ઉત્તર ભારતમાં હિમવર્ષાની અસર, રાજ્યમાં પવન સાથે ઠંડીનો ચમકારો

• લઘુત્તમ તાપમાન સાથે મહત્તમ તાપમાન પણ ઘટયું
  
• 14 શહેરોનું તાપમાન 17 ડિગ્રીથી નીચે નોંધાયું
  
• સૌથી ઓછું તાપમાન નલિયામાં 11.4 ડિગ્રી
  

એક તરફ કોરોનામાં વધારો જોવા મળી રહ્યો છે ત્યારે બીજી તરફ ઠંડીનો પારો પણ ગગડી રહ્યો છે. આ વચ્ચે આજે રાજ્યના વિવિધ શહેરોમાં લઘુત્તમ સાથે મહત્તમ તાપમાનમાં નોંધપાત્ર ઘટાડો જોવા મળ્યો છે. જેમાં રાજ્યના 14 શહેરોનું તાપમાન 17 ડિગ્રીથી નીચે નોંધાયું છે. જે સાથે જ ઠંડીની અસર જોવા મળી રહી છે.

આ વચ્ચે ઉત્તર ભારતમાં થઇ રહેલી હિમવર્ષાને કારણે ગુજરાતમાં પણ ઠંડીનું પ્રમાણ વધી રહ્યુ છે. ગુજરાતમાં ઉત્તર પૂર્વના પવન ફૂંકાઇ રહ્યા છે. તો ગુજરાતમાં આગામી પાંચ દિવસ ઠંડીનું પ્રમાણ વધશે કે માવઠાનું જોર વધશે તે અંગે હવામાન વિભાગ દ્વારા આગાહી કરવામાં આવી છે. તેમજ વાદળછાયું વાતવરણ ઠંડીનો પારો ઘટાડી શકે છે.

ક્યાં કેટલું તાપમાન નોંધાયું ?

રાજ્યના વિવિધ શહેરોના તાપમાનની વાત કરવામાં આવે તો અમદાવાદ 16.7 ડિગ્રી, ગાંધીનગર 15.5 ડિગ્રી સુધી પહોંચ્યું છે. જ્યારે રાજકોટ 14.6 ડિગ્રી,સુરેન્દ્રનગર 15.2 ડિગ્રી પર પહોચ્યું છે. તેમજ સૌથી ઓછું તાપમાન નલિયામાં 11.4 ડિગ્રી સુધી પહોંચ્યું છે. આ સાથે જ કંડલા 14.4 ડિગ્રી,ભુજ 14.5 ડિગ્રી સુધી પહોંચ્યું છે. વડોદરા 16.2 ડિગ્રી અને ભાવનગર 17.4 ડિગ્રી, પોરબંદર 17.3 ડિગ્રી સુધી નોંધાયું છે. 

વરસાદ અંગે શું કરી આગાહી 

જ્યારે અન્ય વિસ્તારોમાં આવતીકાલથી તાપમાનમાં 1 થી 2 ડિગ્રી ઘટવાની આગાહી હવામાન વિભાગ દ્વારા કરવામાં આવી છે. તેમજ પૂર્વ ઉત્તર પૂર્વના પવનો હોવાથી તાપમાનમાં આગામી દિવસોમાં વધુ ઘટાડો નોંધાય શકે છે. તેમજ હવામાન વિભાગે વરસાદ અંગે જણાવતા કહ્યુ કે, કમોસમી વરસાદ પડવાની વધારે સંભાવના નથી.