સોસાયટીમાં મહિલા-પતિના મોબાઇલ નંબર સાથે અભદ્ર પોસ્ટર લગાવી અપાઈ ધમકી
પીછો કરી ફોટા વાયરલ કરી છેડતી અને જાનથી મારી નાખવાની ધમકીનો આક્ષેપ, રેલનગરની પરિણીતાએ નોંધાવી ફરિયાદ
અગ્ર ગુજરાત, રાજકોટ
રાજકોટના રેલનગર વિસ્તારમાં રહેતી એક પરિણીતાને લાંબા સમયથી હેરાનગતિનો સામનો કરવો પડતાં આખરે પ્રદ્યુમ્નનગર પોલીસમાં ફરિયાદ નોંધાવવામાં આવી છે. ફરિયાદના આધારે પોલીસે સોસાયટીમાં રહેતા હાર્દિક પોપટ સામે ગુનો નોંધી તેની ધરપકડ માટે તજવીજ હાથ ધરી છે.
ફરિયાદ મુજબ, તા. 27 મે, 2026ના રોજ બપોરના સમયે પરિણીતા ઘરે હતી અને તેમના પતિ નોકરી પર ગયા હતા ત્યારે આરોપી હાર્દિક પોપટે પરિણીતા તથા તેના પતિના મોબાઇલ નંબર સાથે અભદ્ર અને અપમાનજનક કોમેન્ટ લખી પોસ્ટર તૈયાર કરી સોસાયટીના પ્રવેશદ્વાર પાસે લગાવ્યા હતા. આ ઘટનાની તે સમયે પોલીસ સ્ટેશનમાં લેખિત જાણ પણ કરવામાં આવી હતી. પરિણીતાએ વધુમાં આક્ષેપ કર્યો છે કે ત્યારબાદ પણ આરોપી અવારનવાર તેણી પોતાના પુત્રોને સ્કૂલ બસમાં બેસાડવા જાય અથવા બજારમાં ખરીદી કરવા નીકળે ત્યારે તેનો પીછો કરતો હતો. આરોપી પરિણીતા, તેના પતિ અને બાળકોના ફોટા પાડી તેમાં બીભત્સ કોમેન્ટ ઉમેરી સોશિયલ મીડિયા પર શેર કરી માનસિક હેરાનગતિ પહોંચાડતો હતો.
આ પ્રકારનું કૃત્ય બંધ કરવા માટે પરિણીતાએ આરોપીને સમજાવવાનો પ્રયાસ કરતાં તે ઉશ્કેરાઈ ગયો હતો અને જો આ બાબતે કોઈને જાણ કરશે તો તેણી, તેના પતિ તેમજ બાળકોને જાનથી મારી નાખવાની ધમકી આપી હોવાનું પણ ફરિયાદમાં જણાવાયું છે. ફરિયાદ મુજબ, ગઈકાલે પણ આરોપીએ સોસાયટીના વોટ્સએપ ગ્રુપમાં અભદ્ર કોમેન્ટ પોસ્ટ કરતાં કંટાળેલી પરિણીતા ફરી પોલીસનો આશરો લેવા પહોંચી હતી. સમગ્ર મામલે પ્રદ્યુમ્નનગર પોલીસે ગુનો નોંધી આરોપીને ઝડપી પાડવા માટે વધુ તપાસ અને કાર્યવાહી શરૂ કરી છે.
