- અમદાવાદમાં બે, સુરત, વડોદરા, રાજકોટ RTOમાં ટેસ્ટનો સમય વધારાયો
- સુભાષબ્રિજ આરટીઓમાં પાંચ દિવસનું વેઇટિંગ
- ટાઇમટેબલ બદલાતા ઇન્સ્પેકટરોની સાથે વાહનચાલકો પણ પરેશાન થઇ ગયા છે
રાજ્યની અમદાવાદની સુભાષબ્રિજ-વસ્ત્રાલ સહિત સુરત, બરોડા અને રાજકોટ આરટીઓમાં વાહનના પાકાં લાઇસન્સ માટે ડ્રાઇવિંગ ટેસ્ટના સમયમાં ફરીવાર ફોરફાર કરાયો છે. નવા શિડયુલ પ્રમાણએ વાહન ચાલકોને હવેથી સવાર આઠથી રાત્રીના આઠ વાગ્યા સુધી ડ્રાઇવિંગ ટેસ્ટ માટે એપોઇન્ટમેન્ટ મળશે. અત્યાર સુધી સવાર 9.30થી સાંજના 7.00 વાગ્યા સુધી એપોઇન્ટમેન્ટ મળતી હતી. બીજી તરફ વારંવાર ટાઇમટેબલ બદલાતા ઇન્સ્પેકટરોની સાથે વાહનચાલકો પણ પરેશાન થઇ ગયા છે.
વાહનવ્યવહાર વિભાગ દ્વારા આડેધડ ટાઇમટેબલ જાહેર કરીને ઓફીસ ડયુટી 12 કલાકની કરી હતી. ઇન્સ્પેકટરોએ 12 કલાકની ડયૂટીનો વિરોધ કરતાં 8 કલાકની ડયૂટી સાથે ડ્રાઇવિંગ ટેસ્ટના સમયમાં પણ ફોરફાર કર્યો છે. નવા શિડયુલ મુજબ સવાર 8.00 વાગે આવનાર ઇન્સ્પેકટરોએ બપોરના 12.00 વાગ્યા સુધી ટેસ્ટ ટ્રેકમાં ફરજ બજાવાની રહેશે. ત્યારબાદ બપોર 12.00 થી 4.00 વાગ્યા સુધી ઓફીસ કામ કરવાનું રહેશે. જ્યારે બપોર 12.00 વાગ્યાથી ફરજ બજાવનાર ઇન્સ્પેકટરોએ રાત્રિના 8.00 વાગ્યા સુધી ટેસ્ટ ટ્રેકમાં ફરજ બજાવાની રહેશે.
આરટીઓ ઇન્સ્પેકટરોની રજૂઆત બાદ વિભાગે ફરીવાર ડ્રાઇવિંગ ટેસ્ટના ટાઇમટેબલમાં ફોરફાર કર્યો છે. અગાઉ એપોઇન્ટમેન્ટમાં વેઇટીંગ વધી જતાં સવાર 9.00 થી રાત્રિના 10. 00 વાગ્યા સુધી વાહનના ડ્રાઇવિંગ ટેસ્ટની વ્યવસ્થા કરી હતી. આ પછી ફરી સમય બદલી સવાર 9.30થી સાંજના 7.00 વાગ્યા સુધીની સમય મર્યાદા નક્કી કરાઇ હતી. હવે ફરી પાછો સમય બદલવામાં આવતા ઇન્સ્પેકટરોની સાથે વાહન ચાલકોમાં રોષ ફોલાઇ ગયો છે.
સુભાષબ્રિજ આરટીઓમાં પાંચ દિવસનું વેઇટિંગ
સુભાષબ્રિજ આરટીઓ અધિકારીઓએ કહ્યું કે, આરટીઓમાં વાહનના ડ્રાઇવિંગ ટેસ્ટમાં પાંચ દિવસ પછીની એપોઇન્ટમેન્ટ મળે છે. હાલ રોજ ટુવ્હીલરના 11 સ્લોટ છે. એક સ્લોટમાં 25 પ્રમાણે 275 એપોઇન્ટમેન્ટ અને કારના 10 સ્લોટ છે. એક સ્લોટમાં 20 મુજબ 200 એપોઇન્ટમેન્ટ થાય છે. કુલ 475 એપોઇન્ટમેન્ટ હોવા છતાં પાંચ દિવસનું વેઇટિંગ છે. રાજ્યની અન્ય કેટલીક કચેરીઓમાં પણ વેઇટિંગની સ્થિતિ છે.
