ફેસબુકની વેઇટ લોસ જાહેરાત થકી રાજકોટની વૃદ્ધા પાસેથી 84.38 લાખની સાયબર ઠગાઈ
NUTRICIA HEALTHCAREના નામે બે વર્ષ સુધી જુદા-જુદા બહાનાં હેઠળ રૂપિયા પડાવ્યા; રિફંડ અપાવવાના નામે આરબીઆઈ અધિકારી અને હાઈકોર્ટના નકલી દસ્તાવેજો બતાવી વધુ છેતરપિંડી
અગ્ર ગુજરાત, રાજકોટ
સોશિયલ મીડિયા પર દેખાતી આકર્ષક જાહેરાતો અને ઓનલાઈન હેલ્થ પ્રોડક્ટ્સ મંગાવવાનો ટ્રેન્ડ હવે સાયબર ઠગો માટે કમાણીનું મોટું સાધન બની રહ્યો છે. રાજકોટમાં 62 વર્ષીય વૃદ્ધા સાથે બનેલી રૂ.84.38 લાખની સાયબર છેતરપીંડીની ઘટનાએ ફરી એકવાર ચેતવણી આપી છે કે ફેસબુક કે અન્ય સોશિયલ મીડિયા પર દેખાતી અજાણી લિંકો પર વિશ્વાસ કરવો કેટલો જોખમી બની શકે છે. વજન ઘટાડવાની હર્બલ દવા ખરીદવાની સામાન્ય ઈચ્છાએ વૃદ્ધાને બે વર્ષ સુધી ચાલેલી સાયબર ગેંગની જાળમાં ફસાવી દીધા હતા.
સાયબર ક્રાઈમ પોલીસમાં નોંધાયેલી ફરિયાદ મુજબ કાલાવડ રોડ વિસ્તારની યોગીદર્શન સોસાયટીમાં રહેતી કુસુમબેન પ્રદીપભાઈ ટાંકે ડો. અમન મિશ્રા, શિવમ શર્મા, ડો. મુકુલ સિંહ, હર્ષવર્ધન, દીપક ચોપડા સહિત અનેક અજાણ્યા બેંક ખાતાધારકો સામે ફરિયાદ નોંધાવી છે. પોલીસના જણાવ્યા મુજબ આરોપીઓએ અલગ-અલગ ઓળખ અને મોબાઈલ નંબરનો ઉપયોગ કરીને વિશ્વાસ જીત્યો અને તબક્કાવાર લાખો રૂપિયા પડાવ્યા હતા.
ફરિયાદ અનુસાર વર્ષ 2024 દરમિયાન કુસુમબેન ફેસબુક પર રિલ્સ જોતા હતા ત્યારે વેઇટ લોસ માટેની હર્બલ દવાની જાહેરાત જોવા મળી હતી. જાહેરાત સાથે આપેલી લિંક ખોલીને તેમણે પોતાનું નામ, સરનામું અને મોબાઈલ નંબર ભર્યો હતો. બીજા જ દિવસે પોતાને NUTRICIA HEALTHCAREના ડોક્ટર તરીકે ઓળખાવનાર વ્યક્તિનો ફોન આવ્યો હતો. શરૂઆતમાં માત્ર એક મહિનાની દવા માટે રૂ.4 હજાર માંગવામાં આવ્યા હતા. ત્યારબાદ વધુ અસરકારક સારવાર, લાંબા કોર્સ અને ખાસ દવાઓના બહાને વારંવાર અલગ-અલગ રકમ ભરાવવામાં આવી હતી.
આરોપીઓએ માત્ર દવા વેચવાથી સંતોષ માન્યો નહીં પરંતુ દરેક તબક્કે નવી વાતો ઉભી કરીને વધુ નાણાં પડાવ્યા હતા. ક્યારેક વધુ શક્તિશાળી દવા મોકલવાની વાત કરવામાં આવી તો ક્યારેક સારવાર પૂર્ણ કરવા ખાસ પેકેજ લેવાની સલાહ આપવામાં આવી. વિશ્વાસ જાળવી રાખવા માટે કેટલીક દવાઓ કુરિયર મારફતે ઘરે પણ મોકલવામાં આવી હતી. પરિણામ ન મળતાં ફરી નવી દવા અને નવા ખર્ચની વાતો શરૂ થતી રહી. આ દરમિયાન ફરિયાદીએ પોતાની બહેન, પાડોશી અને પુત્રના મિત્ર પાસેથી પણ રૂપિયા ઉછીના લઈને આરોપીઓના જણાવ્યા મુજબ વિવિધ ખાતાઓમાં જમા કરાવ્યા હતા.
લગભગ છ મહિનાની આ પ્રક્રિયા બાદ આરોપીઓએ નવો ખેલ શરૂ કર્યો. કંપનીમાં જમા કરાવેલી રકમ પરત મળશે તેવી લાલચ આપવામાં આવી, પરંતુ તેના માટે પહેલા પ્રોસેસિંગ ફી, પછી પેનલ્ટી, ફાઈલ ચાર્જ, જીએસટી અને અન્ય સરકારી ખર્ચના નામે સતત વધુ રકમ માંગવામાં આવતી રહી. પોતાને આરબીઆઈનો અધિકારી ગણાવનાર હર્ષવર્ધને વિશ્વાસ વધારવા માટે તેલંગાણા હાઈકોર્ટનો કથિત ઓર્ડર અને વિવિધ દસ્તાવેજોની પીડીએફ પણ મોકલી હતી. અંગ્રેજીમાં આવેલા આ દસ્તાવેજોને સાચા માની ફરિયાદી સતત રૂપિયા ચૂકવતા રહ્યા.
આ સમગ્ર કૌભાંડનો ભાંડો ત્યારે ફૂટ્યો જ્યારે ફરિયાદીએ મળેલો કથિત હાઈકોર્ટનો ઓર્ડર સમજવા માટે પોતાના ભાણેજને મોકલ્યો હતો. આ બાબત પરિવારના અન્ય સભ્યો સુધી પહોંચતાં દુબઈમાં રહેતા તેમના પુત્રને સમગ્ર હકીકતની જાણ થઈ. પુત્રે તમામ વિગતો સાંભળ્યા બાદ માતાને સમજાવ્યું કે તેઓ વ્યવસ્થિત રીતે સાયબર ઠગોના જાળમાં ફસાયા છે અને હવે કોઈ રિફંડ મળવાનો નથી. ત્યારબાદ બે વર્ષ દરમિયાન થયેલા તમામ બેંક ટ્રાન્ઝેક્શનની વિગતો એકત્ર કરીને ફરિયાદીએ સૌપ્રથમ સાયબર હેલ્પલાઇન 1930 પર સંપર્ક કર્યો અને પછી સાયબર ક્રાઈમ પોલીસ સ્ટેશનમાં સત્તાવાર ફરિયાદ નોંધાવી હતી.
ફરિયાદના આધારે સાયબર ક્રાઈમ પોલીસે ગુનો નોંધી તપાસ શરૂ કરી છે. વિવિધ બેંક ખાતાઓમાં ગયેલી રકમ, મોબાઈલ નંબર, ડિજિટલ ટ્રેલ અને અન્ય ટેક્નિકલ પુરાવાના આધારે આરોપીઓ સુધી પહોંચવાના પ્રયાસો હાથ ધરવામાં આવ્યા છે. પોલીસનું કહેવું છે કે સોશિયલ મીડિયા પર દેખાતી અજાણી જાહેરાતો, વેઇટ લોસ કે અન્ય ચમત્કારિક દવાઓના દાવા અને રિફંડના બહાનાં હેઠળ રૂપિયા માંગતા અજાણ્યા લોકો સામે નાગરિકોએ સાવચેત રહેવું જોઈએ. કોઈપણ શંકાસ્પદ ઓનલાઈન વ્યવહાર થાય તો વિલંબ કર્યા વગર 1930 હેલ્પલાઇન અથવા નજીકના સાયબર ક્રાઈમ પોલીસ સ્ટેશનનો સંપર્ક કરવો જરૂરી છે.
