વિગ પહેરી પોલીસને ચકમો આપતો ગાંજાનો વેપારી ઝડપાયો: શાપર અને જેતપુરમાં પોલીસની કાર્યવાહી
શાપરમાં દોઢ કિલો ગાંજા સાથે રૂ.1.11 લાખનો મુદ્દામાલ જપ્ત, જ્યારે જેતપુરમાં મકાનમાંથી ગાંજો, વજન કાંટો અને વેચાણની સાધનસામગ્રી મળી આવી
અગ્ર ગુજરાત, રાજકોટ
રાજકોટ ગ્રામ્ય પોલીસ દ્વારા માદક પદાર્થોના ગેરકાયદે વેપાર સામે શરૂ કરાયેલા અભિયાન હેઠળ શાપર અને જેતપુરમાં બે અલગ-અલગ સફળ કાર્યવાહી હાથ ધરવામાં આવી છે. બંને દરોડામાં ગાંજાનો જથ્થો ઝડપાઈ આવતા એનડીપીએસ એક્ટ હેઠળ ગુના નોંધી આરોપીઓ સામે કાયદેસરની કાર્યવાહી શરૂ કરવામાં આવી છે. ખાસ કરીને શાપરમાં ઝડપાયેલ આરોપી પોલીસની નજરમાંથી બચવા માટે માથાની ટાલ ઢાંકવા વિગ પહેરી વેશપલટો કરી ખુલ્લેઆમ ગાંજાનું વેચાણ કરતો હોવાનું સામે આવ્યું છે.
મળતી વિગતો મુજબ રાજકોટ ગ્રામ્ય એસપી વિજયસિંહ ગુર્જરના માર્ગદર્શન હેઠળ માદક પદાર્થોના વેચાણ અને હેરાફેરીને રોકવા માટે તમામ પોલીસ મથકોને સઘન ચેકિંગ અને બાતમીના આધારે કાર્યવાહી કરવા સૂચનાઓ આપવામાં આવી છે. તે અનુસંધાને શાપર પોલીસ સ્ટેશનના પીઆઈ આર.બી. રાણા અને તેમની ટીમને ચોક્કસ માહિતી મળી હતી કે વેરાવળ-પડવલા રોડ પર પાવર હાઉસની પાછળ એક વ્યક્તિ બાઈક પર બેસી ગાંજાનું વેચાણ કરી રહ્યો છે.
બાતમીના આધારે પોલીસની ટીમે સ્થળ પર દરોડો પાડી આરોપીને રંગેહાથ ઝડપી લીધો હતો. તપાસ દરમિયાન જાણવા મળ્યું કે આરોપી સલીમ ઉર્ફે હનીફ હમીર હીંગોરા (ઉ.વ. 44), મૂળ જૂનાગઢનો અને હાલ શાપરમાં રહેતો, માથાની ટાલ છુપાવવા વિગ પહેરીને વેશપલટો કરતો હતો જેથી લોકો તેમજ પોલીસને શંકા ન જાય. તેની પાસેથી 1 કિલો 594 ગ્રામ ગાંજાનો જથ્થો, એક બાઈક અને મોબાઈલ મળી કુલ અંદાજે રૂ.1.11 લાખનો મુદ્દામાલ કબજે કરવામાં આવ્યો હતો. હાલ આરોપી ગાંજો ક્યાંથી લાવ્યો અને કોને સપ્લાય કરવાનો હતો તે અંગે પોલીસે વધુ પૂછપરછ શરૂ કરી છે તેમજ તેના રિમાન્ડ મેળવવા તજવીજ હાથ ધરી છે.
આ સમગ્ર કામગીરીમાં પીઆઈ આર.બી. રાણાની રાહબરી હેઠળ પીએસઆઈ આર.ડી. સોલંકી, એએસઆઈ દિવ્યરાજસિંહ સરવૈયા, હેડ કોન્સ્ટેબલ પ્રતિપાલસિંહ રાણા, મહેન્દ્રભાઈ ધાધલ, દિનેશભાઈ ખાટરીયા સહિતનો સ્ટાફ જોડાયો હતો.
બીજી તરફ જેતપુર સીટી પોલીસને પણ માદક પદાર્થોના વેચાણ અંગે મળેલી બાતમીના આધારે સફળતા મળી હતી. પેટ્રોલિંગ દરમિયાન પીએસઆઈ બી.ડી. મારુ અને તેમની ટીમને હેડ કોન્સ્ટેબલ સાગર મકવાણા મારફતે માહિતી મળી હતી કે ખીરસરા રોડ પર રહેતા સાનીર ઉર્ફે શાહનવાજ યુસુફશા શાહમદારના મકાનમાં ગાંજાનો જથ્થો રાખવામાં આવ્યો છે.
આ માહિતીના આધારે પોલીસે મકાન પર દરોડો પાડતાં અંદરથી 107 ગ્રામ ગાંજો મળી આવ્યો હતો. ઉપરાંત ગાંજાનું વેચાણ કરવા ઉપયોગમાં લેવાતી પ્લાસ્ટિકની કોથળીઓ, ઇલેક્ટ્રિક વજન કાંટો અને મોબાઈલ પણ કબજે કરવામાં આવ્યા હતા. આરોપી સાનીર ઉર્ફે શાહનવાજ યુસુફશા શાહમદાર (ઉ.વ. 28)ની ધરપકડ કરી તેની સામે એનડીપીએસ એક્ટ હેઠળ ગુનો નોંધવામાં આવ્યો છે.
પોલીસના જણાવ્યા મુજબ બંને કાર્યવાહી માદક પદાર્થોના ગેરકાયદે વેપાર સામેની ઝુંબેશનો એક ભાગ છે. ઝડપાયેલા આરોપીઓના સંપર્કો, સપ્લાય ચેઇન અને અન્ય સંડોવાયેલા વ્યક્તિઓ સુધી પહોંચવા માટે તપાસ વધુ તેજ કરવામાં આવી છે. આગામી દિવસોમાં પણ આવા તત્ત્વો સામે સતત કાર્યવાહી ચાલુ રહેશે તેમ પોલીસે જણાવ્યું છે.
