બે દિવસ ભારે વરસાદનું રેડ એલર્ટ
ગુજરાતમાં મેઘતાંડવ, નર્મદામાં બે કલાકમાં 5 ઇંચ વરસાદ
વડોદરા-નર્મદા સહિત અનેક જિલ્લાઓ જળબંબાકાર; સ્થળાંતરની કામગીરી શરૂ, આગામી 48 કલાક અત્યંત મહત્વના
અગ્ર ગુજરાત, રાજકોટ
ગુજરાતમાં આગામી બે દિવસ ભારે વરસાદની આગાહી વચ્ચે મેઘરાજાએ ધમાકેદાર બેટિંગ શરૂ કરતાં રાજ્યના અનેક જિલ્લાઓમાં જળબંબાકાર જેવી સ્થિતિ સર્જાઈ છે. નર્મદા, વડોદરા, આણંદ, છોટા ઉદેપુર, મહિસાગર, તાપી અને સુરત સહિતના જિલ્લાઓમાં ધોધમાર વરસાદથી જનજીવન પ્રભાવિત બન્યું છે. નીચાણવાળા વિસ્તારોમાં પાણી ભરાઈ જતાં અનેક પરિવારોને સુરક્ષિત સ્થળોએ ખસેડવાની કામગીરી હાથ ધરવામાં આવી છે, જ્યારે રાજ્યનું વહીવટી તંત્ર સંપૂર્ણ એલર્ટ મોડ પર આવી ગયું છે.
રાજ્યમાં 2 ઓગસ્ટ સુધી સાર્વત્રિક વરસાદની આગાહી વચ્ચે 31 જુલાઈ અને 1 ઓગસ્ટે ભારે વરસાદનું જોર વધુ રહેવાની ચેતવણી હવામાન વિભાગે આપી છે. મોડીરાતથી શરૂ થયેલો વરસાદ સવાર થતાં જ વધુ તીવ્ર બન્યો હતો. ખાસ કરીને નર્મદા જિલ્લામાં માત્ર બે કલાકમાં પાંચ ઇંચ જેટલો વરસાદ નોંધાતા સાગબારા અને ગરૂડેશ્વર વિસ્તાર પાણીમાં ગરકાવ થઈ ગયા હતા. નાંદોડમાં 3.54 ઇંચ અને તિલકવાડામાં 3.15 ઇંચ વરસાદ વરસતા નદી-નાળાઓમાં નવા નીરની આવક થઈ હતી.
મહિસાગરના બાલાસીનોરમાં 2.64 ઇંચ અને આણંદમાં 2.20 ઇંચ વરસાદ પડતાં અનેક વિસ્તારોમાં પાણી ભરાઈ ગયા હતા. વડોદરામાં પણ બે કલાકમાં આશરે બે ઇંચ વરસાદ પડતાં મુખ્ય માર્ગો પર પાણી ફરી વળ્યા હતા. પૂર જેવી પરિસ્થિતિ સર્જાય તેવી શક્યતાને ધ્યાનમાં રાખીને પાદરા સહિતના નીચાણવાળા વિસ્તારોમાંથી અનેક પરિવારોનું સ્થળાંતર કરવામાં આવ્યું હતું. ગંભીરા ગામની શાળામાં અસરગ્રસ્ત લોકો માટે આશ્રયની વ્યવસ્થા કરવામાં આવી હતી.
છોટા ઉદેપુરના નસવાડીમાં બે ઇંચ વરસાદને કારણે અશ્વિન નદીમાં ઘોડાપુર આવ્યું હતું. બજાર વિસ્તારની દુકાનો ખાલી કરાવવામાં આવી હતી અને સ્ટેટ હાઈવે પર વાહનવ્યવહાર બંધ કરવામાં આવ્યો હતો. આસપાસના ગામોમાં પણ સાવચેતીના પગલાં લેવામાં આવ્યા હતા.
સવારે બે કલાકમાં રાજ્યના 82 તાલુકામાં સામાન્ય ઝાપટાથી લઈને ભારે વરસાદ નોંધાયો હતો. બોરસદ, ડભોઈ, ઉમરેઠ, ઉમરપાડા, વાઘોડિયા, સિનોર, પાદરા અને દેસર સહિતના વિસ્તારોમાં પણ નોંધપાત્ર વરસાદ વરસ્યો હતો. ભારે વરસાદને પગલે અમદાવાદ, વડોદરા, નવસારી સહિતના કેટલાક જિલ્લાઓમાં શાળા-કોલેજોમાં રજા જાહેર કરવામાં આવી હતી.
બીજી તરફ, અલ-નીનોની અસરને કારણે જુલાઈમાં વરસાદ ઓછો રહેશે તેવી ધારણાઓ ખોટી સાબિત થઈ રહી છે. સમગ્ર જુલાઈ દરમિયાન સર્જાયેલી વરસાદી સિસ્ટમોના કારણે રાજ્યમાં સામાન્ય વરસાદ નોંધાયો છે. દેશભરમાં પણ 30 જુલાઈ સુધી સરેરાશ વરસાદ સામાન્ય કરતાં વધુ નોંધાતા કૃષિ અને જળસંગ્રહ માટે રાહતના સંકેતો મળ્યા છે. જોકે આગામી બે દિવસ ભારે વરસાદને કારણે પૂર, પાણી ભરાવા અને નદી કાંઠાના વિસ્તારોમાં જોખમ વધવાની શક્યતા હોવાથી લોકોને સાવચેત રહેવા તંત્ર દ્વારા અપીલ કરવામાં આવી છે.
આગામી 48 કલાક સૌથી વધુ ભારે
હવામાન વિભાગના અનુમાન મુજબ 31 જુલાઈ અને 1 ઓગસ્ટ ગુજરાત માટે સૌથી મહત્વના દિવસો રહેશે. દક્ષિણ ગુજરાત, મધ્ય ગુજરાત અને પૂર્વ પટ્ટાના અનેક જિલ્લાઓમાં ભારેથી અતિભારે વરસાદની શક્યતા વ્યક્ત કરવામાં આવી છે. નીચાણવાળા વિસ્તારોમાં પાણી ભરાવા અને નદી-નાળાઓમાં અચાનક પાણી વધવાનું જોખમ રહેશે.
કયા જિલ્લાઓમાં સૌથી વધુ અસર?
નર્મદા, વડોદરા, છોટા ઉદેપુર, તાપી, સુરત, નવસારી, ડાંગ, વલસાડ, મહિસાગર અને આણંદ જિલ્લામાં ભારે વરસાદનું જોર યથાવત્ રહી શકે છે. કેટલાક વિસ્તારોમાં ટૂંકા સમયમાં ચારથી છ ઇંચ સુધી વરસાદ પડવાની સંભાવના નકારી શકાય નહીં.
નદીઓ-ડેમો પર રહેશે નજર
સતત વરસાદને કારણે નર્મદા સહિતની મુખ્ય નદીઓમાં પાણીની આવક વધશે. ડેમોના જળસ્તરમાં સતત વધારો થવાની શક્યતા હોવાથી જળાશયોનું લેવલ પર તંત્ર સતત નજર રાખશે. જરૂરિયાત મુજબ પાણી છોડવાનો નિર્ણય પણ લેવાઈ શકે છે.
ખેડૂતો માટે રાહત કે ચિંતા?
વરસાદથી ખરીફ પાકને જીવદોરી મળશે અને વાવેતરને ફાયદો થશે. જોકે જ્યાં અતિભારે વરસાદ પડશે ત્યાં કપાસ, મગફળી, સોયાબીન અને શાકભાજીના પાકમાં પાણી ભરાવાથી નુકસાન થવાની શક્યતા રહેશે. ખેડૂતોને ખેતરમાંથી પાણીના નિકાલની યોગ્ય વ્યવસ્થા રાખવાની સલાહ આપવામાં આવી છે.
સૌરાષ્ટ્રમાં પણ વરસાદનો નવો રાઉન્ડ
હાલ ભારે વરસાદનું મુખ્ય જોર મધ્ય અને દક્ષિણ ગુજરાતમાં છે, પરંતુ આગામી દિવસોમાં સૌરાષ્ટ્ર અને ઉત્તર ગુજરાતમાં પણ વરસાદનું પ્રમાણ વધવાની શક્યતા છે. રાજકોટ, જામનગર, જુનાગઢ, અમરેલી અને ભાવનગર જિલ્લામાં મધ્યમથી ભારે વરસાદી ઝાપટા પડી શકે છે.
માછીમારો અને પ્રવાસીઓ માટે ચેતવણી
દરિયાકાંઠે પવનની ગતિ વધવાની સંભાવના હોવાથી માછીમારોને આગામી બે દિવસ દરિયો ન ખેડવાની સલાહ આપવામાં આવી છે. પ્રવાસીઓએ નદી, ધોધ અને જળાશયો નજીક જવાનું ટાળવું તેમજ બિનજરૂરી મુસાફરી ન કરવી જોઈએ.
ચોમાસું હવે સંપૂર્ણ સક્રિય
જુલાઈ દરમિયાન સતત સર્જાયેલી વરસાદી સિસ્ટમોના કારણે ગુજરાતમાં ચોમાસું સંપૂર્ણ સક્રિય બન્યું છે. આગામી સપ્તાહ દરમિયાન પણ રાજ્યના મોટાભાગના વિસ્તારોમાં વરસાદી માહોલ યથાવત્ રહેવાની શક્યતા છે. જેના કારણે જળાશયોમાં પાણીનો સંગ્રહ વધશે, પરંતુ સાથે પૂર અને પાણી ભરાવાના જોખમ સામે સતત સતર્ક રહેવાની જરૂર રહેશે.
