રાજકોટ SOGએ ૨.૮૯ લાખના પોષડોડા સાથે રાજસ્થાની શખ્સને દબોચ્યો
ગ્રીનલેન્ડ ચોકડી પાસેથી ૧૬.૩૦૦ કિલો પોષડોડા અને ₹૪૦ હજારનો આઇફોન જપ્ત; ચોથી ખેપનો માલ મજૂરોને વેચે તે પહેલાં જ પોલીસે ખેલ પૂરો કર્યો
અગ્ર ગુજરાત, રાજકોટ
રાજકોટ શહેરમાં યુવાધનને નશાના રવાડે ચડતા અટકાવવા અને નાર્કોટિક્સ પદાર્થોનું ગેરકાયદેસર વેચાણ તેમજ સેવન રોકવા માટે ચાલી રહેલી ‘સે નો ટુ ડ્રગ્સ’ ઝુંબેશ અંતર્ગત શહેર એસઓજી (SOG) ની ટીમે વધુ એક મોટી સફળતા મેળવી છે. રાજસ્થાનથી રૂ. ૨.૮૯ લાખની કિંમતનો નશાકારક પોષડોડાનો જથ્થો લાવીને રાજકોટમાં વેચે તે પહેલાં જ એસઓજીએ ગ્રીનલેન્ડ ચોકડી નજીકથી એક શખ્સને દબોચી લીધો છે.
મળતી વિગતો અનુસાર, એસઓજી શાખાના એએસઆઈ રાજેશભાઈ બાળા, સિદ્ધરાજસિંહ જાડેજા તથા કોન્સ્ટેબલ જયપાલસિંહ ઝાલાને મળેલી ચોક્કસ બાતમીના આધારે પોલીસે ગ્રીનલેન્ડ ચોકડીથી નવાગામ તરફ જતા રસ્તા પર આવેલી શિવ શક્તિ હોટલ બહારથી એક શખ્સને પોષડોડાના જથ્થા સાથે પકડી પાડ્યો હતો. પૂછપરછ દરમિયાન ઝડપાયેલા શખ્સે પોતાનું નામ ચુનારામ માલારામ જાટ (ઉં.વ. ૩૭, રહે. હાલ કુવાડવા GIDC, મૂળ બાડમેર, રાજસ્થાન) હોવાનું જણાવ્યું હતું.
તપાસ દરમિયાન FSL અધિકારી કે. એમ. તાવીયાએ સ્થળ પર આવી પદાર્થનું પરીક્ષણ કરતા તે પોષડોડા હોવાનો સત્તાવાર અભિપ્રાય આપ્યો હતો. કુવાડવા જીઆઈડીસીમાં રહીને મજૂરો સપ્લાય કરવાનું કામ કરતો ચુનારામ અગાઉ પણ પોતાના વતન રાજસ્થાનથી ત્રણ વખત પોષડોડાની ખેપ મારી ચૂકેલો હોવાનું બહાર આવ્યું છે. તે મોટે ભાગે સ્થાનિક ફેક્ટરીઓના મજૂરોને આ નશાકારક પદાર્થનું વેચાણ કરતો હતો. આ વખતે ચોથી ખેપનો માલ વેચવા જતાં જ એસઓજીના હાથે ઝડપાઈ ગયો હતો.
પોલીસે આરોપી પાસેથી ₹૨,૮૯,૫૦૦ ની કિંમતનો ૧૬.૩૦૦ કિલોગ્રામ પોષડોડાનો જથ્થો અને ₹૪૦,૦૦૦ ની કિંમતનો આઇફોન કબજે કર્યો છે. આરોપી સામે બી-ડિવિઝન પોલીસ મથકમાં NDPS એક્ટ હેઠળ ગુનો દાખલ કરી આગળની સઘન તપાસ અર્થે બી-ડિવિઝન પોલીસને સોંપવામાં આવ્યો છે.
આ સફળ કામગીરી પોલીસ કમિશનર બ્રજેશકુમાર ઝા, જેસીપી ચૈતન્ય મંડલિક, ડીસીપી ક્રાઇમ જગદીશ બાંગરવા અને એસીપી ક્રાઇમ ભરત બી. બસીયાની સૂચના મુજબ SOG PI એન. બી. ચૌધરી, સાયબર ક્રાઇમ PI બી.બી. જાડેજા, PSI બી.વી. ચૂડાસમા તથા એસઓજીની ટીમે પાર પાડી હતી.
