- સાવરકુંડલા પોલીસે તામિલનાડુથી બે ઈસમોને ઝડપી પાડ્યા
- 10% થી 45% સુધી ડિસ્કાઉન્ટમાં નવી વસ્તુઓ આપતા
- પોલીસે પોલીસ સ્ટેશનનો સંપર્ક કરવા જણાવ્યું
સાવરકુંડલા શહેરમાં થોડા મહિના પહેલા મહુવા રોડ ઉપર એસટી બસ સ્ટેન્ડ સામે ગોલ્ડ સ્ટાર હોમ નામની એક દુકાનમાં સસ્તા ભાવે ચીજ વસ્તુઓ આપવાની અને એડવાન્સ પૈસા લેવાની સ્કીમના દુકાનદાર મોટી રકમ લઈ નાસી ગયો હતો. અને કોઈને વસ્તુઓ મળી ન હતી ત્યારે આરોપીને સાવરકુંડલા પોલીસ તામિલનાડુથી ઝડપી લાવી છે.
10% થી 45% સુધી ડિસ્કાઉન્ટમાં નવી વસ્તુઓ આપતા
સાવરકુંડલા શહેરમાં ગોલ્ડ સ્ટાર સપ્લાયર નામનો એક શોરૂમ ચાલુ કરેલો જેમાં એલઇડી, ટીવી, ફ્રીજ, વોશિંગ મશીન, મોબાઇલ, લેપટોપ, સોફાસેટ, ડિનર સેટ તથા સ્ટીલના વાસણ, પ્લાસ્ટિક ફર્નિચર અને ઈલેક્ટ્રીક સામાન જેવી ચીજ વસ્તુઓ 10% થી 45% સુધી ડિસ્કાઉન્ટમાં નવી વસ્તુઓનું વેચાણ કરવાનું બુકિંગ ચાલુ કરેલું જેનું પેમેન્ટ એડવાન્સ લઈ બુક કરાવેલ ગ્રાહકને આ ચીજ વસ્તુઓ 12 દિવસ પછી મંગાવી આપવાનું જણાવવામાં આવતું હતું. ત્યારે અનેક સસ્તી વસ્તુઓ લેવાના લોભમાં લોકોએ પોતાના પૈસા રોક્યા હતા.
સાવરકુંડલા ટાઉન પોલીસમાં ફરિયાદો લખાવાઈ
બાર દિવસ પૂર્ણ થાય એ પહેલા જ આ શોરૂમ વાળા રાતોરાત મોટી રકમ લઈને ભાગી ગયા હતા. આ બાબતની સાવરકુંડલા ટાઉન પોલીસમાં ફરિયાદો લખાવાઈ હતી. ત્યારે ફરિયાદીની 84,230ની ચીજ વસ્તુઓ તેમજ અન્ય ગ્રાહકોની 2,30,130 મળી કુલ 3,14,130 ની વસ્તુઓ નહીં આપતા સાવરકુંડલા પોલીસમાં વિશ્વાસઘાત અને છેતરપિંડીની ફરિયાદ નોંધાયેલી અને તે ફરિયાદને આધારે સાવરકુંડલા પોલીસે આઇપીસી કલમ 406, 420, 120 બી મુજબ ગુનો નોંધી ટેકનીકલ સોર્સને આધારે તપાસ કરતા તેમનું પગેરું મળ્યુ હતુ.
પોલીસે પોલીસ સ્ટેશનનો સંપર્ક કરવા જણાવ્યું
સાવરકુંડલા પોલીસે તામિલનાડુથી બે ઈસમો માફિયા જગન મહાલિંગન ઉંમર વર્ષ 21 રહેવાસી રામકૃષ્ણપુરમ તામિલનાડુ, બીજો આરોપી અરુણ રાજ ચેલૈયા ઉંમર વર્ષ 42 રહેવાસી વેલનાથ પટકોઇ વાળા તામિલનાડુથી ઝડપી લીધા છે અને હાલ આરોપીઓ રિમાન્ડ ઉપર છે. સાવરકુંડલાના આ શોરૂમ ઉપરથી જે લોકોએ આવી સસ્તી ચીજ વસ્તુઓ લેવા માટેના રકમ જમા કરાવી છે તે લોકોને પોલીસે પોલીસ સ્ટેશનનો સંપર્ક કરવા જણાવ્યું છે.
