ગોવા ‘આયર્નમેન’ ટ્રાયથલોન ૨૦૨૬માં રાજકોટનો ડંકો
RDSAના ત્રણ ખેલાડીઓએ કઠિન સ્પર્ધા પાર પાડી વધાર્યું શહેરનું ગૌરવ
અગ્ર ગુજરાત, રાજકોટ
રાજકોટ ડિસ્ટ્રિક્ટ સ્વિમિંગ એસોસિએશન (RDSA) સંચાલિત ડૉ. ડાયાભાઈ કાનજીભાઈ ઉકાણી સ્વિમિંગ પૂલ એન્ડ હેલ્થ સેન્ટરની RDSA સ્વિમિંગ એકેડેમીના ત્રણ પ્રતિભાશાળી ખેલાડીઓએ સમગ્ર શહેર અને સંસ્થાનું નામ રોશન કર્યું છે. રાષ્ટ્રીય અને આંતરરાષ્ટ્રીય સ્તરે અત્યંત કઠિન ગણાતી ગોવા ખાતે યોજાયેલી ‘આયર્નમેન’ (IRONMAN) ટ્રાયથલોન ૨૦૨૬ સ્પર્ધા સફળતાપૂર્વક પૂર્ણ કરી આ ત્રણેય ખેલાડીઓએ રાજકોટને ગૌરવ અપાવ્યું છે.
આ ત્રણેય વિજેતા ખેલાડીઓ દિનેશભાઈ હપાણી, હિનેશભાઈ સાકરિયા અને ડૉ. અભિષેક પાધીની અદ્ભુત સિદ્ધિને બિરદાવવા માટે ગત તા.૧૮/૧૧/૨૦૨૬ના રોજ RDSA ખાતે એક સન્માન સમારોહનું આયોજન કરવામાં આવ્યું હતું. આ પ્રસંગે મુખ્ય મહેમાન તરીકે ચીમનભાઈ હપાણી (સંસ્થાપક, કીચ ગ્રુપ), હરિતસિંહ ગોહિલ (અનુભવી આંતરરાષ્ટ્રીય ટ્રાયથલોન ખેલાડી અને અગ્રણી ઉદ્યોગપતિ), નીરજભાઈ દોશી, કૌશિકભાઈ સોલંકી (જ્યોતિ સીએનસી), જ્યોતિબેન રાજ્યગુરુ (કોલેજ પ્રિન્સિપાલ), બ્રિજેશસિંહ જાડેજા (પૂર્વ રાષ્ટ્રીય કક્ષાના વોટર પોલો સ્વિમિંગ ખેલાડી), આરતીબેન ચાપાણી (ટ્રાયથલોન ખેલાડી), પ્રકાશભાઈ કલોલા (રાજકોટના પ્રથમ રાષ્ટ્રીય કક્ષાના ટ્રાયથલોન ખેલાડી અને RDSAના ઉપપ્રમુખ) ખાસ ઉપસ્થિત રહ્યા હતા. હાજર રહેલા મહાનુભાવોના હસ્તે ત્રણેય ‘આયર્નમેન’ ખેલાડીઓને વિશેષ સન્માનપત્ર અર્પણ કરી નવાજવામાં આવ્યા હતા. ઉપસ્થિત મહાનુભાવોએ ત્રણેય ખેલાડીઓની અથાગ મહેનત, ધીરજ અને સમર્પણની પ્રશંસા કરી તેમને ઉજ્જવળ ભવિષ્ય માટે શુભેચ્છાઓ પાઠવી હતી.
આ સન્માન સમારોહમાં RDSA એકેડેમીના યુવા તરવૈયાઓ, વાલીઓ, કોચિંગ સ્ટાફ અને રમતપ્રેમી નગરજનો બહોળી સંખ્યામાં ઉત્સાહભેર જોડાયા હતા અને તાળીઓના ગડગડાટ સાથે ત્રણેય ખેલાડીઓનો ઉત્સાહ વધાર્યો હતો.
સમગ્ર કાર્યક્રમનું સુંદર સંચાલન સૌરાષ્ટ્ર-કચ્છ ટ્રાયથલોન ફેમિલીના માર્ગદર્શક, શુભેચ્છક તેમજ જાણીતા સાયકલિસ્ટ અને રનર પરેશભાઈ બાબરીયાએ કર્યું હતું. સમગ્ર કાર્યક્રમને સફળ બનાવવા માટે RDSA પરિવારે ભારે જહેમત ઉઠાવી હતી.


