રાજ્યમાં ઠંડીનો ચમકારો વધશે, લઘુત્તમ તાપમાનમાં નોંધાશે ઘટાડો

• લઘુતમ તાપમાન 2 થી 3 ડિગ્રી ઘટી શકે છે
  
• કમોસમી વરસાદની શક્યતા નહીવત
  
• વહેલી સવારે ઘુમ્મસભર્યું વાતાવરણ રહેશે
  

રાજ્યમાં ડિસેમ્બર મહિનાના અંત સાથે તાપમાનમાં ઘટાડા સાથે ઠંડીનો ચમકારો જોવા મળી શકે છે. જેની સાથે જ ધુમ્મસભર્યું વાતાવરણ પણ કેટલાંક વિસ્તારોમાં જોવા મળી શકે છે. જ્યારે ખેડૂતો માટે રાહતના સમાચાર છે કે, કમોસમી વરસાદની શક્યતા નહીવત છે.

આ અંગે હવામાન વિભાગે જણાવ્યું કે, હાલમાં ઉત્તરીય પવન હોવાને કારણે ધુમ્મસભર્યું વાતાવરણ રહે છે અને ઠંડીનું પ્રમાણ પણ સામાન્ય છે. 48 કલાક બાદ પવનની દિશા બદલાઈને પૂર્વ તરફથી પવનો આવવાની શરૂઆત થશે. જેથી રાજ્યમાં એકથી બે ડિગ્રી તાપમાન વધે તેવી શક્યતા છે. ઉત્તરીય પવનોને કારણે વાતાવરણમાં ભેજ હોવાથી વહેલી સવારે ધુમ્મસભર્યું વાતાવરણ રહે છે.

તેમજ ગુજરાતમાં આગામી 5 દિવસ વરસાદની કોઇ આગાહી નથી. તથા આ દિવસોમાં વાતાવરણ સુકું રહેશે અને તાપમાનમાં પણ 1થી 2 ડિગ્રીનો વધારો થશે. અમદાવાદમાં 16 ડિગ્રી તાપમાન નોંધાયું હતું. આ ઉપરાંત નલિયા 10 ડિગ્રી તાપમાન સાથે સૌથી ઠંડું શહેર રહ્યું હતું.

આગામી 48 કલાક બાદ અમદાવાદના તાપમાનમાં એકથી બે ડિગ્રી વધારો થવાની સંભાવના હવામાન વિભાગે દર્શાવી હતી. હાલમાં બે દિવસ દરમિયાન વાતાવરણ યથાવત રહેશે. વહેલી સવારે ઠંડીનો અનુભવ થશે બાદમાં દિવસ દરમિયાન સામાન્ય તાપમાન રહેશે અને રવિવારથી ઠંડીનું પ્રમાણ ઓછુ વર્તાશે.