મોરબીના જેતપરમાં ખેડૂત ઉપવાસ છાવણીમાં મહિલાઓએ ગરબા લીધા
ગરબે ઘૂમી વિરોધ પ્રદર્શન, આજે મહારકતદાન કેમ્પ
અગ્ર ગુજરાત, મોરબી
મોરબીના જેતપર ગામે ખેડૂતો દ્વારા ચલાવવામાં આવી રહેલા આમરણાંત ઉપવાસ આંદોલનના છઠ્ઠા દિવસે વાતાવરણ વધુ ગરમાયું હતું. મોરબી જિલ્લાના જુદા જુદા ગ્રામ્ય વિસ્તારોમાંથી મોટી સંખ્યામાં મહિલાઓ ઉપવાસી છાવણી ખાતે એકત્ર થઈ હતી. મહિલાઓએ ખાનગી વીજ કંપની સામે આક્રોશ વ્યક્ત કરવા માટે અનોખો માર્ગ અપનાવ્યો હતો અને છાવણી પર આનંદનો ગરબો ગાઈને વિરોધ પ્રદર્શન કર્યું હતું.
મોરબી જિલ્લા સહિત સમગ્ર ગુજરાતમાં ખેડૂતોના ખેતરોમાંથી ખાનગી કંપનીઓની વીજ લાઈનો પસાર કરવામાં આવી રહી છે. ખેતરોમાં વીજ પોલ ઊભા કરવા અને ઉપરથી હાઈટેન્શન લાઈન પસાર કરવા સામે ખેડૂતોને ખૂબ જ નજીવું વળતર અપાતું હોવાથી ઠેર-ઠેર વિરોધ થઈ રહ્યો છે. આ જ મુદ્દે જેતપર ગામે છેલ્લા 6 દિવસથી આંદોલન ચાલી રહ્યું છે, જેમાં હાલ 3 મહિલાઓ સહિત કુલ 9 લોકો આમરણાંત ઉપવાસ પર બેઠા છે.
બીજી તરફ, ગાંધીનગરથી સરકાર દ્વારા ખેડૂતોને આ પ્રશ્નની ચર્ચા માટે બોલાવવામાં આવ્યા હતા. જોકે, ખેડૂત નેતાઓએ સ્પષ્ટ શબ્દોમાં જણાવ્યું છે કે, જ્યાં સુધી વીજ કંપનીનું કામ રોકવામાં ન આવે અને નવો સત્તાવાર પરિપત્ર બહાર પાડવામાં ન આવે, ત્યાં સુધી કોઈ ચર્ચા કરવામાં આવશે નહીં. ખેડૂતોએ પોતાની 6 મુખ્ય માંગણીઓ લેખિતમાં સ્થાનિક અધિકારીઓને સોંપી છે, જે સરકાર સુધી પહોંચાડવામાં આવશે.
મંગળવારે મહિલાઓના ગરબા દ્વારા વિરોધ પ્રદર્શન બાદ, આગામી રણનીતિના ભાગરૂપે આજે ઉપવાસી છાવણી ખાતે ખેડૂતો દ્વારા એક વિશાળ રક્તદાન કેમ્પનું આયોજન કરવામાં આવ્યું છે. આ કેમ્પમાં રેકોર્ડબ્રેક રક્તદાન કરીને સરકાર સુધી પોતાની માગ બુલંદ કરવામાં આવશે તેવો વિશ્વાસ આંદોલનકારીઓએ વ્યક્ત કર્યો છે.
