રાજુલા-જાફરાબાદમાં લાઇસન્સ વગર ફટાકડા વેચનારાઓ સામે લાલઆંખ
પ્રાંત અધિકારીના અધ્યક્ષ સ્થાને વેપારીઓની મહત્વની બેઠક યોજાઈ
અગ્ર ગુજરાત, રાજુલા
આગામી પવિત્ર દિવાળીના તહેવારોને ધ્યાનમાં રાખીને અમરેલી જિલ્લાના રાજુલા અને જાફરાબાદ પંથકમાં વહીવટી તંત્ર એક્શન મોડમાં આવ્યું છે. રાજુલા પ્રાંત કચેરી ખાતે પ્રાંત અધિકારી અક્ષર વ્યાસના અધ્યક્ષ સ્થાને ફટાકડાના વેપારીઓ સાથે બેઠકનું આયોજન કરવામાં આવ્યું હતું. જેમાં તંત્ર દ્વારા સ્પષ્ટ ચેતવણી આપવામાં આવી છે કે, નિયમોનું ઉલ્લંઘન કરનારા અને લાઇસન્સ વગર ફટાકડા વેચનારા સામે કાયદેસરની કડક કાર્યવાહી કરવામાં આવશે. દિવાળીના તહેવાર અનુલક્ષીને યોજાયેલી આ બેઠકમાં રાજુલા અને જાફરાબાદ વિસ્તારના ફટાકડાના વેપારીઓ મોટી સંખ્યામાં ઉપસ્થિત રહ્યા હતાં. આ બેઠક દરમિયાન પ્રાંત અધિકારી અક્ષર વ્યાસે વેપારીઓને તમામ નિયમોનું ચુસ્તપણે પાલન કરવા આદેશ આપ્યા હતાં. ખાસ કરીને દુકાનો અને સ્ટોલ પર ફાયર સેફ્ટીના પૂરતા સાધનો રાખવા તેમજ બજારોમાં ટ્રાફિકની સમસ્યા ન સર્જાય તે રીતે વેપાર કરવા માટે ખાસ સૂચના આપવામાં આવી છે. આ બેઠકમાં પ્રાંત અધિકારી સાથે રાજુલા મામલતદાર એચ.બી. પુરોહિત, જાફરાબાદ મામલતદાર લકુમ હાજર રહ્યાં હતાં.
