સિટી પોલીસ અને ઓમનિટેક એન્જિનિયરિંગ વચ્ચે સ્પોર્ટ્સ ફેસિલિટી ડેવલપમેન્ટ માટે CSR સહયોગ
પોલીસ હેડ ક્વાર્ટર ખાતે બાસ્કેટબોલ કોર્ટ અને ચેસ-કેરમ કોચિંગ સેન્ટર શરૂ કરાશે
અગ્ર ગુજરાત, રાજકોટ
રાજકોટ સિટી પોલીસ હેડ ક્વાર્ટર ખાતે રમતગમતની આધુનિક સુવિધાઓ વિકસાવવા માટે રાજકોટ સિટી પોલીસ અને ઓમનિટેક એન્જિનિયરિંગ લિમિટેડ વચ્ચે કોર્પોરેટ સોશિયલ રિસ્પોન્સિબિલિટી (CSR) અંતર્ગત મહત્વપૂર્ણ સહયોગ હાથ ધરવામાં આવ્યો છે. આ પહેલ હેઠળ પોલીસ હેડ ક્વાર્ટર ખાતે બાસ્કેટબોલ કોર્ટનું આધુનિકીકરણ કરવા ઉપરાંત અદ્યતન ચેસ અને કેરમ કોચિંગ સેન્ટર શરૂ કરવામાં આવશે.
ઓમનિટેક એન્જિનિયરિંગ લિમિટેડના આર્થિક સહયોગથી રાજકોટ સિટી પોલીસ, એહસાસ ટ્રસ્ટ અને રાજકોટ ડિસ્ટ્રિક્ટ ચેસ એસોસિએશન દ્વારા ગત માસમાં રાજકોટ સિટી પોલીસ હેડ ક્વાર્ટર ખાતે ઓપન ગુજરાત ચેસ ટુર્નામેન્ટનું આયોજન કરવામાં આવ્યું હતું. આ ટુર્નામેન્ટના સમાપન સમારોહમાં ઓમનિટેક એન્જિનિયરિંગ લિમિટેડના ચેરમેન અને મેનેજિંગ ડિરેક્ટર ઉદયભાઈ પારેખ ઉપસ્થિત રહ્યા હતા. તેમણે ખેલાડીઓ અને આયોજકોને પ્રોત્સાહિત કરતાં જણાવ્યું હતું કે રમતગમત યુવાનોમાં શિસ્ત, આત્મવિશ્વાસ, એકાગ્રતા અને ટીમભાવના વિકસાવવામાં મહત્વપૂર્ણ ભૂમિકા ભજવે છે. આ પ્રસંગે એસીપી મુનાફ પઠાણ તથા પોલીસ સ્પોર્ટ્સ ઓફિસર એએસઆઈ અનિલભાઈ દવેએ પોલીસ હેડ ક્વાર્ટર ખાતે ચાલી રહેલી વિવિધ રમતગમત પ્રવૃત્તિઓની વિસ્તૃત માહિતી આપી હતી. સાથે જ રમતગમતની સુવિધાઓના વિકાસ અને જરૂરી સમારકામ માટે આર્થિક સહયોગની રજૂઆત કરવામાં આવી હતી.
આ રજૂઆતને હકારાત્મક પ્રતિસાદ આપતાં શ્રી ઉદયભાઈ પારેખે પોલીસ હેડ ક્વાર્ટર ખાતેના બાસ્કેટબોલ કોર્ટને સિન્થેટિક સરફેસથી સજ્જ કરવા તેમજ અન્ય જરૂરી સમારકામ માટે સ્થળ પર જ અંદાજિત રૂ. ૦૬ લાખની સહાય મંજૂર કરી હતી. તેમના જન્મદિવસ નિમિત્તે ૨૦ જુલાઈ, ૨૦૨૬ના રોજ આ કાર્યની શુભ શરુઆતરૂપે મંજૂર કરાયેલી રકમ એહસાસ ટ્રસ્ટના ખાતામાં ટ્રાન્સફર કરવામાં આવી હતી. આ ઉપરાંત, સમર કેમ્પના સમાપન સમારોહ દરમિયાન એહસાસ ટ્રસ્ટના ટ્રસ્ટીઓની વિનંતીને માન આપીને રાજકોટ શહેર પોલીસ કમિશનર બ્રજેશકુમાર ઝાએ પોલીસ હેડ ક્વાર્ટર ખાતે ચેસ અને કેરમ કોચિંગ સેન્ટર શરૂ કરવા માટે જગ્યા ફાળવી હતી. આ જગ્યામાં અદ્યતન ચેસ કોચિંગ સેન્ટર શરૂ કરવા અંગે શ્રી ઉદયભાઈ પારેખે સ્થળની રૂબરૂ મુલાકાત લીધી હતી અને જરૂરી સૂચનો આપ્યા હતા.
આ કોચિંગ સેન્ટરમાં મુંબઈના જાણીતા ચેસ કોચ પ્રફુલભાઈ ઝવેરીના માર્ગદર્શન હેઠળ તૈયાર કરાયેલા વ્યવસ્થિત ચેસ અભ્યાસક્રમ અનુસાર તાલીમ આપવામાં આવશે. ઉદયભાઈ પારેખે ચેસ અને કેરમના બંને કોચિંગ સેન્ટરને કાયમી આર્થિક સહયોગ આપવાની ખાતરી પણ આપી છે. ચેસ અને કેરમ સેન્ટરની આધુનિક ડિઝાઇન અને આંતરિક સુવિધાઓ વિકસાવવા માટે અમદાવાદના ન્યુહાઉઝર ડિઝાઇન સ્ટુડિયોના જાણીતા યુવા આર્કિટેક્ટ અને ઇન્ટીરિયર ડિઝાઇનર ભૂમિતભાઈ બંઠિયા તથા આસ્ના બંઠિયાને વિનામૂલ્યે ડિઝાઇન સહયોગ આપવા વિનંતી કરવામાં આવી હતી. તેમણે પણ આ સામાજિક અને રમતગમતલક્ષી પ્રકલ્પ માટે સંપૂર્ણ સહયોગ આપવાની ખાતરી વ્યક્ત કરી હતી.
પોલીસ હેડ ક્વાર્ટર ખાતે શરૂ થનારા આ અદ્યતન સ્પોર્ટ્સ સેન્ટરોના નિર્માણ અને વિકાસમાં રાજકોટ પોલીસ કમિશનર બ્રજેશકુમાર ઝા, અધિક પોલીસ કમિશનર ચૈતન્ય માંડલિક, ડીસીપી હરપાલસિંહ જાડેજા, ડીસીપી જગદીશ બાંગરવા, ડીસીપી હેતલ પટેલ, ડીસીપી રાકેશ દેસાઈ અને એસીપી મુનાફ પઠાણનો પ્રેરક અને સક્રિય સહયોગ પ્રાપ્ત થયો છે. તેમ એહસાસ ટ્રસ્ટના પ્રેસિડેન્ટ નિશ્ચલભાઈ સંઘવીની અખબારી યાદી જણાવે છે.
