- વડોદરામાં નાના મોટા 728 સ્થળોએ ગરબા થશે
- ગરબાનું આખું સ્થળ પાર્કિંગ સુધી CCTV જરૂરી
- ગરબાના સ્થળે મેડિકલ કીટ, ટીમ રાખવાની રહેશે
રાજ્યભરમાં નવરાત્રીની ઉજવણીની તૈયારીઓ ચાલી રહી છે. ત્યારે તમામ શહેરોમાં પોલીસ દ્વારા બંદોબસ્તની કામગીરી ધ્યાનમાં લેવામાં આવી રહી છે. આ વચ્ચે વડોદરા શહેરમાં નવરાત્રીને પગલે શહેર પોલીસનો ચાંપતો બંદોબસ્ત ગોઠવાશે. જેના અંગે પોલીસ કમિશનર અનુપમસિંહ ગહેલોતે નિવેદન આપ્યું છે.
આ અંગે માહિતી આપતાં પોલીસ કમિશ્નરે જણાવ્યું કે, શહેરમાં 27 મોટા ગરબા મળી કુલ 728 સ્થળોએ નાના મોટા ગરબા થશે. જેમાં ગરબાનું આખું સ્થળ પાર્કિંગ સુધી સીસીટીવીમાં કવર કરવું પડશે. તેમજ હાલની સ્થિતિને જોતાં ગરબાના સ્થળે મેડિકલ કીટ અને ટીમ રાખવાની રહેશે. સ્વાસ્થ્યને લઈને ગરબા દરમિયાન સતત એનાઉન્સમેન્ટ કરવી પડશે. જ્યારે ઈમરજન્સી માટે ગરબાના સ્થળે ફાયર ફાઇટર રાખવા પડશે. તો ઇમરજન્સી લાઈટ અને જનરેટર રાખવા પડશે. તેમજ દરેક મેદાન પર ખાનગી સિક્યુરિટી રહેશે.
છેલ્લા ઘણાં સમયથી રાજ્યમાં હાર્ટ એટેકના કેસની સંખ્યામાં વધારો થઈ રહ્યો છે ત્યારે ગરબામાં બ્રેક પડે તો પીએ સિસ્ટમ થી તેના અંગે સમજ આપતા રહેવી પડશે. જ્યારે મેડીકલ ઇમરજન્સી માટે સ્વયં સેવક રાખવાના રહેશે, જેમાં સ્વયં સેવકોને સીપીઆર તાલીમ આપવાની રહેશે. તો ગરબા સ્થળે પાણી,ઓક્સિજન અને ઓ.આર.એસ રાખવા પડશે. સાથે જ ગરબા મેદાનમાં એમ્બ્યુલન્સ અને ઇમરજન્સી માટે ટ્રાફિક કોરિડોર બનાવવાનો રહેશે.
આ ઉપરાંત વિવિધ મહિલાઓની સુરક્ષા માટે પણ તમામ તકેદારી રાખવાની રહેશે. તેના માટે મહિલા ખેલૈયાઓનું ચેકીંગ મહિલા સિક્યુરિટી કરી શકશે. જ્યારેગરબા મેદાનમાં લોકોની મદદ માટે પોલીસ હેલ્પ ડેસ્ક રાખવાનું રહેશે. જેની સાથે જ મેદાન પર અને શહેરના વિવિધ વિસ્તારોમાં શી ટિમ અને અભયમ ની ટીમ તૈનાત રહેશે. તેમજ ગરબાનો સમય પૂર્ણ થાય ત્યારે ટ્રાફિક પોલીસ સેવા આપશે.
વડોદરા પોલીસે જણાવ્યું કે, 7 ડીસીપી 15 એસીપી સહિત ના પોલીસ અધિકારીઓ મોનીટરીંગ કરશે. જેમાં એસ.આર.પી ની ટુકડીઓ તૈનાત રહેશે. તેમજ સાયબર ક્રાઇમની ટીમો સોશ્યલ મીડિયા પર નજર રાખશે અને કોઈ પણ અઘટિત ઘટના ન ઘટે તેના પર નજર રાખશે. વાંધાજનક પોસ્ટ કરનાર,ફોરવર્ડ કરનાર અને કોમેન્ટ કરનાર સામે તાત્કાલિક પગલાં લેવાશે.
