દિવ્યાંગોના સેવાવ્રતી ભાસ્કરભાઈ પારેખનો ૭૯મા વર્ષમાં પ્રવેશ
બે વાર રાષ્ટ્રપતિ ચંદ્રક વિજેતા પુત્ર જીમીષને પગભર બનાવ્યા બાદ ૨૦ વર્ષથી નિઃશુલ્ક માર્ગદર્શન કેન્દ્ર થકી સેંકડો દિવ્યાંગો માટે બન્યા આશાનું કિરણ
અગ્ર ગુજરાત, રાજકોટ
અંગ્રેજીની જાણીતી કહેવત ‘Where there is a will, there is a way’ (જ્યાં ચાહ, ત્યાં રાહ)ને જો કોઈએ વાસ્તવિક જીવનમાં સાકાર કરી બતાવી હોય તો તે છે વરિષ્ઠ નાગરિક, ભૂતપૂર્વ સરકારી અધિકારી અને દિવ્યાંગોના નિઃસ્વાર્થ સેવક ભાસ્કરભાઈ પારેખ. આજે તા. ૨૦ નવેમ્બર, ૨૦૨૬ને શુક્રવારના રોજ તેઓ પોતાના જીવનના ૭૯મા વર્ષમાં મંગલ પ્રવેશ કર્યો છે.
ભાસ્કરભાઈ પારેખના પુત્ર જીમીષના જન્મના થોડા સમય બાદ જાણવા મળ્યું હતું કે તેઓ મનોદિવ્યાંગ છે. પિતા-માતાના સંઘર્ષ અને પ્રેરણાથી આગળ વધેલા જીમીષ પારેખે અત્યાર સુધીમાં બે વાર રાષ્ટ્રપતિ ચંદ્રક મેળવ્યા છે. વડાપ્રધાન નરેન્દ્રભાઈ મોદી, પૂર્વ મુખ્યમંત્રી સ્વ. વિજયભાઈ રૂપાણી સહિત સ્થાનિક તંત્ર દ્વારા અનેકવાર તેમનું સન્માન કરવામાં આવ્યું છે. ભાસ્કરભાઇ છેલ્લા બે દાયકાથી દિવ્યાંગો માટે નિઃશુલ્ક માર્ગદર્શન કેન્દ્ર ચલાવી રહ્યા છે, જેના થકી સેંકડો દિવ્યાંગોને લાભ મળ્યો છે. અપૂરતી માહિતી, શિક્ષણનો અભાવ, પેપરવર્કની અણઆવડત કે નિરાશાને કારણે ઘણા દિવ્યાંગો પેન્શન, બસ-રેલવે પાસ, નિરામયા વીમા યોજના, ગાર્ડિયનશિપ સર્ટિફિકેટ અને સાધન સહાય જેવી કેન્દ્ર-રાજ્ય સરકારની યોજનાઓથી વંચિત રહી જાય છે. ભાસ્કરભાઈ તેમને યોગ્ય માર્ગદર્શન આપી હક અપાવવામાં મદદરૂપ થાય છે.
દિવ્યાંગો માટે રાષ્ટ્રીય સ્તરે કાર્યરત ‘પ્રયાસ’ સ્કૂલ તથા આશરે ૨૧૭ દિવ્યાંગ બાળકોને તાલીમ આપતી ‘પ્રયાસ પેરેન્ટ્સ એસોસિએશન ફોર સ્પેશિયલ ચાઇલ્ડ’માં ભાસ્કરભાઈ તન, મન અને ધનથી સેક્રેટરી તરીકે સેવા આપી રહ્યા છે. આ ઉપરાંત રામકૃષ્ણ આશ્રમ તથા સૌરાષ્ટ્રની સૌથી મોટી રાજકોટ સિવિલ હોસ્પિટલ ખાતે પણ દિવ્યાંગો અને તેમના પરિવારોના જીવનને સુખમય બનાવવા સતત કાર્યરત છે. તેમની અવિરત સેવા બદલ અત્યાર સુધીમાં તેમને ૫૦થી વધુ એવોર્ડ પ્રાપ્ત થયા છે. ભાસ્કરભાઈ પારેખને તેમના જન્મદિન નિમિતે મો. 9426317763 પર શુભેચ્છાનો ધોધ વરસી રહ્યો છે.


