- કેન વિલિયમસને ટેસ્ટ કારકિર્દીમાં ફટકારી 31મી સદી
- વિલિયમસને વિરાટ કોહલી અને જો રૂટનો રેકોર્ડ તોડ્યો
- સાઉથ આફ્રિકા સામે બંને ઇનિંગમાં વિલિયમસની સદી
ન્યૂઝીલેન્ડના પૂર્વ કેપ્ટન અને સ્ટાર બેટ્સમેન કેન વિલિયમસન તેની કારકિર્દીના શ્રેષ્ઠ તબક્કામાં છે. વિલિયમસને સાઉથ આફ્રિકા સામેની પ્રથમ ટેસ્ટની બીજી ઇનિંગમાં પણ સદી ફટકારી છે. ટેસ્ટ ક્રિકેટમાં વિલિયમસનની આ 31મી સદી છે. ટેસ્ટ ક્રિકેટમાં સૌથી વધુ સદી ફટકારવાના મામલે વિલિયમસન હવે ભારતના વિરાટ કોહલી અને ઈંગ્લેન્ડના જો રૂટ કરતાં પણ આગળ છે. સક્રિય ક્રિકેટરોમાં હવે માત્ર ઓસ્ટ્રેલિયાના સ્ટીવ સ્મિથ કેન વિલિયમસનથી આગળ છે.
સાઉથ આફ્રિકા સામેની પ્રથમ ટેસ્ટની બીજી ઇનિંગમાં ફટકારેલી સદી કેન વિલિયમસનની ટેસ્ટ કારકિર્દીની 31મી સદી છે. વિલિયમસન હવે ફેબ-4માં સૌથી વધુ સદી ફટકારવાના મામલે બીજા સ્થાને છે. ઈંગ્લેન્ડના જો રૂટના નામે 30 અને ભારતના વિરાટ કોહલીના નામે 29 સદી છે. જ્યારે ઓસ્ટ્રેલિયાના સ્ટીવ સ્મિથના નામે 32 સદી છે.
31 સદી ફટકારનાર ત્રીજો બેટ્સમેન
ન્યૂઝીલેન્ડનો કેન વિલિયમસન ટેસ્ટ ક્રિકેટના ઇતિહાસમાં સૌથી ઓછી ઇનિંગ્સમાં 31 સદી ફટકારનાર વિશ્વનો ત્રીજો બેટ્સમેન બની ગયો છે. વિલિયમસને તેની ટેસ્ટ ક્રિકેટની 170મી ઇનિંગમાં તેની 31મી સદી ફટકારી છે. આ રેકોર્ડ લિસ્ટમાં વિલિયમસને ઓસ્ટ્રેલિયાના ભૂતપૂર્વ મહાન ખેલાડી રિકી પોન્ટિંગ અને ભૂતપૂર્વ પાકિસ્તાની યુનિસ ખાનને પાછળ છોડી દીધો છે. યુનિસ ખાને 184 ઇનિંગ્સમાં 31 સદી ફટકારી હતી. જ્યારે પોન્ટિંગે 174 ઇનિંગ્સમાં 31 સદી ફટકારી હતી.
ન્યૂઝીલેન્ડ મજબૂત સ્થિતિમાં
કેન વિલિયમસને આ ટેસ્ટની પ્રથમ ઇનિંગમાં 118 રનની ઇનિંગ રમી હતી. બીજી ઇનિંગમાં તેણે 109 રન બનાવ્યા હતા. ન્યૂઝીલેન્ડે તેના પ્રથમ દાવમાં 511 રન બનાવ્યા હતા. જવાબમાં સાઉથ આફ્રિકાની ટીમ 162 રન જ બનાવી શકી હતી. આ પછી સમાચાર લખાય છે ત્યાં સુધી કિવી ટીમે 4 વિકેટે 179 રન બનાવી લીધા છે. આ સ્થિતિમાં ન્યૂઝીલેન્ડની કુલ લીડ 528 રનની થઈ ગઈ છે.
