- તહેવારોમાં સારું વેચાણ થયા બાદ ડિસેમ્બરમાં દરેક કંપનીનું વેચાણ ઘટયું
- ટુ વ્હીલરમાં વર્ષના અંતે કંપનીઓએ કોઈ સ્કીમ નહીં મૂકતા 19.87 ટકાનો ઘટાડો
- હોન્ડા પાસે સ્ટોક જ નથી
ઓટોમોબાઈલ ઉદ્યોગોને તહેવારોમાં સારું વેચાણ થયું હોવા છતાં પણ ડિસેમ્બર માસના અંતે ગત વર્ષની સરખામણી કરતા માઈનસ 12.77 ટકાનો ઘટાડો નોંધાયો છે. રાષ્ટ્રીયકક્ષાએ વાહનોના વેચાણમાં 21.14 ટકાનો વધારો થયો છે. જ્યારે ગુજરાતમાં 12.77 ટકાનો ઘટાડો નોંધાયો છે.
રાજ્યમાં ડિસેમ્બર-22ની સરખામણીએ ડિસેમ્બર-23માં 21,284 ટુ-વ્હિલર ઓછા વેચાયા છે. કોમર્શિયલ વ્હિકલ 469 ઓછા વેચાયા છે. કારમાં 1,566નો ઘટાડો નોંધાયો છે. એકમાત્ર થ્રી-વ્હિલર 204 અને ટ્રેક્ટર 3,867 વધુ વેચાયા છે. ડિસેમ્બર-22 કરતા ડિસેમ્બર-23માં 19,248 ઓછા વાહનો વેચાયા છે. તેની પાછળનું કારણ જણાવતા ફાડા પૂર્વ ચેરમેન પ્રણવ શાહે કહ્યું કે સપ્ટેમ્બર, ઓક્ટોબર, નવેમ્બરમાં વાહનોનું જોરદાર વેચાણ થયું હતું તેના કારણે કરેક્શન આવવાનું હતું. ટુ-વ્હિલરમાં વર્ષના અંતે કંપનીઓ સ્કીમ રજૂ કરે છે પરંતુ આ વર્ષે આવી કોઈ સ્કીમ નહીં આવતા ટુ-વ્હિલરમાં વેચાણ ઘટયું છે. હોન્ડા પાસે સ્ટોક જ નથી. ડિસેમ્બરમાં આમ પણ વેચાણ ઘટે જ છે. આગામી જાન્યુઆરીમાં વેચાણના આંકડા સુધરશે. કારમાં એસયુવી અને સેડાન કેટેગરીમાં નવા મોડલ આવશે તેના કારણે વેચાણ વધવાની આશા છે.
