ઉપલેટામાં ચોરીના બે મોટરસાયકલ સાથે આરોપી ઝડપાયો
એક લાખનો મુદામાલ પોલીસે કબ્જે કર્યો
અગ્ર ગુજરાત, ધોરાજી
રાજકોટ ગ્રામ્ય પોલીસના માર્ગદર્શન હેઠળ ઉપલેટા પોલીસે વાહનચોરીના બે અલગ-અલગ ગુનાઓનો સફળ ભેદ ઉકેલી એક આરોપીની ધરપકડ કરી છે. પોલીસે આરોપી પાસેથી કુલ રૂ. 1 લાખની કિંમતની બે ચોરાઉ મોટરસાયકલ કબજે કરીને આગળની કાયદેસરની કાર્યવાહી હાથ ધરી છે.
તપાસ દરમિયાન પોલીસને ઉપલેટા તાલુકા ના હાડફોડી ગામના રહેવાસી વિજયભાઈ જેન્તીલાલ મુરીયાણા (ઉ.વ. 29)ની સંડોવણી અંગે માહિતી મળી હતી. પોલીસે તેને ઝડપી પૂછપરછ કરતા બે અલગ-અલગ મોટરસાયકલ ચોરીના ગુનાઓનો ભેદ ખુલ્યો હતો. પ્રથમ ગુનામાં પોલીસે GJ-10-AK-3194 નંબરની સ્પ્લેન્ડર પ્લસ મોટરસાયકલ, જેની કિંમત અંદાજે રૂ. 20,000 છે, કબજે કરી હતી.
બીજા ગુનામાં GJ-03-PF-7754 નંબરની હીરો હોન્ડા મોટરસાયકલ, જેની કિંમત અંદાજે રૂ. 80,000 છે, તે પણ આરોપીના કબજામાંથી મળી આવી હતી. તપાસમાં સામે આવ્યું હતું કે આરોપીએ આ મોટરસાયકલ મિત્રને ચલાવવા માટે આપી હતી અને ત્યારબાદ પોતાના પિતાને ખોટી માહિતી આપી મોટરસાયકલ ચોરી થઈ હોવાનો બનાવ ઉભો કરવાનો પ્રયાસ કર્યો હતો. પોલીસે ઊંડાણપૂર્વક તપાસ કરતાં સમગ્ર હકીકત બહાર આવી હતી.
પોલીસે બંને ગુનાઓમાં કુલ રૂ. 1,00,000ની કિંમતની બે મોટરસાયકલ કબજે કરી આરોપી સામે ભારતીય ન્યાય સંહિતા (BNS)-2023ની કલમ 303(2) હેઠળ નોંધાયેલા ગુનાઓમાં વધુ તપાસ શરૂ કરી છે. આ સમગ્ર કામગીરી પોલીસ ઇન્સપેકટર એચ.એમ.ધાધલ તથા એ.એસ.આઇ. નિલેશભાઇ નાગદાનભાઇ ચાવડા, પંકજસિંહ પ્રભાતસિંહ જાડેજા, રાજદીપસિંહ બળુભા તથા પો હેડકોન્સ. મનસુખભાઇ કેસાભાઇ રંગપરા, પો.કોન્સ. શક્તિસિંહ મહાવીરસિંહ જાડેજા, વિપુલભાઇ ધીરૂભાઇ, રાહુલ માલાભાઇ સહિતની ટીમે સફળતાપૂર્વક પાર પાડી હતી.
