ત્રણ વર્ષના બાળકની તબિયત લથડતા સુરત એરપોર્ટ પર અમદાવાદ-મુંબઇ ફલાઇટનું લેન્ડિંગ
સમયસર લેન્ડીંગથી માસૂમનો જીવ બચ્યો : પરિવાર અને મુસાફર પાયલોટ પ્રત્યે કૃતજ્ઞ
અગ્ર ગુજરાત, સુરત
અમદાવાદથી મુંબઈ જઈ રહેલી ઇન્ડિગો એરલાઇન્સની ફ્લાઇટમાં સોમવારે સાંજે એક ગંભીર તબીબી કટોકટી સર્જાઈ હતી. મુસાફરી દરમિયાન એક 3 વર્ષનું બાળક અચાનક બેભાન થઈ જતાં વિમાનમાં ભારે દોડધામ મચી ગઈ હતી. જોકે, પાયલટે સહેજ પણ સમય ગુમાવ્યા વિના ઓન-બોર્ડ મેડિકલ ઈમરજન્સી જાહેર કરી સુરત ઇન્ટરનેશનલ એરપોર્ટ પર પ્લેનનું સુરક્ષિત ઇમરજન્સી લેન્ડિંગ કરાવ્યું હતું. સમયસર મળેલી તબીબી સહાયના કારણે માસૂમ બાળકનો જીવ બચી ગયો છે.
પ્રાપ્ત વિગતો અનુસાર, 29 જૂન 2026ના રોજ સાંજે આશરે 8:20 વાગ્યે ઇન્ડિગો એરલાઇન્સની ફ્લાઇટ નંબર 6E-7018 અમદાવાદથી ઉડાન ભરીને મુંબઈ તરફ જઈ રહી હતી. આ દરમિયાન ફ્લાઇટમાં સવાર માસ્ટર સૌરભ નામના બાળકની તબિયત અચાનક બગડી હતી અને જોતજોતામાં તે બેભાન થઈ ગયો હતો. સ્થિતિ ગંભીર જણાતાં ફ્લાઇટમાં મુસાફરી કરી રહેલા બે તબીબો તાત્કાલિક બાળકની મદદે આવ્યા હતા અને તેને પ્રાથમિક સારવાર આપવાનો પ્રયત્ન કર્યો હતો, પરંતુ બાળકની તબિયતમાં કોઈ સુધારો ન થતાં પાયલટે તાકીદે એર ટ્રાફિક કંટ્રોલ (ATC)નો સંપર્ક કરી સુરત એરપોર્ટ પર લેન્ડિંગની મંજૂરી માંગી હતી.
સુરત એર ટ્રાફિક કંટ્રોલને ફ્લાઇટમાં બાળકની ગંભીર સ્થિતિ અંગેની માહિતી મળતાં જ સમગ્ર એરપોર્ટ તંત્ર એક્શનમાં આવી ગયું હતું. સેન્ટ્રલ ઇન્ડસ્ટ્રિયલ સિક્યુરિટી ફોર્સ CISF, એરપોર્ટ મેડિકલ ટીમ અને ઇન્ડિગો એરલાઇન્સની ગ્રાઉન્ડ ટીમે સંયુક્ત રીતે મોરચો સંભાળી લીધો હતો. રનવે પર ફ્લાઇટના લેન્ડિંગની સાથે જ એમ્બ્યુલન્સ અને ડોક્ટર્સની ટીમને તૈનાત કરી દેવામાં આવી હતી જેથી એક પણ સેકન્ડનો બગાડ ન થાય.
ઘટના દરમિયાન CISFના જવાનોએ એરપોર્ટ મેનેજમેન્ટ અને મેડિકલ ટીમ સાથે ગ્રીન કોરિડોર જેવું સચોટ સંકલન સાધ્યું હતું, જેના કારણે બાળકને પ્લેનમાંથી ઉતારીને ત્વરિત હોસ્પિટલ પહોંચાડવામાં મોટી મદદ મળી હતી.
