નવી સિઝનનો પ્રારંભ! રાજકોટ માર્કેટ યાર્ડમાં દોઢ લાખ મણ મગફળી ઠલવાઇ
દિવાળી બાદ પાકની મબલખ આવક : યાર્ડમાં ૧૪૦૦થી વધારે વાહનોના થપ્પા
અગ્ર ગુજરાત, રાજકોટ
રાજકોટ યાર્ડમાં દિવાળીના તહેવારોની રજા બાદ હવે કૃષિ જણસીઓ-ખાસ કરીને મગફળીની આવકમાં ધરખમ વધારો શરૂ થયો હોય તેમ આજે સિઝનની સૌથી વધારે બે લાખ મણ મગફળી ઠલવાઈ હતી. જેને લઈને ચારેબાજુ મગફળીનાં ખડકલા જોવા મળ્યા હતા. આજે રાજકોટ માર્કેટ યાર્ડમાં 1400થી વધુ વાહનોનો ખડકલો થયો હતો. જેમાં મગફળી, સોયાબીન, કપાસ, જીરૂની સૌથી વધુ આવકો હતી. યાર્ડનાં ચેરમેન જયેશ બોઘરાએ જણાવ્યા મુજબ આજે માત્ર મગફળીમાં બે લાખ મણ જેટલી આવક થઈ છે. જે ચાલુ સીઝનમાં અત્યાર સુધી સૌથી વધુ છે.
પ્રાપ્ત વિગત મુજબ માર્કેટિંગ યાર્ડના સત્તાધીશો દ્વારા ખેડુતોનો માલ યોગ્ય સ્થળે રાખવા અને અવ્યવસ્થા ન સર્જાય તે માટે ખાસ ગોઠવણ કરવામાં આવી હતી. ખરીફ સીઝન વખતે ખાસ કરીને દિવાળી વેકેશન પૂર્ણ થતાં જ આવકો જોર પકડતી હોય છે. આ વખતે પણ દિવાળીના 10 દિવસે આવકને વેગ મળ્યો છે. મગફળીનાં ઉત્પાદનમાં વર્ષે કાપ છે. છતા પાક પ્રમાણમાં નોંધપાત્ર હોવાથી આવકોનું જોર રહ્યું છે. આ ઉપરાંત કપાસની 8000 મણ, સોયાબીનની 15000 મણ, તલની 6500 મણની આવકો મુખ્ય હતી. ઘઉંની આવક 4000 મણ, ચણાની 7200 મણ, જીરૂની 5300 મણ, અડદની 4300 મણ તથા લસણની 4300 મણની આવક હતી.
રાજકોટ માર્કેટિંગ યાર્ડમાં હરરાજીમાં મગફળીના ભાવ રૂ. 1235થી 1771 સુધી રહ્યા હતા. તલના રૂ. 3050થી 3550 હતા. સોયાબીનનાં રૂ. 1390થી 1561, રાયડાના રૂ. 1450થી 1778, જીરૂના રૂ. 4800થી 5250 ચણાના રૂ. 1440થી 1140 તથા કપાસનાં રૂ. 1775 થી 1800 રહ્યા હતા. વેપારીઓનાં કહેવા પ્રમાણે રાજકોટ ઉપરાંત ગોંડલ યાર્ડમાં પણ મગફળીના ઢગલા હતા. સવા લાખ ગુણીની આવક થઈ હતી. રાજકોટ કરતાં ગોંડલમાં મગફળીનાં વેપાર વધુ થતા હોય છે અને આવક પણ વધુ રહેતી હોય છે. ગોંડલમાં મોટાભાગની આવકના વેપાર થઈ જાય છે. જયારે રાજકોટમાં ઘણીવાર એકાદ-બે દિ પડતર રહે છે.


