- સુકાની રોહિત શર્મા અને જસપ્રીત બુમરાહ પણ એવોર્ડ માટે નોમિનેટ
- ઓસ્ટ્રેલિયા અને ન્યૂઝીલેન્ડના બે-બે ખેલાડીઓ પણ એવોર્ડ માટે નોમિનેટ
- ન્યૂઝીલેન્ડના ડેરિલ મિચેલનું પણ યાદીમાં સ્થાન
આઇસીસીએ વર્લ્ડ કપમાં શાનદાર પ્રદર્શન કરનાર નવ ખેલાડીઓને પ્લેયર ઓફ ધ ટૂર્નામેન્ટ માટે નોમિનેટ કર્યા છે જેમાં ચાર ભારતીય ખેલાડી સામેલ છે. ટૂર્નામેન્ટમાં અત્યાર સુધી સર્વાધિક રન બનાવનાર વિરાટ કોહલી તથા હાઇએસ્ટ વિકેટ ઝડપનાર મોહમ્મદ શમી ઉપરાંત ભારતીય સુકાની રોહિત શર્મા અને પેસ બોલર જસપ્રીત બુમરાહને શોર્ટલિસ્ટ કર્યા છે. આ ઉપરાંત ઓસ્ટ્રેલિયાના ગ્લેન મેક્સવેલ (397 રન અને પાંચ વિકેટ), ન્યૂઝીલેન્ડના રચિન રવીન્દ્ર (10 ઇનિંગ્સમાં 578 રન), ઓસ્ટ્રેલિયાના એડમ ઝમ્પા (22 વિકેટ, ત્રણ વખત ચાર-ચાર વિકેટ), સાઉથ આફ્રિકાના ક્વિન્ટન ડી કોક (10 મેચમાં 594 રન, 18 કેચ અને એક સ્ટમ્પિંગ), ન્યૂઝીલેન્ડના ડેરિલ મિચેલને (10 ઇનિંગ્સમાં 552 રન) પણ યાદીમાં સ્થાન મળ્યું છે.
વિરાટ કોહલી : કોહલીએ દસ મેચની 10 ઈનીંગ્સમાં 711 રન બનાવ્યા છે અને તે હાઇએસ્ટ રન સ્કોરર બન્યો છે. તેણે બાંગ્લાદેશ સામે અણનમ 103, ન્યૂઝીલેન્ડ સામે 95, સાઉથ આફ્રિકા સામે અણનમ 101 તથા ન્યૂઝીલેન્ડ સામેની સેમિફાઈનલમાં 117 રન બનાવ્યા હતા. તે આઠ મેચમાં 50 પ્લસનો સ્કોર નોંધાવી ચૂક્યો છે.
રોહિત શર્મા : પ્રત્યેક મેચમાં આક્રમક શરૂઆત કરીને ભારત માટે મોટા સ્કોરનો પાયો નાખનાર સુકાની રોહિત શર્માએ 10 મેચમાં 55.00ની શાનદાર સરેરાશ સાથે અને 124.15ના સ્ટ્રાઇક રેટથી 550 રન બનાવ્યા છે. તેણે એક સદી અને ત્રણ અડધી સદી ફટકારી હતી. તેણે અત્યાર સુધી વર્લ્ડ કપમાં 62 બાઉન્ડ્રી તથા 28 સિક્સર ફટકારી છે.
મોહમ્મદ શમી : અનુભવી પેસ બોલર શમીએ છ મેચમાં 23 વિકેટ સાથે હાઇએસ્ટ વિકેટ ઝડપનાર બોલર્સની યાદીમાં મોખરાના સ્થાન મેળવ્યું છે. તેણે ન્યૂઝીલેન્ડ સામે ધર્મશાલામાં પાંચ, લખનઉમાં ઇંગ્લેન્ડ સામે ચાર, મુંબઇમાં શ્રીલંકા સામે પાંચ, કોલકાતામાં સાઉથ આફ્રિકા સામે બે તથા મુંબઇમાં ન્યૂઝીલેન્ડ સામે સાત વિકેટ ઝડપી હતી.
જસપ્રીત બુમરાહ : શમીની સાથે ભારતના પેસ આક્રમણનો મહત્ત્વપૂર્ણ હિસ્સો ગણાતા જસપ્રીત બુમરાહે 10 ઇનિંગ્સમાં 18 વિકેટ હાંસલ કરી હતી. તે ચુસ્ત સ્પેલ નાખીને હરીફ ટીમના રનરેટના કાબૂમાં રાખે છે. તેનો ઇકોનોમી રેટ 3.98નો રહ્યો છે. તેનો વિકેટ ઝડપવાનો સ્ટ્રાઇક રેટ 13.66નો રહ્યો છે.
