ફાઈનલ પહેલા જ રોહિત શર્માએ તોડ્યો ધોની અને સૌરવ ગાંગુલીનો રેકોર્ડ

• ભારત ન્યુઝીલેન્ડને હરાવીને ફાઇનલમાં પહોંચ્યું
  
• ભારતે વર્લ્ડકપ 2023માં સતત 10મી જીત મેળવી
  
• રોહિત શર્માએ ગાંગુલી અને ધોનીને પાછળ છોડ્યા
  

ભારતીય ટીમ બુધવારે 15 નવેમ્બરે ન્યૂઝીલેન્ડને હરાવીને ચોથી વખત વર્લ્ડકપની ફાઇનલમાં પ્રવેશી છે. ટીમ ઈન્ડિયાએ વર્લ્ડકપ 2023માં સતત 10મી જીત મેળવી છે અને સ્પષ્ટપણે તેના કેપ્ટન રોહિત શર્માએ બધાને હરાવ્યા છે. એક ખાસ બાબતમાં તે ટીમ ઈન્ડિયાના સૌથી સફળ કેપ્ટન એમએસ ધોની અને સૌરવ ગાંગુલીથી આગળ નીકળી ગયો છે. રોહિત હવે વર્લ્ડકપ એડિશનમાં સૌથી વધુ મેચ જીતનાર ભારતનો કેપ્ટન બની ગયો છે.

ગાંગુલી અને ધોની બંને પાછળ રહી ગયા

રોહિત શર્માએ વર્લ્ડકપ 2023માં અત્યાર સુધીમાં કુલ 10 મેચ જીતી છે. જ્યારે સૌરવ ગાંગુલીએ 2003ના વર્લ્ડકપમાં સુકાની તરીકે 9 મેચ જીતી હતી. એમએસ ધોનીની વાત કરીએ તો તેની કેપ્ટન્સીમાં ભારતે 2015 વર્લ્ડકપમાં 7 મેચ જીતી હતી. એટલે કે રોહિત હવે ધોની અને ગાંગુલી બંને કરતા આગળ નીકળી ગયો છે. ખાસ વાત એ છે કે આ ટૂર્નામેન્ટની ફાઈનલ સુધી રોહિત એકમાત્ર અજેય કેપ્ટન રહ્યો છે. લીગની તમામ મેચો જીત્યા બાદ સેમીફાઈનલમાં પણ જીત મેળવી હતી.

ફાઇનલમાં પહોંચનાર ચોથો ભારતીય

રોહિત શર્મા વર્લ્ડકપ ફાઇનલમાં પહોંચનાર ચોથો ભારતીય કેપ્ટન પણ બની ગયો છે. તેમના પહેલા કપિલ દેવ, સૌરવ ગાંગુલી અને એમએસ ધોની ટીમ ઈન્ડિયાને વર્લ્ડ કપ ફાઇનલમાં લઈ ગયા હતા. રોહિત હવે આવો ચોથો કેપ્ટન બની ગયો છે. રોહિતની કેપ્ટનશિપમાં ટીમ ઈન્ડિયા ત્રીજી વખત વર્લ્ડ ચેમ્પિયન બનવા માંગે છે. કપિલ દેવે 1983માં અને એમએસ ધોનીએ 2011માં પોતાની કપ્તાનીમાં ભારતને વર્લ્ડ ચેમ્પિયન બનાવ્યું હતું.

ત્રીજા ટાઇટલ પર નજર

ટીમ ઈન્ડિયાએ 2011ના વર્લ્ડકપ બાદ હવે ફાઈનલમાં જગ્યા બનાવી લીધી છે. આ પહેલા ટીમ ઈન્ડિયા 1983 અને 2003માં પણ ફાઈનલ રમી હતી. ભારતે 1983 અને 2011માં પણ આ ખિતાબ જીત્યો હતો. હવે 2023માં ટીમ ઈન્ડિયાની નજર ત્રીજા ટાઈટલ પર રહેશે. વર્ષ 2003માં ભારત ફાઈનલમાં ઓસ્ટ્રેલિયા સામે હારી ગયું હતું. હવે ટીમ ઈન્ડિયા ચોથી ફાઈનલ 19 નવેમ્બરે અમદાવાદના નરેન્દ્ર મોદી સ્ટેડિયમમાં રમશે. હવે બીજી સેમિ ફાઇનલ મેચ ઓસ્ટ્રેલિયા અને દક્ષિણ આફ્રિકા વચ્ચે રમાઇ રહી છે. આ બન્નેમાંથી જીતનારી ટીમ ફાઇનલમાં ભારત સામે ટકરાશે.