ડ્રાઇવરોના હડતાળની અસર શરૂ, પેટ્રોલ-ડીઝલની અછત સાથે ફળ-શાકભાજી મોંઘા

• હિટ એન્ડ રનના નવા કાયદામાં વધુ સજા-દંડ સામે વિરોધ
  
• રાજસ્થાન-એમપી સહિત 10 રાજ્યમાં વધુ અસર જોવા મળી
  
• હાલના તબક્કે ચાલી રહેલા હડતાળથી પારાવાર મુશ્કેલી
  

ગુજરાતમાં ટ્રક-બસ ડ્રાઇવરોની હડતાળની ગંભીર અસરો જોવા મળી છે. જેમાં પંચમહાલમાં ટ્રક-બસ ડ્રાઇવરો સાથે પોલીસ વડાની બેઠક થઇ છે. તેમાં હડતાળને પગલે કાયદો વ્યવસ્થા ન ખોરવાય તે માટે બેઠક યોજાઇ છે. જિલ્લાના ટ્રક એસો. અને બસ એસો.ના અગ્રણીઓ હાજર રહ્યાં છે.

અકસ્માતના નવા કાયદાને લઈ બેઠકમાં ચર્ચા થઇ

ટ્રક-બસ ડ્રાઇવરોમાં અકસ્માતના નવા કાયદાને લઇ વિરોધ ચાલી રહ્યો છે. અનેક રાજ્યોમાં ટ્રક-બસ ડ્રાઈવરો હડતાળ પર ઉતર્યા છે. પેટ્રોલ-ડીઝલની અવરજવર પર અસર ના પડે એ માટે ચર્ચા થઇ છે. ત્યારે કચ્છના મુન્દ્રામાં ટ્રક ડ્રાઈવરોની બેઠક મળી છે. અકસ્માતના નવા કાયદાને લઈ બેઠકમાં ચર્ચા થઇ છે. 4 જાન્યુઆરીએ મામલતદારને આવેદનપત્ર આપશે. તથા ડ્રાઈવરોએ કાયદાને કાળો કાનૂન ગણાવ્યો છે.

હાલના તબક્કે ચાલી રહેલા હડતાળથી પારાવાર મુશ્કેલી

કેન્દ્ર સરકારનો રોડ પરિવહન સુવિધા અંતર્ગત બદલાયેલો નિયમ સાબરકાંઠા જિલ્લાના શાકભાજીના હબને પણ ભારે પરેશાનીમાં મૂકી ચૂક્યો છે. હાલના તબક્કે વાત કરવામાં આવે તો રોડ પરિવહન ઉપર મોટા વાહનોએ હડતાળની શરૂઆત કરી છે. જેના પગલે હવે શાકભાજી પકાવનારા ખેડૂતો સહિત વેપારીઓ અને સામાન્ય જનતાને પણ તેનો માર લાગવા માંડ્યો છે. એક તરફ રોજિંદા વ્યવહાર મામલે મોટા વાહનોની આવશ્યકતા યથાવત રહી છે ત્યારે હાલના તબક્કે ચાલી રહેલા હડતાળથી પારાવાર મુશ્કેલી પેદા થઈ છે.

રોજિંદા વાહન વ્યવહાર સહિત મોટા વાહનોની જરૂરિયાત આવશ્યક બની

સાબરકાંઠાનું વડાલી વિસ્તાર શાકભાજીનું હબ ગણાય છે જેના પગલે રોજિંદા વાહન વ્યવહાર સહિત મોટા વાહનોની જરૂરિયાત આવશ્યક બની રહે છે. જોકે કેન્દ્ર સરકાર દ્વારા અકસ્માત સમય ડ્રાઇવરની ભૂમિકા મામલે દંડનીય કાર્યવાહી સહિત અન્ય જેલની ભૂમિકા કરાતા હવે સમગ્ર ડ્રાઇવર આલમ એક થતા હવે સ્થાનિક કક્ષાએ પણ ભારે વિરોધાભાસ શરૂ થયું છે. જોકે ટ્રાન્સપોર્ટ બંધ થતા હવે શાકભાજીના ભાવ અડધા થઈ ગયા છે. સાથોસાથ છેવાડાના વ્યક્તિ માટે પણ ઊભી થયેલી આ વિરોધાભાસની સ્થિતિએ કેટલાય માર્કેટમાં ભરાવાની સ્થિતિ આવી છે. જોકે હાલમાં આ મામલે ખેડૂતો સહિત વેપારીઓ પણ રાજ્ય સરકાર તેમજ કેન્દ્ર સરકારને તાત્કાલિક ધોરણે સમગ્ર આંદોલન સમેટવા સહિત ચોક્કસ નિર્ણાયક ભૂમિકા ભજવવા અપીલ કરી છે.

દિન પ્રતિદિન શાકભાજીના ભાવ તૂટી રહ્યા છે

સામાન્ય રીતે કોઈપણ વસ્તુની જ્યારે ઉણપ સર્જાય છે ત્યારે તેના ભાવ આસમાને પહોંચતા હોય છે. જોકે હાલમાં ગુજરાત કક્ષાએ શાકભાજીનું સૌથી મોટું માર્કેટ રહેલા વડાલી માર્કેટ યાર્ડમાં ટ્રાન્સપોર્ટની સુવિધા ન મળતા હવે દિન પ્રતિદિન શાકભાજીના ભાવ તૂટી રહ્યા છે. જેથી ખેડૂત આલમને ભારે નુકસાન થઈ રહ્યું છે. સાથોસાથ વેપારી વર્ગ માટે પણ આ તબક્કો ભારે ભીમાસણમાં મુકવાનો આવ્યો છે. હાલમાં સ્થાનિક કક્ષાએ વિવિધ શાકભાજીના ભરાવાના પગલે ભાવ તૂટી રહ્યા છે તો બીજી તરફ શહેરી કક્ષાએ દિન પ્રતિદિન ભાવ વધી રહ્યા છે. એક તરફ માલની યથાવત આવક હોવા છતાં બિનપ્રતિદિન વધતા જતા ભાવથી સ્થાનિક જનતા પીસાઈ રહી છે. તો ખેડૂતોને પારાવાર નુકસાન જઈ રહી છે જેથી ખેડૂતો સહિત સ્થાનિકોની માંગ છે કે આંદોલન તાત્કાલિક સમેટવામાં આવે તેમજ વાહન વ્યવહારને ફરીથી યથાવત કરવામાં આવે તો ઊભી થયેલી આ વિરોધાભાસની સ્થિતિથી જગતનો તાત કંગાલ બનતો અટકે તેમ છે.