બામણબોર પાસે 7.24 લાખના 14.485 કિલો ગાંજા સાથે યુવક અને સગીર ઝડપાયા
ઓડિશાથી રાજકોટ સુધી ગાંજાની સપ્લાયનો ભાંડો ફોડતું SOG ; હિતેષ ગોહેલની શોધખોળ, અગાઉ પણ એક ખેપ માર્યાની કબૂલાત
અગ્ર ગુજરાત, રાજકોટ
શહેરમાં માદક પદાર્થોની હેરાફેરી રોકવા માટે પોલીસ દ્વારા ચલાવવામાં આવી રહેલી ‘સે નો ટુ ડ્રગ્સ’ ઝુંબેશ અંતર્ગત રાજકોટ શહેર એસઓજીએ વધુ એક મહત્વપૂર્ણ સફળતા મેળવી છે. બામણબોર નજીક અમદાવાદ-રાજકોટ હાઇવે પરથી રૂ. 7.24 લાખની કિંમતનો 14.485 કિલોગ્રામ ગાંજો જપ્ત કરી એક યુવક અને તેના સાથેના સગીરને ઝડપી લેવામાં આવ્યા છે. પ્રાથમિક પૂછપરછમાં આ ગાંજો ઓડિશાથી રાજકોટ લાવવામાં આવ્યો હોવાનું તેમજ અગાઉ પણ આવી જ એક ખેપ સફળતાપૂર્વક પહોંચાડ્યાની માહિતી સામે આવતા સમગ્ર નેટવર્ક સુધી પહોંચવા પોલીસે તપાસ વધુ તેજ કરી છે.
મળતી માહિતી મુજબ એસઓજીની ટીમ પેટ્રોલિંગ દરમિયાન હતી ત્યારે હેડ કોન્સ્ટેબલ હરદેવસિંહ જાડેજા, ધર્મેન્દ્રસિંહ ઝાલા, યોગરાજસિંહ ગોહિલ અને કોન્સ્ટેબલ અનોપસિંહ ઝાલાને ચોક્કસ બાતમી મળી હતી કે બે શખ્સો મોટી માત્રામાં માદક પદાર્થ લઈને બામણબોર તરફથી રાજકોટ આવી રહ્યા છે. બાતમીના આધારે ટીમે બામણબોરથી આગળ આવેલા અમદાવાદ-રાજકોટ હાઇવે પર રામદેવ હોટલ નજીક વોચ ગોઠવી હતી.
થોડા સમય બાદ શંકાસ્પદ હાલતમાં પસાર થતાં બે વ્યક્તિઓને અટકાવી તેમની પાસે રહેલા પોટલાની તપાસ કરવામાં આવી હતી. તપાસ દરમિયાન લીલા રંગનો શંકાસ્પદ પદાર્થ મળી આવતા એફએસએલ અધિકારી સમીર જોષીની મદદ લેવામાં આવી હતી. પ્રાથમિક પરીક્ષણમાં તે ગાંજો હોવાનું સ્પષ્ટ થતાં પોલીસે તેનો જથ્થો કબજે કરી વજન કર્યું હતું. કુલ 14.485 કિલોગ્રામ ગાંજાની બજાર કિંમત રૂ. 7,24,250 આંકવામાં આવી હતી. સાથે જ બંને પાસેથી બે મોબાઇલ ફોન પણ જપ્ત કરવામાં આવ્યા હતા. આ કેસમાં પોલીસે વનરાજ ઉર્ફે ટકો રવજીભાઈ ઉર્ફે સવજીભાઈ હાંડા (ઉ.વ. 21), રહે. આરએમસી ક્વાર્ટર, બાલાજી હોલ પાછળ, રાજકોટ તેમજ તેની સાથેના એક સગીરને કસ્ટડીમાં લઈ એનડીપીએસ એક્ટ હેઠળ એરપોર્ટ પોલીસ સ્ટેશનમાં ગુનો નોંધાવ્યો છે.
પોલીસની પૂછપરછ દરમિયાન વનરાજે પોતે માત્ર કેરિયર તરીકે કામ કરતો હોવાની માહિતી આપી હતી. તેના જણાવ્યા મુજબ રાજકોટના હિતેષ ગોહેલના કહેવા મુજબ ઓડિશાથી ગાંજાની ખેપ લાવવામાં આવી હતી અને આ બદલ તેને નક્કી કરેલી રકમ ચૂકવવામાં આવતી હતી. એટલું જ નહીં, અગાઉ પણ આવી જ એક ખેપ રાજકોટ સુધી પહોંચાડવામાં સફળતા મળી હોવાનું તેણે જણાવ્યું હોવાનું પોલીસ સૂત્રોએ જણાવ્યું છે. હાલ આ નિવેદનની સત્યતા ચકાસવા તેમજ સમગ્ર સપ્લાય ચેઇન સુધી પહોંચવા પોલીસે રિમાન્ડ મેળવવાની તજવીજ હાથ ધરી છે. ડીસીપી ક્રાઇમ જગદીશ બાંગરવા અને એસીપી ક્રાઇમ ભરત બી. બસીયાના માર્ગદર્શન હેઠળ એસઓજી પીઆઇ એન.બી. ચૌધરી, પીએસઆઇ વી.વી. ધ્રાંગુ સહિતની ટીમે આ સફળ કાર્યવાહી અંજામ આપી હતી. હવે પોલીસનું મુખ્ય ધ્યાન ફરાર હિતેષ ગોહેલને ઝડપી સમગ્ર ડ્રગ્સ રેકેટનો પર્દાફાશ કરવા પર કેન્દ્રિત થયું છે. આ કાર્યવાહીથી શહેરમાં નશીલા પદાર્થોના ગેરકાયદે વેપારમાં સંડોવાયેલા તત્વોમાં ફફડાટ વ્યાપી ગયો છે.
