રક્ષકના ગણવેશમાં કલંક
શાપરના જમાદારે ત્યકતાનું 6 માસ સુધી કર્યું શારીરિક શોષણ
લગ્નની લાલચ આપી વારંવાર દુષ્કર્મ આચર્યાની ફરિયાદ ; ફરિયાદ નોંધાતાં હેડ કોન્સ્ટેબલ હાર્દિક કેરાળીયા ફરાર, એસસી-એસટી સેલના ડીવાયએસપી તપાસમાં જોડાયા
અગ્ર ગુજરાત, રાજકોટ
કાયદાનું રક્ષણ કરવાની જવાબદારી જેના શિરે છે, તે જ ખાખી વર્દીધારી સામે ગંભીર ગુનાની ફરિયાદ નોંધાતાં પોલીસબેડામાં ચકચાર મચી ગઈ છે. રાજકોટ જિલ્લાના શાપર-વેરાવળ પોલીસ મથકમાં ફરજ બજાવતા હેડ કોન્સ્ટેબલ હાર્દિક જગદીશ કેરાળીયા સામે એક ત્યક્તા મહિલાને લગ્ન કરવાની લાલચ આપી છ મહિના સુધી અલગ-અલગ સ્થળોએ દુષ્કર્મ આચર્યાનો આક્ષેપ થયો છે. ભોગ બનનાર મહિલાની ફરિયાદના આધારે પોલીસે દુષ્કર્મ સંબંધિત ગુના અને એટ્રોસિટી એક્ટ હેઠળ કાર્યવાહી હાથ ધરી છે. ફરિયાદ નોંધાયા બાદ આરોપી પોલીસકર્મી ફરાર હોવાનું જાણવા મળ્યું છે.
ફરિયાદમાં જણાવ્યા મુજબ, શાપરમાં રહેતી ત્યક્તા મહિલા મે, 2026માં કોઈ કેસના સંદર્ભમાં શાપર પોલીસ મથકે ગઈ હતી. તે દરમિયાન તેનો પરિચય ત્યાં હેડ કોન્સ્ટેબલ તરીકે ફરજ બજાવતા હાર્દિક કેરાળીયા સાથે થયો હતો. ત્યારબાદ બંનેએ એકબીજાના મોબાઇલ નંબરની આપ-લે કરી હતી અને સંપર્ક વધ્યો હતો. મહિલા ત્યક્તા હોવાનું અને હાર્દિક કેરાળીયાના પણ છૂટાછેડા થઈ ગયા હોવાનું જણાવી, બંને વચ્ચે લગ્નની વાત આગળ વધારવામાં આવી હોવાનો ફરિયાદમાં ઉલ્લેખ છે. આ રીતે લગ્ન કરવાની લાલચ આપીને હાર્દિકે મહિલાનો વિશ્વાસ કેળવ્યો હોવાનો આક્ષેપ કરવામાં આવ્યો છે.
મહિલાની ફરિયાદ અનુસાર, આરોપીએ શાપર ગૌશાળા નજીક, અલગ-અલગ હોટેલોમાં તેમજ પોતાની ક્રેટા કારમાં તેની સાથે વારંવાર શારીરિક સંબંધ બાંધ્યા હતા. આ સિલસિલો આશરે છ મહિના સુધી ચાલ્યો હોવાનો આક્ષેપ છે. જોકે, બાદમાં હાર્દિકે લગ્ન કરવાનો ઇનકાર કરી દેતાં મહિલાને તરછોડી દીધી હતી. આથી મહિલાએ પોલીસનો સંપર્ક કરી ન્યાય મેળવવા ફરિયાદ નોંધાવી હતી.
ફરિયાદના આધારે શાપર-વેરાવળ પોલીસે હાર્દિક જગદીશ કેરાળીયા સામે ભારતીય ન્યાય સંહિતા (બીએનએસ)ની કલમ 69 તથા અનુસૂચિત જાતિ-જનજાતિ અત્યાચાર નિવારણ અધિનિયમ (એટ્રોસિટી એક્ટ)ની સંબંધિત કલમો હેઠળ ગુનો નોંધ્યો છે. આરોપી પોલીસકર્મી સામે ફરિયાદ નોંધાતાં પોલીસ તંત્રમાં પણ આ મામલો ચર્ચાસ્પદ બન્યો છે.
સમગ્ર કેસની તપાસ એસસી-એસટી સેલના ડીવાયએસપીને સોંપવામાં આવી છે. તપાસ દરમિયાન ફરિયાદમાં કરાયેલા આક્ષેપોની ખરાઈ, ઘટનાક્રમ અને અન્ય સંબંધિત વિગતોની તપાસ કરવામાં આવશે. હાલ આરોપી ફરાર હોવાનું સામે આવ્યું છે અને પોલીસ દ્વારા આગળની કાર્યવાહી હાથ ધરવામાં આવી રહી છે.
