ક્યાંક પ્રેમજાળ તો ક્યાંક ન્યૂડ વીડિયોનો ડર: રાજકોટમાં દુષ્કર્મની ત્રણ ફરિયાદ

ક્યાંક પ્રેમજાળ તો ક્યાંક ન્યૂડ વીડિયોનો ડર: રાજકોટમાં દુષ્કર્મની ત્રણ ફરિયાદ

બે સગીરા અને પરણિતા બની દુષ્કર્મનો ભોગ : જેલમાંથી પતિ-દિયરને છોડાવવાની લાલચ આપી મહિલાને પ્રેમજાળમાં ફસાવી રૂ.10 લાખ પડાવ્યા, ન્યૂડ વીડિયો વાયરલ કરવાની ધમકી આપી શારીરિક સંબંધ બાંધ્યાનો આક્ષેપ

અગ્ર ગુજરાત, રાજકોટ

રાજકોટ શહેરમાં મહિલાઓ અને સગીરાઓની સુરક્ષાને લઈને ચિંતાજનક ત્રણ અલગ-અલગ દુષ્કર્મની ફરિયાદો પોલીસ ચોપડે નોંધાઈ છે. રાજકોટ તાલુકા, થોરાળા અને ગાંધીગ્રામ-2 પોલીસ મથકમાં નોંધાયેલી આ ત્રણ ફરિયાદોમાં એક પરિણીત મહિલા ઉપરાંત બે સગીરાઓ દુષ્કર્મનો ભોગ બની હોવાનું સામે આવ્યું છે. એક કિસ્સામાં જેલમાં રહેલા પતિ અને દિયરને છોડાવી આપવાની લાલચ આપી મહિલાનો વિશ્વાસ જીતી પ્રેમસંબંધ બાંધવા દબાણ કરી ન્યૂડ વીડિયો દ્વારા બ્લેકમેઇલિંગ અને રૂ.10 લાખની ઉઘરાણી કર્યાનો ગંભીર આક્ષેપ થયો છે. જ્યારે અન્ય બે કિસ્સામાં 16 વર્ષની સગીરાઓને પ્રેમજાળમાં ફસાવી અલગ-અલગ સમયે શારીરિક સંબંધ બાંધ્યાની ફરિયાદ નોંધાઈ છે.
પ્રથમ બનાવમાં રાજકોટ તાલુકા પોલીસ મથકમાં એક મહિલાએ રીંકલ જસમતભાઈ આંબલિયા (રહે. સનપાર્ક, ડાયમંડ પાર્ટી પ્લોટ પાસે, કોઠારિયા રોડ) સામે ફરિયાદ નોંધાવી છે. ફરિયાદ મુજબ, જૂન-2026થી આરોપીએ મહિલાના પતિ અને દિયરને જેલમાંથી છોડાવી આપવા વકીલ સાથે સંપર્ક કરાવી આપવાની લાલચ આપી પરિચય કેળવ્યો હતો. ત્યારબાદ પતિ અને દિયરને જેલમાંથી છૂટવા નહીં દેવાનો ડર બતાવી પ્રેમસંબંધ રાખવા અને વીડિયો કોલમાં વાત કરવા દબાણ કર્યું હતું. આ દરમિયાન વીડિયો કોલનું સ્ક્રીન રેકોર્ડિંગ કરી લીધા બાદ તેને વાયરલ કરવાની ધમકી આપી મહિલાને ન્યૂડ વીડિયો મોકલવા મજબૂર કરી હોવાનો આક્ષેપ છે.
આટલેથી ન અટકતાં આરોપીએ ન્યૂડ વીડિયો વાયરલ કરવાની ધમકી આપી મહિલાને અવારનવાર હોટેલમાં બોલાવી દબાણપૂર્વક શારીરિક સંબંધ બાંધ્યા હોવાનું ફરિયાદમાં જણાવાયું છે. ઉપરાંત પોતે તાંત્રિક વિદ્યા જાણતો હોવાનું કહી, પોતાની વાત નહીં માને તો તાંત્રિક વિધિથી મહિલાના પરિવારને ખતમ કરી નાખવાની ધમકી આપી હતી. આ રીતે મહિલાને બ્લેકમેઇલ કરી કટકે-કટકે રોકડ અને ઓનલાઇન મળી કુલ રૂ.10 લાખ પડાવી લીધા હોવાનો આક્ષેપ થતાં પોલીસે બી.એન.એસ.ની કલમ 64(2)(એમ), 308(5) અને 351(3) હેઠળ ગુનો નોંધી તપાસ હાથ ધરી છે.
બીજા બનાવમાં થોરાળા પોલીસ મથકમાં એક પિતાએ પોતાની 16 વર્ષ અને ચાર મહિનાની સગીર પુત્રી સાથે દુષ્કર્મ આચરવામાં આવ્યું હોવાની ફરિયાદ નોંધાવી છે. ફરિયાદ મુજબ, ન્યુ શક્તિ સોસાયટી શેરી નં.4માં રહેતા શુભમ નરેશભાઈ ચોલેરાએ સગીરાને પ્રેમજાળમાં ફસાવી હતી. છેલ્લા એક વર્ષ દરમિયાન જ્યારે સગીરા ઘરે એકલી હોય ત્યારે આરોપીએ તેના ઘરે જઈ ત્રણ વખત શારીરિક સંબંધ બાંધી દુષ્કર્મ આચર્યું હોવાનો આક્ષેપ કરવામાં આવ્યો છે. આ મામલે પોલીસે બી.એન.એસ.ની કલમ 64(1), 64(2)(એમ) તેમજ પોક્સો એક્ટની કલમ 4 અને 6 હેઠળ ગુનો નોંધી વધુ તપાસ પીઆઇ એસ.પી. સોઢાને સોંપી છે.
ત્રીજા બનાવમાં ગાંધીગ્રામ-2 (યુનિવર્સિટી) પોલીસ મથકમાં એક મહિલાએ પોતાની 16 વર્ષ અને 10 મહિનાની પુત્રી સાથે દુષ્કર્મ આચરવામાં આવ્યું હોવાની ફરિયાદ નોંધાવી છે. ફરિયાદમાં રાજકોટના દીપ હમીરભાઈ મિયાત્રાનું નામ આરોપી તરીકે આપવામાં આવ્યું છે. ફરિયાદ મુજબ, 16 નવેમ્બર 2025થી 29 ઓક્ટોબર 2026 દરમિયાન અલગ-અલગ સ્થળોએ અને અલગ-અલગ સમયે આરોપીએ સગીરા મહેક સાથે અવારનવાર શારીરિક સંબંધ બાંધી દુષ્કર્મ આચર્યું હતું. એટલું જ નહીં, સગીરાના આરોપી સાથેના ફોટા અને વીડિયો વાયરલ કરવાની ધમકી પણ આપવામાં આવી હોવાનો આક્ષેપ છે. આ મામલે પોલીસે બી.એન.એસ.ની કલમ 64(2)(એમ), 351(2) તેમજ પોક્સો એક્ટની કલમ 4 હેઠળ ગુનો નોંધી પીઆઇ કે.કે. ગોહિલે તપાસ હાથ ધરી છે. આમ, રાજકોટ શહેરમાં એક જ દિવસના સમયગાળામાં નોંધાયેલી દુષ્કર્મની ત્રણ અલગ-અલગ ફરિયાદોએ ચકચાર જગાવી છે. ખાસ કરીને બે કિસ્સામાં સગીર વયની દીકરીઓને પ્રેમજાળમાં ફસાવી દુષ્કર્મ આચરવાના આક્ષેપો સામે આવ્યા છે, જ્યારે ત્રીજા કિસ્સામાં મહિલાને ન્યૂડ વીડિયો અને પરિવારને નુકસાન પહોંચાડવાની ધમકી આપી બ્લેકમેઇલિંગ કર્યાનો ગંભીર મામલો સામે આવ્યો છે. ત્રણેય કેસમાં પોલીસે ફરિયાદના આધારે ગુના નોંધી આગળની તપાસ શરૂ કરી છે.