- ડુમસ રોડ પર પોલીસ કર્મચારી પર હુમલો
- 22 હુમલાખોરની પોલીસે અટકાયત કરી
- 40થી વધુ લોકોના ટોળા સામે ગુનો દાખલ
હાલમાં દેશભરમાં ટ્રક ડ્રાઈવરો દ્વારા હડતાળ પાડવામાં આવી રહી છે. જેમાં હવે ટ્રક ડ્રાઈવરોની ગુંડાગર્દી સામે આવી રહી છે. જેમા સુરતમાં સિટી બસ પર પથ્થરમારો કરતાં અટકાવવા પહોંચેલી PCR વાનના પોલીસકર્મીને ઘેરીને હુમલો કરનાર 22 ટ્રક ડ્રાઈવરોની ધરપકડ કરવામાં આવી છે. ડુમસ પોલીસે રાયોટીંગનો ગુનો નોંધ્યો છે. સુરત PCR વાનના પોલીસકર્મી ડ્રાઈવરો પર હુમલો કર્યો હતો. ડુમસ પોલીસે 143, 147, 332, 341, 504 મુજબની કલમો મુજબ ગુનો નોંધવામાં આવ્યો છે. તેમજ તમામ હુમલાખોર મગદલ્લાના ટ્રક ડ્રાઈવર હોવાનું સામે આવ્યું છે.
નવા કાયદાનો દેશભરમાં વિરોધ
કેન્દ્ર સરકારના નવા કાયદાનો ડ્રાઈવરો વિરોધ કરી રહ્યા છે. ત્યારે આ આંદોલન હવે હિંસા તરફ આગળ વધી રહ્યું હોય તેવું સામે આવી રહ્યું છે. ડુમસ મગદલ્લા રોડ પર ટ્રક ડ્રાઈવરોએ સિટી બસ અટકાવીને પથ્થર મારો કર્યો હતો. આ અંગેની જાણ કન્ટ્રોલ રૂમને કરાઈ હતી. જેથી તાત્કાલિક ઘટના સ્થળે પોલીસની પીસીઆર વાન આવી ગઈ હતી. જો કે, આ દરમિયાન ઉગ્ર બનેલા ટ્રક ડ્રાઈવરોએ પોલીસકર્મીને ઘેરી લઈને હુમલો કર્યો હતો. જે સમગ્ર ઘટના વીડિયોમાં કેદ થઈ જતાં હાલ વીડિયો વાયરલ થયો છે.
પોલીસ અને ટ્રક ડ્રાઈવરો વચ્ચે હલ્લાબોલ
સુરતના ડુમસ મગદલ્લા રોડ પર ટ્રક ડ્રાઈવરો હલ્લાબોલ કરી રહ્યા હતાં. આ દરમિયાન પાલિકા સંચાલિત સિટી બસ પસાર થઈ હતી. જેથી ઉગ્ર બનેલા ટ્રક ડ્રાઈવરોએ બસ પર પથ્થરમારો કર્યો હતો. જેથી બસ ત્યાં જ ઉભી રહી ગઈ હતી. જો કે, આ અંગેની જાણ પોલીસ કન્ટ્રોલ રૂમને કરી દેવામાં આવી હતી. જેથી પીસીઆર વાન 902 ઘટના સ્થળે તાત્કાલિક પહોંચી ગઈ હતી. જેમાંથી બહાર નીકળેલા પોલીસકર્મી પર જીવલેણ હુમલો કરવામાં આવ્યો હતો.
પોલીસ વાનGJ 5 GV 2270 ના પોલીસકર્મી પર હુમલો કરવામાં આવ્યો હતો. આ કર્મચારી પર હુમલો થતાં તે ભાગીને બીજી ખાનગી કારમાં બેસી ગયો હતો. જેમાંથી પણ તેને બહાર કાઢીને હુમલો કરાયો હતો. ટ્રક ડ્રાઈવરોએ ચપ્પલ અને ઢીક્કા મુક્કીના માર માર્યા હતાં. હાલ હુમલાનો વીડિયો સોશિયલ મીડિયામાં વાયરલ થયો છે તમામ મામલે ડુમસ પોલીસ એ 40 થી વધુ લોકો સામે ગુનો નોંધ્યો છે અને 22 લોકો ને વીડિયોના આધારે અટકાયત કરી ને કાયદેસરની કાર્યવાહી કારી છે અન્ય ફરાર ટ્રક ડ્રાઈવર ની પણ વીડિયોના આધારે શોધી વધુ તપાસ હાથ ધરી છે.
