- પીએમ મોદીના આગમન પહેલા મોટા સમાચાર
- સુરતવાસીઓને કેન્દ્ર સરકારે આપી મોટી ભેટ
- અમદાવાદ પછી વધુ એક સિટીને ઈન્ટરનેશનલ એરપોર્ટ તરીકેની મંજૂરી
વડાપ્રધાન નરેન્દ્ર મોદીના ગુજરાત આગમન પહેલા ગુજરાતવાસીઓને એક મોટી ભેટ મળી છે. હકીકતે કેન્દ્રીય કેબિનેટમાં સુરત એરપોર્ટને લઈને મોટી જાહેરાત કરવામાં આવી છે. પીએમ મોદીની અધ્યક્ષતામાં કેન્દ્રીય મંત્રીમંડળે સુરત એરપોર્ટને ઈન્ટરનેશનલ એરપોર્ટ તરીકે જાહેર કરવાની દરખાસ્તને મંજૂરી આપી છે. આમ ગુજરાતને અમદાવાદ પછી વધુ એક ઈન્ટરનેશનલ એરપોર્ટની ભેટ મળી છે. આનાથી સુરત એરપોર્ટની કનેક્ટિવિટી વધશે અને દક્ષિણ ગુજરાતવાસીઓને તેમની નજીકમાં જ સીધી ઈન્ટરનેશનલ કનેક્ટિવિટી મળશે.
મહત્વનું છે કે સુરત શહેર માટે કેન્દ્ર સરકાર તરફથી સારા સમાચાર આવ્યા છે. આજે પીએમ મોદીના નેતૃત્વમાં મળેલી કેબિનેટ મીટિંગમાં એક મોટો અને મહત્વપૂર્ણ નિર્ણય લેવામાં આવ્યો છે. સુરત એરપોર્ટને આંતરરાષ્ટ્રીય એરપોર્ટ તરીકે જાહેર કરવાની દરખાસ્તને મંજૂરી આપી દેવામાં આવી છે. હવે સુરતીઓને એપોર્ટ પર મળતી સુવિધામાં વધારો થશે અને સુરતના વિકાસમાં આ પગલું મહત્વનું સાબિત થશે. સુરત એરપોર્ટ માત્ર આંતરરાષ્ટ્રીય પ્રવાસીઓ માટે પ્રવેશદ્વાર જ નહીં બને, પરંતુ સમૃદ્ધ હીરા અને કાપડ – ઉદ્યોગો માટે અવિરત નિકાસ-આયાત કામગીરીની સુવિધા પણ આપશે. આ વ્યૂહાત્મક પગલું અભૂતપૂર્વ આર્થિક સંભવિતતાને અનલોક કરવાનું વચન આપે છે, જે સુરતને આંતરરાષ્ટ્રીય ઉડ્ડયન લેન્ડસ્કેપમાં મુખ્ય ખેલાડી બનાવશે અને આ ક્ષેત્ર માટે સમૃદ્ધિના નવા યુગને પ્રોત્સાહન આપશે. આમ સુરતના વિકાસને એક નવી ઉડાન મળશે અને દક્ષિણ ગુજરાતનું આ સમૃદ્ધ શહેર વિશ્વના નકશે એક નવી ઓળખનું પ્રતીક બની જશે.
ભારતમાં ઝડપથી વિકસતા શહેર સુરતે નોંધપાત્ર આર્થિક કૌશલ્ય અને ઔદ્યોગિક વિકાસનું પ્રદર્શન કર્યું છે. આર્થિક વૃદ્ધિ વધારવા, વિદેશી રોકાણને આકર્ષવા અને રાજદ્વારી સંબંધોને મજબૂત કરવા માટે સુરત એરપોર્ટને આંતરરાષ્ટ્રીય દરજ્જા સુધી પહોંચાડવું એ સર્વોપરી છે. મુસાફરોની અવરજવર અને કાર્ગોની કામગીરીમાં વધારા સાથે એરપોર્ટનું આંતરરાષ્ટ્રીય હોદ્દો પ્રાદેશિક વિકાસ માટે મહત્ત્વપૂર્ણ પ્રોત્સાહન પ્રદાન કરશે. અત્રે ઉલ્લેખનીય છે કે વડાપ્રધાન નરેન્દ્ર મોદી 17મી ડિસેમ્બરના રોજ સુરતની મુલાકાતે છે. વડાપ્રધાન નરેન્દ્ર મોદી 17મી ડિસેમ્બરે વિશ્વની સૌથી મોટી ઓફિસ ડાયમંડ બુર્સનું ઉદ્ઘાટન કરશે. સાથોસાથ એરપોર્ટ ટર્મિનલનું પણ ઉદ્ઘાટન કરવા જઈ રહ્યા છે.
મહત્વનું છે કે સુરતને ઈન્ટરનેશનલ એરપોર્ટ બનાવવાની જાહેરાત પહેલા જ સુરત એરપોર્ટને 2 આંતરરાષ્ટ્રીય ફ્લાઈટની મંજૂરી મળી ગઈ છે. સુરત-દુબઈ-સુરતની ફ્લાઈટને મંજૂરી મળી છે અને સાથે જ સુરતથી સીધી હોંગકોંગની ફ્લાઈટનું પણ આયોજન છે.
