વિદેશમાં 3500થી વધારે કાર્યક્રમ આપનાર ગાયક વિનોદ પટેલે અમેરિકા-જર્મનીમાં મચાવી ધૂમ
ગુજરતી ગીત સંગીત, ગઝલ ભક્તિરસથી શ્રોતા મંત્રમુગ્ધ
અગ્ર ગુજરાત, રાજકોટ
વિશ્વના 35 જેટલા દેશોમાં 3500 કરતા વધારે સંગીતના કાર્યક્રમો રજુ કરનાર આંતરરાષ્ટ્રીય ગાયક કલાકાર વિનોદ પટેલના તાજેતરમાં અમેરિકા અને જર્મની ખાતે ભારતીય ગીત સંગીતના યોજાયેલ કાર્યક્રમોમાં વિદેશની ધરતી ઉપર વસવાટ કરતા ભારતીયો ભારે ભાવવિભોર બન્યા હતા.
બેલ્જિયમના જૈન કલ્ચર સેન્ટર એન્ટરોપ ખાતે દેરાસરમાં વિનોદ પટેલે જૈનસ્તવન, ભક્તિ સંગીત, સોળ સંસ્કાર, માનવજીવન તેમજ રસપ્રદ ગીત સંગીત રજુ કર્યા હતા. પ્રમુખ અરુણ જોગાની આયોજિત આ કાર્યક્રમમાં મનસુખભાઈ પટેલ, જીવદયા વાળા તેમજ કિશોરમામાઍ ભારે જહેમત ઉઠાવી હતી. જ્યારે જર્મનીના બર્લિનમાં આનંદ ભટ્ટ અને કાર્યકરો દ્વારા યોજિત કાર્યક્રમમાં લોક્ડાયરો, લોકગીત, કવિતા, ગઝલ અને હાસ્યરસ પીરસી વિનોદ પટેલે શ્રોતાઓને મંત્રમુગ્ધ કર્યા હતા.
જ્યારે મ્યુનિકના શિવાલયમ ટેમ્પલ ખાતે યોજાયેલા કાર્યક્રમમાં વિનોદ પટેલે હિન્દી ભક્તિ સંગીત, ગુજરાતી ગીતો, શિવસ્તુતિ રજુ કરેલ જ્યારે કાર્યક્રમની સફળતા માટે જિગરભાઈ,તેમજ જૈમિનભાઈઍ જહેમત ઉઠાવી હતી. પોર્ટુગલ લિસ્બન ખાતે શિવમંદિરમાં પ્રમુખ કાન્તીભાઈ દાવડા આયોજિત કાર્યક્રમમાં ગીત સંગીત, ભક્તિરસ પિરસ્યો હતો.
જ્યારે અમેરિકાના કેલિફોર્નિયા ખાતે રાધાકૃષ્ણ ટેમ્પલ ખાતે હિન્દી ભક્તિ સંગીત તેમજ સ્વામિનારાયણ ગુરુકુળ રાજકોટની શાખામાં તેમજ સિકાગો બિ ઍ પી એસ મંદિર ગુરુકુળમાં વિનોદ પટેલે રજુ કરેલ સ્વામિનારાનારાયણ કીર્તન અને ભક્તિરસ કાર્યક્રમ ભાવિકોએ માણ્યો હતો. જ્યારે એટલાન્ટામાં સનાતન મંદિર તેમજ બાલ્ટીમૉર ખાતે ગુજરાતી સમાજ દ્વારા યોજાયેલ વિનોદ પટેલના ગીત સંગીત કાર્યક્રમનો શ્રોતાઓએ લાભ લઈ ભારે સરાહના કરી હતી. આ કાર્યક્રમમાં અતુલભાઈ પટેલ તેમજ ડૉ.નટુભાઈ રાજપરાઍ ભારે જહેમત ઉઠાવી હતી. મેરીલેન્ડ કૃષ્ણમંદિરમાં ભક્તિરસ કાર્યક્રમમાં ડૉ, કિરણ પટેલ, હરીશ ભલાણી ઍ જહેમત ઉઠાવી હતી. નોર્થ કેરાલીના રાલે ખાતે અમે ગુજરાતી ગૃપ દ્વારા હિમાંશુ દેસાઈ, તુષાર બારોટની નિશ્રામાં વિનોદ પટેલે સોળ સંસ્કાર રજુ કરી ભારતીય ધર્મ સંસ્કૃતિની ઝાંકી કરાવી હતી. તેમજ ભક્તિધામ હવેલીમાં ક્રિશ્નગાન રજુ કરી શ્રોતાઓને જુમાવી દીધા હતા.
