવેલી સરકારી ખરાબાની જમીનમાં આશરે 400 ચોરસ મીટર વિસ્તારમાં પાકી દિવાલો ઊભી કરી મજૂરોના રહેઠાણ માટે ઓરડીઓ બનાવવામાં આવી હતી. આ અંગે મહેસૂલ વિભાગે તપાસ હાથ ધરી હાર્દિક માવાણી વિરુદ્ધ જમીન મહેસૂલ કાયદાની કલમ-61 હેઠળ દબાણનો કેસ દાખલ કર્યો હતો. ત્યારબાદ તંત્ર દ્વારા પેશકદમી બદલ રૂ.1,500નો દંડ ફટકારવામાં આવ્યો હતો તેમજ સ્વખર્ચે દબાણ દૂર કરવા આદેશ આપવામાં આવ્યો હતો. આદેશના અમલ બાદ સરકારી જમીન પરથી ગેરકાયદે બાંધકામ હટાવવામાં આવ્યું હતું. જોકે, થોડા સમય બાદ ફરીથી કોઈપણ પ્રકારની મંજૂરી વિના એ જ જગ્યાએ પાકું બાંધકામ કરી કબજો જાળવી રાખવામાં આવ્યો હોવાનું તપાસમાં બહાર આવ્યું હતું.
આ સમગ્ર મામલે ગોંડલના મામલતદાર આર.બી. ડોડીયાએ ગોંડલ તાલુકા પોલીસ મથકે સત્તાવાર ફરિયાદ નોંધાવતા આરોપી સામે લેન્ડ ગ્રેબિંગ એક્ટ હેઠળ ગુનો દાખલ કરવામાં આવ્યો હતો. ફરિયાદના આધારે ડીવાયએસપી કે.જી. ઝાલાના માર્ગદર્શન હેઠળ અને પીઆઈ યુ.આર. ડામોરની રાહબરીમાં પોલીસે તપાસ હાથ ધરી હતી. પોલીસ ટીમે કાર્યવાહી દરમિયાન આરોપી હાર્દિક વિનોદભાઈ માવાણી (રહે. યશ પાર્ક સોસાયટી, જેતપુર રોડ, ગોંડલ)ને ઝડપી પાડી તેની સામે કાયદેસરની કાર્યવાહી શરૂ કરી છે. સમગ્ર બનાવે સરકારી જમીનો પર થતા ગેરકાયદે કબજાઓ સામે તંત્રની કડક વલણની વધુ એક ઝલક આપી છે.