- ફેક્લ્ટી ડીનની ચૂંટણીના અભાવે ડીન વગર પદવી અપાશે
- મુખ્ય મહેમાન તરીકે ઉપરાષ્ટ્રપતિ સમારોહમાં હાજર રહેશે
- આ વર્ષે યુનિવર્સિટીનો 72મો પદવીદાન સમારોહ યોજાશે
ગુજરાત યુનિવર્સિટીનો વાર્ષિક પદવીદાન સમારોહ હવે 19મીએ જાન્યુઆરીએ યોજાશે. ચીફ ગેસ્ટ તરીકે ઉપરાષ્ટ્રપતિ ઉપસ્થિત રહેશે. જો કે ડીનની ચૂંટણી થઈ નહીં હોવાના કારણે ડીન વગર જ પદવીદાન સમારોહ યોજાશે. આ વર્ષે વિવિધ ફેક્લ્ટીના યુજી, પીજી, પીએચડી સહિતના 52,000થી વધુ વિદ્યાર્થીઓને પદવી એનાયત કરાશે.
યુનિ. દર વર્ષે ડિસે.-જાન્યુઆરીમાં પદવીદાન સમારોહ યોજે છે. આ વર્ષે યુનિવર્સિટીનો 72મો પદવીદાન સમારોહ યોજાશે. મુખ્યમહેમાન તરીકે ઉપરાષ્ટ્રપતિ હાજર રહેશે. યુનિવર્સિટીના કુલાધિપતિ અને રાજ્યપાલ આચાર્ય દેવવ્રતની અધ્યક્ષતામાં પદવીદાન સમારોહ 19મીએ બપોરે 12 વાગ્યે યુનિવર્સિટીના ઓડિટોરિયમમાં યોજવામાં આવશે. અગાઉ 13મી જાન્યુઆરીએ સમારોહ યોજાનાર હતો જો કે ત્યારે રાજ્યપાલને સમયની અનુકૂળતા નહીં હોવાના કારણે તારીખ બદલાઈ હતી.કોમન યુનિવર્સિટી એક્ટના અમલ બાદ પ્રથમ વખત યોજાનાર પદવીદાન સમારોહમાં બોર્ડ મેમ્બરો અને ઈસીના સભ્યો હાજર રહેશે. ફેકલ્ટીના ડીનની મુદત પુરી થયા બાદ ચૂંટણી થઈ નહોતી. એકેડેમિક કાઉન્સિલ બન્યા બાદ અને સરકાર દ્વારા સ્ટેચ્યૂટ જાહેર થયા બાદ નવા ડીન નિમાશે.
