બ્યુટી પાર્લરની નોકરીનું સપનું બતાવી યુવતીને રાજકોટ લાવી દેહવ્યાપારના દલદલમાં ધકેલી
વંથલી પંથકની 20 વર્ષીય યુવતીને વિશ્વાસમાં લેવા પિતાને રૂ.10 હજાર આપ્યા, પ્રેમીને જેલમાંથી છોડાવવા રૂ.4 લાખની જરૂર હોવાનું કહી ગોરખધંધામાં ઉતારી
ત્રણેક મહિનામાં 250થી વધુ ગ્રાહકો અને 28 નાઇટ કરાવ્યાનો ગંભીર આક્ષેપ ; દંપતી સહિત ત્રણ સામે ગુનો
અગ્ર ગુજરાત, રાજકોટ
આધુનિક યુગમાં નોકરી અને ઉજ્જવળ ભવિષ્યના નામે યુવતીઓને ફસાવતી ટોળકીઓ કેટલી સક્રિય બની ગઈ છે તેનો ચોંકાવનારો કિસ્સો રાજકોટમાં સામે આવ્યો છે. વંથલી પંથકની 20 વર્ષીય યુવતીને બ્યુટી પાર્લરમાં સારી નોકરી અપાવવાની લાલચ આપી રાજકોટ બોલાવવામાં આવી અને ત્યારબાદ તેને દેહવ્યાપારના ગોરખધંધામાં ધકેલી દેવામાં આવી હોવાના ગંભીર આક્ષેપો સાથે ભક્તિનગર પોલીસ સ્ટેશનમાં દંપતી સહિત ત્રણ શખ્સો સામે ગુનો નોંધાતા ભારે ચકચાર મચી છે.
ફરિયાદ મુજબ, યુવતીએ વર્ષ 2024 દરમિયાન જુનાગઢમાં બ્યુટી પાર્લરનો કોર્સ કર્યો હતો. અભ્યાસ દરમિયાન જ તેના મિત્રએ રાજકોટમાં સારી નોકરી અપાવવાની ખાતરી આપી હતી. કોર્સ પૂર્ણ થતાં થોડા જ દિવસોમાં મિત્રએ જણાવ્યું કે તે ઓળખતા દંપતી પાસે બ્યુટી પાર્લરમાં કામ મળી જશે. ત્યારબાદ આરોપી દંપતી યુવતીના વતન બંધડા ગામે પહોંચ્યું, જ્યાં તેના પિતાને મહિને રૂ.15 હજાર પગાર આપવાની ખાતરી આપી હતી. વિશ્વાસ જીતવા માટે પિતાને રૂ.10 હજાર રોકડા પણ આપવામાં આવ્યા હતા અને “તમારી દીકરી અમારી સાથે સુરક્ષિત રહેશે” એવી ખાતરી આપી રાજકોટ લઈ જવાઈ હતી.
રાજકોટ લાવ્યા બાદ યુવતીને મિલપરા વિસ્તારમાં આવેલી એચ.આર. કિંગ હોટલમાં ઉતારવામાં આવી હતી. શરૂઆતમાં બધું સામાન્ય લાગતું હતું, પરંતુ બીજા જ દિવસે તેના મિત્રને એક કેસમાં પોલીસ સમક્ષ હાજર કરાવી જેલમાં મોકલવામાં આવ્યો હોવાનું જણાવાયું. ત્યારબાદ આરોપી મહિલાએ યુવતીને કહ્યું કે મિત્રને છોડાવવા માટે અંદાજે ચાર લાખ રૂપિયાનો ખર્ચ થશે અને આ રકમ એકત્ર કરવાની એકમાત્ર રીત દેહવ્યાપાર છે. મિત્ર પ્રત્યેના પ્રેમ અને તેને છોડાવવાની આશામાં યુવતીએ અંતે મજબૂરીમાં હા પાડી હોવાનું ફરિયાદમાં જણાવાયું છે.
યુવતીના આક્ષેપ મુજબ, ત્યારથી તેની જિંદગી નર્ક સમાન બની ગઈ. રાજકોટની વિવિધ હોટલોમાં ગ્રાહકો પાસે મોકલી શરીર સંબંધ બાંધવા માટે દબાણ કરવામાં આવતું હતું. મિલપરાની હોટલ ઉપરાંત બસ સ્ટેન્ડ પાછળની હોટલો અને શહેરની અન્ય જગ્યાઓએ પણ તેને મોકલવામાં આવતી હતી. આરોપીનો ભાઈ તેને એક્ટિવા પર અલગ-અલગ હોટલોમાં લઈ જતો અને પરત મૂકતો હોવાનું પણ ફરિયાદમાં ઉલ્લેખાયું છે.
ફરિયાદમાં વધુ એક ચોંકાવનારો દાવો કરવામાં આવ્યો છે કે લગભગ સાડા ત્રણ મહિનાના ગાળામાં યુવતીને આશરે 250 જેટલા ગ્રાહકો પાસે મોકલવામાં આવી હતી અને 28 નાઇટ પણ કરાવવામાં આવી હતી. ગ્રાહકો પાસેથી મળતી રકમ યુપીઆઈ ક્યૂઆર કોડ મારફતે વસૂલાતી હતી અથવા રોકડ લેવાતી હતી, પરંતુ યુવતીને નક્કી કરેલી કોઈ રકમ ચૂકવવામાં આવી નહોતી. તેને માત્ર લાલચ અને ધમકીઓ વચ્ચે જ કામ કરાવવામાં આવતું હતું.
જ્યારે યુવતી આ ગોરખધંધાથી કંટાળી ગઈ અને કામ કરવાની ના પાડી, ત્યારે આરોપી દંપતીએ તેના પરિવારને પ્રેમ સંબંધની જાણ કરી દેવાની અને દેહવ્યાપારની વાત કહી દેવાની ધમકી આપી હતી. એટલું જ નહીં, ઘરે મોકલી દેવાની પણ ધમકી અપાતી હોવાથી યુવતી સતત ડરના માહોલમાં જીવતી રહી.
બાદમાં યુવતીનો મિત્ર જેલમાંથી છૂટીને આવ્યો અને બંનેએ આ કામ છોડવાનો નિર્ણય કર્યો. આરોપીઓ પાસે પોતાના દસ્તાવેજો અને હિસાબ માંગતાં વિવાદ થયો હતો. આરોપીઓએ હોટલ ખાલી કરી બીજી જગ્યાએ રહેવા મોકલી દીધા, પરંતુ ત્યારબાદ ફોન ઉપાડવાનું પણ બંધ કરી દીધું. અંતે યુવતીના પિતાને સમગ્ર હકીકતની જાણ થતાં અને આરોપીઓની વાતચીતનું રેકોર્ડિંગ સાંભળ્યા બાદ યુવતીએ હિંમત એકઠી કરી ભક્તિનગર પોલીસ સ્ટેશનમાં ફરિયાદ નોંધાવી.
પોલીસે ફરિયાદના આધારે હિરેન કિશોર રૂડકીયા, તેની પત્ની રિદ્ધિ હિરેન રૂડકીયા અને મયુર કિશોર રૂડકીયા સામે ઇમોરલ ટ્રાફિકિંગ, એટ્રોસિટી એક્ટ સહિતની ગંભીર કલમો હેઠળ ગુનો નોંધી તપાસ શરૂ કરી છે. સમગ્ર કેસની વધુ તપાસ ઉચ્ચ અધિકારીઓના માર્ગદર્શન હેઠળ ચાલી રહી છે.
આ ઘટના માત્ર એક યુવતીની આપવીતી નથી, પરંતુ દરેક વાલીઓ માટે લાલબત્તી સમાન છે. સંતાનોને નોકરી, અભ્યાસ કે સારા ભવિષ્યના બહાને અજાણ્યા લોકો પર અંધવિશ્વાસ ન રાખવા અંગે સતત જાગૃત રાખવાની જરૂર છે. થોડા પૈસા, મીઠી વાતો અને મોટા સપનાઓ બતાવી અસામાજિક તત્વો યુવતીઓને કેવી રીતે પોતાના જાળમાં ફસાવે છે તેનું આ પ્રકરણ જીવતું ઉદાહરણ બની રહ્યું છે. હાલમાં પોલીસ સમગ્ર રેકેટની કડીઓ શોધવામાં વ્યસ્ત છે અને તપાસમાં હજુ વધુ ચોંકાવનારા ખુલાસા થવાની શક્યતા વ્યક્ત કરવામાં આવી રહી છે.
