લોકસભામાં આજે એન્ટી પેપર લીક બિલ રજૂ

પેપર લીક સામે મોદી સરકારનો મોટો પ્રહાર

લોકસભામાં આજે એન્ટી પેપર લીક બિલ રજૂ

10 વર્ષ સુધીની જેલ, રૂ.10 કરોડના દંડ અને ફાસ્ટટ્રેક કોર્ટની જોગવાઈ; 40 કલાકની ચર્ચા વચ્ચે સરકાર-વિપક્ષ સામસામે

અગ્ર ગુજરાત, નવી દિલ્હી

દેશભરમાં નીટ સહિતની વિવિધ ભરતી અને સ્પર્ધાત્મક પરીક્ષાઓમાં થયેલા પેપર લીકના બનાવોને લઈને ઉઠેલા ભારે જનઆક્રોશ બાદ કેન્દ્ર સરકારે હવે કડક કાયદાકીય પગલું ભરવાનું નક્કી કર્યું છે. વડાપ્રધાન નરેન્દ્ર મોદીએ અગાઉ કરેલી જાહેરાતને અમલમાં મૂકતા આજે લોકસભામાં એન્ટી પેપર લીક બિલ રજૂ કરવામાં આવશે. કેન્દ્ર સરકારનો દાવો છે કે આ કાયદો પરીક્ષા વ્યવસ્થામાં પારદર્શિતા વધારશે અને પેપર લીકના સંગઠિત રેકેટ પર કડક કાર્યવાહીનો માર્ગ મોકળો કરશે.
નવી શિક્ષણ નીતિ અને યુવા બાબતો સાથે સંકળાયેલા મંત્રી ડૉ. જીતેન્દ્રસિંહ લોકસભામાં આ બિલ રજૂ કરશે. બિલ પર લાંબી ચર્ચા માટે લગભગ 40 કલાકનો સમય ફાળવવામાં આવ્યો હોવાનું જાણવા મળે છે. સરકાર તરફથી ભાજપ અને એનડીએના યુવા સાંસદોને ચર્ચામાં આગળ રાખવાની રણનીતિ અપનાવવામાં આવી છે, જ્યારે વિપક્ષ પણ સરકારને અનેક મુદ્દે ઘેરવાની તૈયારીમાં હોવાનું માનવામાં આવે છે.
બિલની સૌથી મહત્વપૂર્ણ જોગવાઈઓમાં પેપર લીકના ગુનાઓની તપાસ બે મહિનામાં પૂર્ણ કરવાની ફરજિયાત સમયમર્યાદા, આવા કેસોની ઝડપી સુનાવણી માટે ફાસ્ટટ્રેક કોર્ટની રચના અને દોષિતોને ઓછામાં ઓછી પાંચ વર્ષથી લઈને વધુમાં વધુ 10 વર્ષની સજાની જોગવાઈનો સમાવેશ થાય છે. ઉપરાંત સંગઠિત રીતે પેપર લીકના ગુનામાં સંડોવાયેલા લોકો સામે સાત વર્ષની જેલ અને રૂ.10 કરોડ સુધીના દંડની જોગવાઈ પણ કરવામાં આવી છે. સરકારનું માનવું છે કે છેલ્લા કેટલાક વર્ષોમાં પરીક્ષાઓમાં ગેરરીતિઓના કારણે લાખો યુવાનોના ભવિષ્ય સાથે ચેડાં થયા છે. તેથી કડક કાયદા દ્વારા પેપર લીક માફિયાઓને કાબૂમાં લેવા જરૂરી બન્યું છે. તાજેતરમાં જ કેન્દ્ર સરકારે પરીક્ષા સુરક્ષા વ્યવસ્થાને વધુ મજબૂત બનાવવા માટે ટાસ્ક ફોર્સની રચનાની પણ જાહેરાત કરી હતી.
આ બિલ અંગેની ચર્ચામાં ભાજપ તરફથી બાંસુરી સ્વરાજ, તેજસ્વી સુર્યા, શ્રીકાંત શિંદે, સુનિલ તટકરે, અનુપ્રિયા પટેલ અને અરુણ ભારતી સહિતના યુવા સાંસદો સરકારનો પક્ષ રજૂ કરશે. બીજી તરફ વિપક્ષ પરીક્ષા વ્યવસ્થાની ખામીઓ, અગાઉ થયેલા પેપર લીક અને જવાબદારીના મુદ્દે સરકારને ઘેરવાનો પ્રયાસ કરશે. આ દરમિયાન નવા શિક્ષણમંત્રી પ્રહલાદ જોષી માટે પણ સંસદનું આ સત્ર મહત્વપૂર્ણ માનવામાં આવી રહ્યું છે. શિક્ષણ મંત્રાલયની જવાબદારી સંભાળ્યા બાદ તેઓ પ્રથમ વખત પ્રશ્નકાળમાં સભ્યોના પ્રશ્નોના જવાબ આપશે. શનિવારે તેમણે મંત્રાલયના ઉચ્ચ અધિકારીઓ સાથે બેઠકો યોજીને પરીક્ષા વ્યવસ્થાની સમીક્ષા પણ કરી હતી. બીજી તરફ રાજ્યસભામાં વંદે માતરમ સંબંધિત બિલ પર ચર્ચા હાથ ધરાશે. તેમાં રાષ્ટ્રીય ગીતના અપમાનને લઈને દંડાત્મક જોગવાઈનો પણ સમાવેશ કરવામાં આવ્યો છે.
એન્ટી પેપર લીક બિલ માત્ર કડક સજાનો કાયદો નથી, પરંતુ પરીક્ષા વ્યવસ્થામાં વિશ્વાસ પુનઃસ્થાપિત કરવાનો પ્રયાસ છે. છેલ્લા કેટલાક વર્ષોમાં નીટ, ભરતી પરીક્ષાઓ અને અન્ય સ્પર્ધાત્મક પરીક્ષાઓમાં પેપર લીકના બનાવોએ લાખો યુવાનોમાં અસંતોષ ફેલાવ્યો હતો. જોકે માત્ર કડક સજાની જોગવાઈ પૂરતી નહીં બને, પરંતુ પ્રશ્નપત્રોની સુરક્ષા, ડિજિટલ મોનિટરિંગ, પરીક્ષા કેન્દ્રોની જવાબદારી અને તપાસ એજન્સીઓની કાર્યક્ષમતા પણ એટલી જ મહત્વપૂર્ણ રહેશે. જો કાયદાનો અસરકારક અમલ થશે તો ભરતી અને પરીક્ષા પ્રક્રિયા વધુ વિશ્વસનીય બની શકે છે.

બિલની મુખ્ય જોગવાઈઓ

* કડક સજાથી માફિયાઓ પર લગામ

* ઓછામાં ઓછી 5 વર્ષની જેલ

* વધુમાં વધુ 10 વર્ષની સજા

* રૂ.10 કરોડ સુધીનો દંડ

* સંગઠિત ગુનામાં 7 વર્ષની જેલ

* ફાસ્ટટ્રેક કોર્ટમાં ઝડપી સુનાવણી

બે મહિનામાં તપાસ પૂર્ણ, સમયબદ્ધ તપાસ પર ભાર

બિલ મુજબ પેપર લીકના કેસોની તપાસ બે મહિનામાં પૂર્ણ કરવાનો પ્રયાસ કરવામાં આવશે. લાંબા સમય સુધી તપાસ લટકતી રહે તેવી સ્થિતિ ટાળવા ખાસ જોગવાઈ કરવામાં આવી છે.

યુવા સાંસદો સરકારનો પક્ષ રજૂ કરશે

ભાજપ અને એનડીએએ બાંસુરી સ્વરાજ, તેજસ્વી સુર્યા, શ્રીકાંત શિંદે, અનુપ્રિયા પટેલ સહિતના યુવા સાંસદોને બિલ પર ચર્ચા માટે મેદાનમાં ઉતારવાનો નિર્ણય કર્યો છે.

નવા શિક્ષણમંત્રીની અગ્નિપરીક્ષા, પ્રહલાદ જોષી પ્રથમ વખત પ્રશ્નકાળમાં

શિક્ષણમંત્રી બન્યા બાદ પ્રહલાદ જોષી પ્રથમ વખત સંસદમાં શિક્ષણ વિભાગ સંબંધિત પ્રશ્નોના જવાબ આપશે. તેથી આ સત્ર તેમની કામગીરી માટે મહત્વપૂર્ણ માનવામાં આવી રહ્યું છે.

ટાસ્ક ફોર્સ પણ કરશે દેખરેખ, પરીક્ષા સુરક્ષા માટે નવી વ્યવસ્થા

કેન્દ્ર સરકારે તાજેતરમાં પરીક્ષા વ્યવસ્થામાં પારદર્શિતા વધારવા અને સુરક્ષા મજબૂત કરવા માટે વિશેષ ટાસ્ક ફોર્સની રચનાની જાહેરાત કરી છે.

વિપક્ષની નજર સરકાર પર, અમલનો મુદ્દો બનશે ચર્ચાનું કેન્દ્ર

વિપક્ષનું માનવું છે કે માત્ર કાયદો બનાવવાથી સમસ્યાનો અંત આવશે નહીં. ભરતી પ્રક્રિયામાં પારદર્શિતા, જવાબદારી અને ટેક્નોલોજી આધારિત સુરક્ષા પણ એટલી જ જરૂરી છે.

રાજ્યસભામાં વંદે માતરમ બિલ, અપમાન સામે દંડની જોગવાઈ

લોકસભામાં એન્ટી પેપર લીક બિલ રજૂ થવાની સાથે રાજ્યસભામાં ‘વંદે માતરમ’ સંબંધિત બિલ પર ચર્ચા થશે, જેમાં રાષ્ટ્રીય ગીતના અપમાન સામે દંડાત્મક જોગવાઈનો પ્રસ્તાવ કરવામાં આવ્યો છે.